Сентябрьни 15-чил республике Дагъыстанни халкьбышди садибыйвал’ни йигъыс къадсырыйн шадваллабы илгъечIу.

МагьаIчкъалэ мани байрамука багълыданан маджлисбы «Россия – йизын таарых» Таарыхни парке ва Р. Гьамзатовни доюл’ни Милли китабханайни оIгийл’ни майдама ыхьа.Таарыхни музейин байрамыс аидна гееб уфтанна программа гьазиравъу. Манчиле  гьихъа Таарыхни паркни регьбере Тимур Велиханове байрамни таарыхни гьаIкIее ва Дагъыстанни ыIмрее манчина ваджибыйвалла йишонавъу.Мани йигъыл’ мультимедийный комплексни утагъбышин аккабы оIлкайни  таарыхыква марахланмишоохьени мигьманаршини оIгийл’ пылденани экскурсиебышис ачухда ыхьа. Дагъыстанни халкьбышди садибыйвал’ни байрамыс шешитийвалла республикайни артистаршини концертын гьуво.Гьамани джад йигъыл’ байрамука багълыба  Милли китабханайни майдама «Устадаршина Дагъыстан» гьагуй-ярмарка вухьа Махъа. 18-ни муниципалитетбышенче халкьни искусствайни джурбаджурайни сентбышил’ишлемишоохьен эл’чер абы. Гьагуй-ярмаркайн иштыракчер Агъулни, Акушайни, Ботлихни, Буйнакскни, Сулейман-Стални ва медни районбышенчен устадар вухьа. Манбышиле гъайре мааъад МагьаIчкъалайни, Избербашни, Каспийскни шагьарбышенчени иштиракчерше джона устадийвалла гьаагу.Гьагуй-ярмарка ДР-ни маданиятни министрни кумагчее- Республикайни халкьни творчествайни Хаани хааIрынкъве Марита Мугадовае ачмишавъу. МаIнкъе ДР-ни маданиятни министрни Зарема Бутаевайни доюле выставкайни иштыракчершис хошгел’ди гьавъу ва ишил’ угъурбы аIрзау.Выставкайни программайни оIлчее ни мастер-классбы илгъечIу. Мааъад ешли устадаршиква янашеда джон гьунар джегьил’ устадаршед гьагу. Гьагуй-ярмаркайн гыргын иштыракчер дипломбышис , пайбышис лайикьба къавджу.