Дюнйейни акьвал’ хаlдда джурабаджура санаъаlтбы водунбы. Манчини аlрайл’ сибыкынчика янашеда дагъамынбыд водунбы. Азербайджанни ярахни  кьуввабышее къуллух гьааъана летчик, хааlрна лейтенант Ализаде Мурад Азадна дихыр манбышди джаргее ворна.

Мурад  Азербайджанни хаlдни авиобазайна гьам лётчик, гьамыр самолетбы хъаъана техник ворна. Манкъун техникайлхъан аlшкь, гьавас  кlыл’валике гидгъал. Мурадни гьамабазаршини увгьойка, джо мактабее хъаlдаххъанкъаl, мана ракетабышика, самолетбышика, вертолетбышика  хаlрраний марахламишехьи. Геледжагъыл’ летчикна пеше алябтlуй манкъуна мураад вухьа. Аlрейнче сабара сенбы адкlынийле хъийгъа, Мурад джуни мураадылхъа гьирхьыл’на. Хаlбба заlгьмат гьавъуйле хъийгъа, манкъве мани санаъаlтна диплом алябтlу.  

Мурадна ушахыйвалла Бакуйни шагьарее илгъевчlу. Мана 1990-ъэсди сенни декабрьни 27-чил’ Бакуйни шагьарее едике ыхьа. 1997-ъэсди сен мана мактабейхъа аркlын. 9-ъэсди сыныфейхъамее шагьарни 55№ мактабей хъаlдхъы. 2006-ъэсди сен Мурад  Нахчеванскийни доюл’ни эскерар гьаlзирааъани лицейхъа иккечlу. 2009-ъэсди лицей югни кьийматбышика быкырау. 2013-ъсди сен Азербайджанни летчикар гьаlзирааъани мактабын чlакlни космосни аппаратбышин,  самолетбышын, вертолетбышин ва сабара илехани техникайн моторбы хъаъан шоlъба чlараlни дипломыка таамау. Хъаlдхъыl таамхьайле хъийгъа, авиобазее ишлемишехьи гиргъыл’. Къийна мана джуни ишна доюкана санаъаlткар ворна. 

Сечмишауйни  санаъаlтыле Мурад геер разийра ворна. Гьааъани ишике манкъвее хаlдын лезет аляатlа. Манкъуна иш дагъамна вухьейиб, нишиледжар хъаlйкьан деш. Джуни гьийд илёдзырыйн мисалабы, хаlдни баджарухука аlхырейхъамее быкыраъас чалышмышехьи.  

Манкъуни ишис джуни чlаlкынбышед ахтына кьиймат гьооли. Манбышикlле ацlан, Мурад гьаммаше  чалышмышехьена хылехъа алябтlуна иш аlхырейхъамее саламатба вуккейс. Манкъве 2016-ъэсди сен апрельни вуза Къарабах ыхьайни вурушбышее хаlбна игитийвалла гьаагу. Вертолетыква  эскераршис цlеддийн кумаг гьихьарау, яраламишувхьайнбы вурушбы ааlни майданейнче алябтlу. Мурадыхъаб геб уфтанна хизан вобна. Манкъуна хьунаше Аlлибайрамни хивенчена ворна. Манбыше саджиге дих хаlрхъаъа. 

Ши Мурадыс джанана сагъвалла аlрзаъа.  Хаlйбышейна йаlхъ угъурукана вухьена!