Ватаныке аIкьанадын, миллетис делесин «Майя» фабрика

Челябинскни шагьареедын  мебель къеккан « Майя» донан  фабрика Уралылин эн хаIдын водун.  Манчин, чини къеккани малака, мебельни базарее  вааджибна  джига авхъу.  Фабрикайн къуIванан,  утIумын  мебель къекка. Манчиле гъайре утIумни осан истолбы, стулбы, кIраватбы къекка. Къийна фабрике  500-ле агъаллана инсан ишлемишехьи. Манчина директорыр йишда цIаIхийгъалий  Мурадов АIбутIалиб ВаIгьыд’на дих ворна.

Гьайни сенни январьни вуза зы сафарийква Уралыл’ ыхьа. Манке зы цIаIхбы ешемишоохьени , ишлемишоохьени  шагьарбышее – Екатеринбург, Алапаевск, Берёзовский, Челябинске ыхьа.  Къийна цIаIхбышин хаIбба джегьилера  хизанбышиква  мааъаб  ешемишоохьи. АIсас манбы мебеликва маIшкьулоохьи. Манбыше джон хизанбы мааъаб ишлемишивхьайни къазынджиква доланмишааъа. Мебель гаъанбышиле  гъайре мани шагьарбышее шахъаб  хъаIдаххъан телябабы, ишлемишоохьен къуллухчера, дохтурар, ушахбагъчебышин ишчера ва мебын санаъаIткарар вобунбы.Гьайни сенни январьни вуза зы сафарийква Уралыл’ ыхьа. Манке зы цIаIхбы ешемишоохьени , ишлемишоохьени  шагьарбышее – Екатеринбург, Алапаевск, Берёзовский, Челябинске ыхьа.  Къийна цIаIхбышин хаIбба джегьилера  хизанбышиква  мааъаб  ешемишоохьи. АIсас манбы мебеликва маIшкьулоохьи. Манбыше джон хизанбы мааъаб ишлемишивхьайни къазынджиква доланмишааъа. Мебель гаъанбышиле  гъайре мани шагьарбышее шахъаб  хъаIдаххъан телябабы, ишлемишоохьен къуллухчера, дохтурар, ушахбагъчебышин ишчера ва мебын санаъаIткарар вобунбы.Свердловскни вилаетыл’ни  шагьарбышеени мебельный цехбышее ыхьайле хъийгъа ши  ЫIса АIбдуллаевыква  Тезе сенни байрамни йигъбышиле хъийгъа  Челябинскеехъа гьабкIын. Йишда метлеб вухьана джигайл’ мааъаб ишлемишоохьени инсанаршиква горушмишивхьай, манбышин ешайиш къаджей ва манбыше къеккани мебелихъа иляакий. Ши  махъа йыIкьыгьлийс гьибхьыр. Ман байрамбышиле хъийгъа ишилхъа хъигъебчIуйн цIеддыйн йигъый.  Анджах шас фабрикайни директорыква АIбутIалиб Мурадовыка горушмышивхьес кьисматувхьа деш, няъас увгьее мана фабрикайни менеджерыква АIбдулвагьаб ГьаIджиевыка  командировкехъа Къазахстанылхъайий гьабкIын. Ши фабрикее  директорни маIъвыне Ибрагьамхалил Мурадове, менеджер Керам ЫIсаеве, биргадире Рустам ГьаIджиеве ва мебни къуллухчерше къаршламишавъу. Йишди аIдатыква, чейна истякIан илебгъыйле хъийгъа, манбыше шас фабрике экскурсие гьау.  ГьаIкIедад Челябинскеедын  мебель къеккан фабрика  эн хаIдын фабрика вод. Манчихъаб  хьулеблехьее  бинаа воб.  Бинаабышди ад джурабаджур цехбы вод: кьува гядаххан, корпусбы саъан, парче гябаххан, паралон гядаххан, мебель саъан, истолбыйи  устолбы  саъан, ширрамишаъан ва медынбы. ГыргынанкъаIд гьаIшдийн станокбы, техника ишлемишехьи. Гьар цехее ши мааъаб ишлемишоохьени инсанаршиква ешайишни гьаIкIеена гаф гьавъу. Манбышди увгьойка , джо ишиле ва гьелени доннухыле разийба вобунбыва увгьо. Гойне ши манбышди истоловоехъа, къалябакIани гозеершехъа гьабкIын. ГьаIкIедад ишлемишхьесди инсанысын гыргын шарааитбы манбыше яратмишау вод.Фабрике ивийкырыйле хъийгъа, хъабыйнбы офисеехъа. Мааъад йишди суалбышис Ибрагьамхалил Мурадове  джаваббы хъуво.

— Ибрагьамхалил, къийна АIбутIалиб коман­дировке ыхьайхъа гоа, къийна джуни джигее  фабрикайн джуваб гъу хъели. Ши гьаIшде джигайл’ къаджейнчиле ва къайиххыйнчиле разийба вобунбы. Йишин кIазет хъаIдаххъанбышис фабрикайни гьаIкIеедын кIылин маIълумат  гьеле.

