Августни 27-чил’ 77 ешее гьаммашийни дюнйейлхъа цIаIхбышда агъсаххъал РаIгьымов Надир МагьаIммадна дих аркIын. Аллагьее манкъулхъа раIгьам гьавъу, гунагьбы багъышаъанбы!
РаIгьимов Надир МагьаIммадна дих 1943-ъэсди сенни августни 25-чил’ ЦIаIхни хивее кIалхозчийни хизанее едике ыхьа. 1950 сен ЦIаIхни мактабеехъа хъаIдхъас аркIын. Молидле сыныф мааъад таамаъы. 9-10 сыныфбышее Мишлешни йыIкьнекни мактабее хъаIдхъы. Мишлешин мактаб таамаъы, 1960 сен Дагъыстанни девлет хивни тасарруфатни институтни зоотехник факультетехъа иккечIу. 1962 – ъэсди сенни октябрьни вуза эскерехъа хъортIул. 1965 сенилхъамее манкъвее Ватаныс эскерна къуллух гьавъу. Хааъа кIыл’ни лейтенантни званиейка хъары. Ватаныс бордж хъуво хъарыйле хъийгъа, манкъус хьуленихьее элейс теклиф гиххьы — Германиее офицерна къуллых гьааъас.1969 сен Н. РаIгьымове даватбы гьаъы. Хунащена джус ХыIягъни хивеенче АIгьмадов ГьаIджиаIгьмад дайийна йиш Гул’биче гьайъы. Манбыше саджиге са дих – Расим, хьебыйре йишбы – Бела, Улдуз, Рената чIакIы хъавъу.Ишлемишехьи Надир дайий гьале институтна телебананкъаI джар гиргъыл’. Дарсбышиле хъийгъа мана джурабаджур ташкилатбышее ишлемишхьа. Ишлемишехьи мана 1966 сенни мартыни вузаке «Правда» кIалхозее зоотехникын санаъаIт гьаъа гиргъыл’. Мани къуллухыл’ 1974 сенни октябрьни вузалхъамее ишлемишхьа. 1974 сен ЦIаIхни йыIкьнекни мактабее военрукна ишлемишхьа. 1976 сен илгъечIуна ишлемишхьес хааIрна зоотехникна ЧIародинский МЖС-хъа. Ман ташкилат манке Калмыкиее ыхьа. Махъа Дагъыстанын малкъараний кьыIдимийс кочес айкIан. 1987 сенни августни вуза ЦIаIхни хивеехъа хъары ешемишхьес. Мана «Правда» кIалхозыс садрына сечмишаъы. Манкъвее хьебни сенни аIрее кIалхоз гьихъа аIлгьаани хивни тасарруфат ташкилатбышди джаргеехъа алхъадчы. 1992 сен Надир дайийна хизан МаIгьачкъалеехъа кочмишивхьа. МаIгьачкъалайни Кировни дойил’ни районе налокIбы саъани ташкилатее (инспекцие) ишлемишехьи гиргъыл’. Мааъар ишлемишехьенкъаI, 1997 сен чIаIрани дипломыква институт бизнеса ва управления таамаъу. 2004 сенилхъамее мааъар ишлемишхьа, 60 ешеехъа гьирхьыл’мее, пенсиехъа хъигъечIу.Няаъар ишлемиш ыхьейир, Надир даее вудж югна санаъаIткар хьинне, ыIгьтибарыквана инсан хьинне , хизанна есси хьинне гьагу. «Нур» кIазетни редакциейн, джука ишлемишивхьайни инсанарше, ЦIаIхни хивни джамаъаIтын манкъулхъа раIгьым къухооли. Джига дженнетее вухьена!
