ДаIвъийни цIаеенче илгъечIуна игит

Гьайни сен йишди оIлкайн ХаIбни Ватанни даIявъэйе Гъамувхьайн 75 сен алгъагьасс. Мани азгъунни даIвъйе гыргыни миллетбышиква янашеба йихъбышед гьаракатукан иштырак гьау. Манбышди гьаIкIей одкIуний, манбы йикIел’ хъавалявъуй йишин бордж водон.

.Ватанни дагъамни йигъыл’ саджар  къырагъыл’ аху деш, гыргыба манчиниме джан гиххьес гьазирба вухьа. Йихъбышди гьарни хиваршенче даIвъэйхъа хаIдда халкь гьадкIын. Манбышин хаIббананбы йыIкьалхъа сабкIыл деш. Фашистаршике Ватан къаттивхьан гьавъуйниме садджу Мишлешни хивейнче даIвъэйхъъа ваIщеле гьеххара инсан гьаркIын. Манбышди сыранэй УIмаров Раджабыр ыхьана.Раджаб УIмаров 1912 сен Мишлешни хивей едике ыхьа. 1941 сен дявъэйхъа аркIын. ХаIдданани вурушбышей иштырак гьау. Смоленск шагьарни алла алгьааIни вурушбышди санчей Р. УIмаров яраланмышхьана. Хилидже вахтна госпиталэй къалирхьу. ДавъйиI чIаIв вухьайле хъийгъа, 1945 сен, мана едике ыхьайни хивейхъа саркIыл ва кIолхозей ишлемишехьи гиргъыл. Хьебни сениле хъийгъа Раджаб УIмаров фермайна хааIрна гиххьы.Инсанаршини увгьойхъа гора, мана ишис, къуллухус аваакIуна ыхьа. Манкъуни вахтал’ кIолхозни вакьаIбышин сай сен-сениле гьехха хъехье ыхьа. Дагъамыйвал’бышихъа илдяккы, няъас увгьое, кьыIдмина вакьаIбышин коч Азербайджанхъаний гьаъан, къыIлина вакьаIбы сувалхъаний хъекканбы, манкъве джуна пеше, джун санаъаIт саламатда гьаъа ыхьа.60-70 сенбышей Раджаб УIмаров Бабаюртни бинайл’ биргадирна, чаврабышди фермайна хааIрна ишлемишхьа. Мани сенбышей кIалхозын гьуIкуматын гиххьыйн гыргын пIланбы гяццIаъа ыхьа. Манкъуни ишис гьуIгьуматын ахтына кьиймат гьуво, мана Ленинни орденыс лайикьра къаджы. Йихъбышике маIхудун ахтыйн награда тека-сейрак инсаныс гьуво.АIхрейни 10-12 сенбышей Р. УIмаров Мишлешни кIалхозей биргадирна ишлемишхьа. Манкеб манкъуна иш гыргынкъукIле къоодже вухьа. Раджаб УIмаровухъаб кьоIбле хизан вухьа. Мана 15 ушахна дек’ ыхьа. Давийна ветеран дагъамыйвал’бышиле хъаIйкьан ыхьа деш. Манкъве гьалални заIгьматука ушахар къелилхъа хъавъу, манбышис гьаIкIена ыIмырна йаIхъ гьавгу.1985 сен Раджаб УIмаров раIгьматыххъа аркIын. Инсанаршини йикIел’ мана гьаIкIена игит хьинне аху.