Инсанар лапджаб азгъунувхьайнкъа1, манбы а1к1елеехъа сааъасдимее, Аллагье дюнйейлхъа джурабаджур балябы къихели, горсатмабы гьагва. Манчиква Манкъвее инсанаршис а1янаъа, вущийий гьайни дюнйейна са1гьыб. Гьар асырее са гьа1диса, са фалякат воохьи: гагь ч1ак1ын да1въийбы; гьагь табиятын фалякатбы; гьагь йы1кьын ч1ырвал’бы. Агар манкеб инсанар очеехъа хъидябее, а1хиркьиямат хъехьи. Дюнйе чини охале къайхьасын.
Къийнаб меб дюнйейн инсанар ха1бни баляака растна хъабы. Хьейибле-ёкьубле вазобна, дюнйел’ хъигъооч1ена ч1ырвалла- коронавирус салат1увхьайн. Манчин яра, кок Китайле гидгъыл. Сабара вахтале мана быкырни дюнйелхъа еймишивхьа. Быкырын о1лкабы карантиныква утIумхьа. Гьа1шде манчиквана мубариза вуккекка вобна. Анджах гьалекийс манчин о1ги быкырда къац1акIванас а1хы деш. Гьелбедти, натийджа манке вухьес, агар инасарше карантинын усулбы гьуваджее ва темизийвалла гьуваадже. Къийна инсанаршин фыкырбы кьо1на хъыхьа водунбы. Сабаранбыше мана фалякат ч1ырваликва-коронавирусыква, ,шенисанбыше дюнйейни экономикайни кризисыква алаакьа гьааъа. Нягьа1д ыхьейид а1хир югда хъален.Манчиле гъайре, инсанарше джурабаджур мани ч1ырвалике къорамишивхьесын а1гьтиятбы къеджи.Зы к1ыл’рананкъа1, зак1ле къайххьыний, о1гийл ненамы хъигъооч1ена ч1ырвалла вухьайнкъа, ч1иебы гьидк1ур, сангарбы гьаы. Доъа1бы хъа1дхъы манчеенче инсанар ,малкъара угъот1ул.Гьайни дёлесийвале ма1гьдын йиссейн а1дат Джина1гъни хивни джамаъа1тын гьаы.Хивын джамаъа1т, кьома хивни имамыква Закир гьа1джийква, администрациейни хаа1рункъука Ы1бадуллагь Гьа1джиевыква, мактабни директорыква Нажмуддин Гьа1джиевыка сангарбы гьик1варас хивни къаршеени ч1ирахьеехъа имааджийс хъигъебч1у. Манбы гьаы таамхьайле хъийгъа, хивын джамаъа1т мани сангарбышеенче угъот1ул. Алгъаа1нкъус-а1лгъаанкъус хивни имамее тютйебы аликкыйн хьян ы1хы. Закир гьаIджее джамаъа1тыс хайир доъа1 гьевхъу, Куръан хъа1бхъы. Гойне садакьа джамаъа1тын саджиге одхьун. Захъад к1орааленчен динни гьа1к1еедын ац1аал’ дешин, не зы дохтур дешорна. Мани а1датыс кьиймат гьевлес. Анджах манчин йишин чубара, йичибы коронавирусыке къорамишавъээ, зы шадхьесда.Ц1а1хбышди хиваршин имамар, агъсаххъалар мани а1датни гьа1к1еедын ма1ълумат «Нур» к1азетни хъа1даххъанбышис гьеле!
