Камбулатни хивее йыlкьнекин мактаб аахъыйн хил’дже сенбы водунбы. Аlхырейни сенбышее мани мактабее хаlдда югни суралхъан бадалхьайбы ыхьа.Гьинчиле сабара сенбына гьихъа мактаббыс тезе бинаа алявъу. Гьаlшде мактабыхъад уфтанна бина, ачухын сыныфбы водунбы.
Илгъечlуйни уlлджумее мактабни вазиятыке, манбыше гьийгъанчее хъооlни ЕГЭ-бышис ыккеккани гьаlзирийвалике, хурни сыныфбышис гьелени къуlмани одхьунийке делесийваленче танышувхьесдимее Камбулатни йыlкьнекни мактабейхъа йаlхъ авхъу, маъаlллимаршикайий шыгыртаршикан марахукан горушбы алгъагьу, манбышди фыкрейдынбы ацlахьа. Маъаlллимаршини увгьойка, алидни сыныфбышин ушахар гьийгъанче хъооlни имтагьанбышис гьаlзироохьи вобунбы.
Мани сардан мактабын хаlбна иш вуккекка. Районни хъаlдхъыйни управлениейн гуджнан назарат ыккекка водун. ЕГЭ хъелесди шыгыртаршика алава дарсыбы ыккекка, манбышис башта дешин мисалабы хаlдхъаъа.
Дагъайдни сыныфбышее ушахаршис гьелени одхьунийле шигыртар разийбайий. Гьинчиле сабара вахтна гьихъа манбышее ушахаршис къуlман одхьуний гьелесдимее джурайн утагъ хъау. Мааъад югун имканбы яратмишау. Къийнийни йигъыл’ мани карас гьокуlматын кьеккан пыл хаlдын дехьейид, мактабын ушахаршис югун одхьуний гьели.
Камбулатни мактабее къаджейнчикейий къайихьыйнчике гееб разийба авху. Мактабна дагъамийвалла менни карее водун. Гьаlшдилхъамее манбышихъад физкультурайн дарсыбы ыккейсдимее спортзал дешин. Мыкlани вахтал’ физкультурайн дарсыбы сыныфбышее ыккекка. Мактабни магьаlлле ушахарше спортуква оюнбы ыккейсын гьар джура ыlгьтаджбы водунбы. Вобна дагъамийвалла аlрейнче алябтlасдимее гьинчиле сабара сенбына гьихъа.
Камбулатни йыlкьнекни мактабын джони гьаlракатбышиква спортзал аляъа гидгъыл. Имканбы дехьайхъа гора, мана иш быкырувхьа дешобна. Баругбы аляу таамхьа водунбы. Чардахый адын ишбы гьааъас аху. Мактабна директор Рамазан Османовни увгьойка, спортзал аляъас хаlдын кумаг хивни джамаъаlтын гьуво. Манбыше кlаджарбы гийхьенкъаl, баругбы аляъанкъаl югун иштыракау. Манчиле савагьийда, манчисын тикинтийн материалыд илешенкъа, къырагъыл’ иледзыр деш. Джоке ахаlн кумаг гьувойн.Камбулатни джамаъаlтын гьаваа къуlма хъувхьай гозетяъа. Манбышди фыкрее гьайни сен аляъан объект таамауй водун. Мани карее манбышис алава кумаг ыккан. Дора шинаб къырагъыл’ ил’деозарас, шавухъадый имканбы мани карее кумаг гьелес.
