ЙаIхъ гьавъуй, хьян цIыцIауй,  манзик алявъуй,  йыIгъ гивхьуй хаIдын сувааб водун. Ман ишбы гьаIракатыква, темизни йикIеква  къеджени инсанаршини  ооъад Аллагьна раIгьым ва маргьаIмат водунбы.

Аллагье хъобкуни йаIххъыл’ аIл’гьаани джуни къуларшис гьайни дюнйейл’ кьисмат,  баракат гьооли. РаIгьматыххъа абкIынийле хъийгъа, шени гьаммашийни дюнйейл’, дженнетин дарвазабы  ачухаъа.  АIхреени вахтал’ динни сардан хаIдда хайирыкван ишбы къаджу. Йиссейн манзикбы  тезелемишау, цIедынбы аляу. Исламын дин еймишаъан мадрасабы, университетбы ачухау. Инсанаршини улеббишиле перда авкIанавъу. Исламни динна батIраалла ва темизийвалла къавдже. Гьел’бедти, ши йишин раIгматыхъа абкIынийн баба-дидер, деккяр, едяар, динын чубара, йичибы кIеливханаъас вуккан деш. Манбышди рыIгьыле садакьа гьелес ыккан, рыIгьбышис югда ихьесдимее Кьуръан хъаIбхъас вуккан, горханабы абрел’ гьуваджес ыккан.  Рамандина ваз эвчIесс гьихъа ЦIаIхни, ДжинаIгъни хиваршее джамаъаIтын имааджийбы ыхьа.  ЦIаIхее джамаъаIт кьома ЦIаIхни дерайни имамыква Эл’дар гьаIджийквайий хивни имамыква Джалалиддин гьаIджийква саджигее горханабы гьаIсареехъа саъас хъигъебчIу. ШакIле ацIан ЦаIхни хивын някьвбы (горханабы) ёкьни-хьони джиге водунбы, манчихъа гора махъа етыгъын харджий гьаъас ыккан. ЗаIгьмат гьыIсабааъа деш. Мана суваабыс гьыIсабоохьи. Анджах сеткIа , бастурмабы, сим, цемент алищес пыл лезимехьи. Шукур Аллагьылхъа, АIл’гьамдуллаIгь, ман харджийбы джолхъа хивни джегьилерше алеетIу. Гьаарункъвее джуни кьул’пеенчен пыл гьуво.  Динээ эйгьи водун: «..Садакьа са хылека гьеленкъаI, шенсанчикIле къаджес ыккан деш..». Манчина маIъна мана вобна- садакьа дюгленда, дяцIахьес хьинне гьели. Манчихъа гора, ши манбышин добы ойкIан деш. Аллагье джони кисайс барака гивхьена.  Гьалекийс маIгьабна суваабыквана имааджий  «дагъайдни» някьвбышил’ вухьа. Иншеаллагь, ахуйн някьвбыд гьаIсареехъа алеетIуй ниятее водун. ГьамагьаIбна джаб имааджий ДжинаIгъни  хивни джамаъатын, кьома хивни имамыква Закир гьаIджийкв гьавъу. Гьасре манбышин заIгьматбы мебынбышис чечнайс ихьеджин.