— Фабрика «Майя»  2000 сен, эгьес эйхьи, ачмишхьа ва гьаракатыква ишлемишехьи гидгъыл. Манке фабрикайхъад  къийнийн хьиннен имканбы ыхьа деш. Ши тезени джилдайле гибгъыл. ЦIедда ачмишхьайнкъаI , манн кIылин цех ыхьа. Мааъар са-кьоIйре инсан, хаIм-йигъ гозет’ гьидяу, ишлемишоохьи вухьа.  Джига киранеехъаний алеетIу. Манке зы гьиняаъар ыхьа деш. Фабрикайс диб йизди чоджее АIбутIалибее гиххьы. Манкъуни гьунарыка кIылин, уджузын  мебель гьаъан цех хаIдни  ваIш джура гыранын мебель  къеккани фабрикайлхъа садкIыл.  ГьаIшде  фабрика «Майя» мебельни базаре  гьийдни джаргее водун. Фабрикайхъад чин хусусы бинаабы, магазинбы,  салонбы водунбы

.-ГьаIшде  фабрике гьиджо мебельне  къекка ва  ман няане  масса гьели?

-Ши къуIванан мебель ( диванбы, тапджанбы, холлбы), утIумын мебель (истолбы, устулбы, кухнябы, кIараватбы, офисеехъа гийххьен мебель ва медынбы)  къекка.  Манчини гьаарынчихъадыд ваIш джура водун.  Гранынбыб водунбы,  уджизынбыд водунбы. Ши гьар кьат инсанаршин имканбы гозетяъа. Масса гьелес йишин мебель  гыргыни Урсиятылхъа, дёлесни хаариджий оIлкабышилхъа ыккекка. Шахъаб йишин оптовикар вобунбы «Майя» фабрикайн мебель 95 Россиейни шагьарбышее масса гьели хъызахха. Гыргынанкъа шахъад йишин магазинбы, салонбы водунбы.  Манчее шахъаб кеситийвалла дешда, няъас увгьее ши маIгькамын, къулайкан, раIгьат алеетIасын мебель къекка.
— Нимееган инсанарне фабрике ишлемишоохьи ва манбы нени элинбыне вобунбы? 

-Къийна хъабы-ааIмбышиква саджигее, эгьес эйхьи, 500 меегана инсан ишлемишехьи ворна. Манбы гыргынбы ишиква таIъмыравъу вобунбы ва манбышис раIгьатба ишлемишивхьесын гыргын шарааитбы яратмишау водунбы. Сассабы фабрикеенче абкIынле хъийгъа, меб аIвхъуна сабкIыл меб ишлемишивхьес гьиняхъа хъабайли. Ишее, доннухее ши йишин ишчера миллетбышилхъа джурааъа деш. ГьаIракатыква,  къулайква иш гьааъанаи инсанни хатирес хъоотIа деш. Гьалалда къазанмышауйн доннух ши вахтал’  хъелен.Фабрике цIаIхбы, урусар, татарар, узбекар, таджикар ва менни элинбы ишлемишоохьи. Ишее гыргынбы са саягъыл’ ши авхъаахъа, амма ишиле хъийгъа йишин хизанбы сана-санбышаанкъаI мигьманыйвалис ва медни хайир-шейир ишбышее  саджигеехъа гейб сабайли. Медын йишди аIрее гьаллаъан ишбы эхьи. Къийнаб ши гьазирба вобунбы, иш джигабы тIабалаъан йишин джегьилер алебтIас ва манбышис джони ишис сикIыйн доннух гьелес.

Агар сир дешхьее , нимееганне вушди фегьлебыше доннух аляатIа ?

Доннух  гьавъуни ишике аIслыда. Гьар ишихъаб гивхьуна кьиймат вобна. Нимеега хаIбба гьавъэе , доннухыд гьаманимеега хаIдда аляатIа. Манчиле гъайре  ишихъадыд джурабы водунбы — дагъамнайий раIгьатна. Доннухыд манчис сикIы гьели. Доннух фабрикеедын 20 аазырыле   100 аазырылхъамее гьуваган. Фабрикайни къуллухчершин доннухбы къат-къатна гьалед хаIдда водунбы. Мебель садджу гьауйджад дешодун, ман масса гьувойид ши гозетяъа. Нимеега шаке мебель  хаIдда гьелес аIхее, гьаманимеега фегьлебышис гьелен маIъашид хаIдхъехьи.

— ШакIле къайиххьыйн, шу закат хъели, кумаг дареехъа гябкIыйни инсанаршис гьаъа, манзикбышис, ушахаршини, кьаIсинбышди хайбышис  хыл’авхъаахъа…..

— Гъу гьаIхълыра ворна.  Кумаг гьувой  касибыс, чIырынкъус, фагъырыс сувааб водун.  Сенис ши ман ишбы назареехъа аляатIанбы . Гьайняа, Челябинскни шагьареейид, закатбы ши инвалидаршини , кьаIсинбышди хайбышеехъа, манзикбышеехъа хъели; мавлидбы гьаъа.  Даватбы гьаъанкъаI, хайбы илещенкъаI, больницехъа гирхьуйнкъаI, манкед ши кумаг гьелен.Гьар сен ши кумаг «Нур» кIазетни , «Лачин» журнални подпискайс гьели, китаббы чапыке къайиккас кумагаъа. Геледжагъылиб, йишди миллетиква багълыданани ишбышис хыл’ авхъас, ши гьазирба вобунбы.