Февральни 21-чил’ дюнйейл’ ед’ни мизяршин Йигъ илгъечIу. Са уIл’джумна гьихъа гыргынанкъаI манн байрамыс къассырыйн маджлисбы, конкурсбы, тамашебы ва ыIлим конференциебы илгъечIу. Гьар сен ман байрам Дагъыстанее шешит’да, гьаIракатыква алгъайгьи.
Февральни 20-чил’ Дагъыстанни хъаIдхъий артымишаъани институте, дагъыстанни шааираршин шечIбы друстда хъаIдаххъан конкурс илгъечIу . Мааъад районный этапе гъамувхьайни 11 сыныфбышди шигыртарше иштырак гьау. Манбыше джони районни шигыртаршини аIрее югын баллбы ед’ни мизекейий ва адабиятыке алеетIу ва манбышихъад авхуйнбышиле гьеххан адабиятын асарбы хъаIдаххъан гьаIракатбы ыхьа. Февральни 20-чил’ Дагъыстанни хъаIдхъий артымишаъани институте, дагъыстанни шааираршин шечIбы друстда хъаIдаххъан конкурс илгъечIу . Мааъад районный этапе гъамувхьайни 11 сыныфбышди шигыртарше иштырак гьау. Манбыше джони районни шигыртаршини аIрее югын баллбы ед’ни мизекейий ва адабиятыке алеетIу ва манбышихъад авхуйнбышиле гьеххан адабиятын асарбы хъаIдаххъан гьаIракатбы ыхьа.
Конкурсее иштырак гьаъас ва джон гьаIракатбы, ацIаал’бы гьагвас дагъыстанни миллетбышин (аварбышин, даргибышин, къумыхаршин, лезгибышин, табасаранлыбышин, лакбышин, чеченаршин, ногъаяршин, азербайджанлыбышин, агъуларшин, рутуларшин, цIаIхбышин) ушахар хъобтIул. Гьихъа эгьес ыккан, Рутул районеенче конкурсее иштырак гьаъас ушахар абы деш. Ман цIеддыйни элейс эйхьен саIгьв дешодун. Мысаджад, нениджад конкурсбышее, аIссас ед’ни мизяаршиква алаакьани, манбыше иштырак гьаъа деш. Манчина сабаб шакIле дяацIавхьана. Диван гьаъанар дешда. Ман районни меега хаIдын аIйиб водун. Конкурс гигъалассе гьихъа ДИРО-ни утагъее маджлис илгъевчIу. Мана ДИРО-ни ишчее Миясат Муслимовае вукку. МаIнкъее конкурсехъа абыйн иштыракчер саламыква къаршламишавъу ва манбышис угъурбы аIрзуламишау. Гойне «Радуга» дойил’ни эстетик тербие гьелени Марказни ушахарше концерт гьагу.
Манчиле хъийгъа конкурсеехъа абыйн 11сыныфын шигыртар дестебышиква секциебышеехъа, мизаршис сикы, биталавъу.
ОIгийни сенбышее шечIбы хъаIдаххъани конкурсе Бабаюртни районеени цIаIхбышди мактаббышди шигыртаршени иштырак гьаъан. Гьайни сен манчеб абыйн ушахар вухьа деш. манчина сабаб мана вухьа : не Калял’ни йыIкьнекни мактабыхъад, не Тезе Муслагъни йыIкьнекни мактабыхъад 11 сыныф дехьай.
Ши умыд гьааъана геледжагъыл’ ман саIгьвбы къайиккас деш.Къайиссадъэсди феврал’ни йигъыл’ ед’ни мизяаршис къабсырна маIгьабна маджлис ДДУ-ни ФФ-те илгъевчIу. Мана дагъыстанни мизяршини ва дагъыстанни адабиятни кафедрабышди кумагыква, телябабыше къурмишавъу. Телябабыше мааъад джони миллетбышин йиссейн палтар, хорагбы, аIдатбы, мыкIар гьагу ва шечIбы , маIънийбы ед’ни мизел’ хъаIдхъы. ЦIаIхбышин йиссейн палтар, аIдатбы, хорагбы ДДУ-ни ФФ-ни 3 курсни телябее Севил’ Давудовае гьагу. ГьаIманкъееджад цIаIхбышди шааираршин шечIбы ед’ни мизел’ хъаIдхъы. МаIнкъыни гьаIракатбышис тамашейс абыйни ректоратни, факультетни ишчерше, телябабыше, журналистарше ахтына кьиймат гьуво.
Севил’ гьам цIаIхбышди джегьилершини ташкилатна хааIрна ворна. МаIнкъее гьаммаше гьар джура майданбышее цIаIхбышди мизеква, адабиятыква, маданиятыква, таарыхыква багълыданан маджлисбы къурмишаъа.
Ши, гыргын ед’ни мизел’ йишонааъан инсанар, шигыртар, телябабы, маъаIллимар , журналистар, шааирар, язычер мани байрамыква табрикааъа. Гыргынъус садджу югун ешайиш ва джанана сагъвалла аIрзуламишааъа!
