Умуд гьоолена тренер

Йихъбышда доюкана спортсмен, Азербайджаннайий Туркиейна чемпион, Авропайни кубокбышда иштыракчий, къайсарна дзюдоист Дил’гьам Аlлиевни угъурбышике шас хабар вобна. Къийна мана менни къуллухул’ ворна. Гьаlшде Дил’гьам Туркиейни дзюдойни джаван дестейна тренер ворна. Сабара вахтна гьихъа манкъвее хаlбвалла гьааъана дестейн Тулайни вилаетыл’ джаванаршини аlрайл’ илгъечlуйни  Авропайни кубокее иштыракау. Мани турнире манкъве гьаlзирааъани спортсменарше  югун натийджабы гьагу.

Маскlавни шагьарее Дил’гьа­мыква цlаlхбышди маданиятни автономиейни марказна хааlрна Рафаель Аlлиев, йихъбышда ишкар Фагьруддин Мирзоев горушмишувхьа. Маскlавни шагьарее Дил’гьа­мыква цlаlхбышди маданиятни автономиейни марказна хааlрна Рафаель Аlлиев, йихъбышда ишкар Фагьруддин Мирзоев горушмишувхьа. 
–Дил’гьам, йигъни гьаlрака­тыле, угъурбышиле ши гееб шадба вобунбы. Къийна гъу хаlббананбышикlле югра ацlа деш. Дора йишда гаф танышийваллайке гивгъалас.
— Зы едике Закатала районни Сувагыл’ни хивее 1992-эъсди сен едике ыхьа. Йизди деккин до Бакир, един дойид Улдуз водун. Едике ыхьайни хивее йыlкьнекни мактаб таамау. Спортулхъан аlшкь кlыл’валиле гидгъыл. Дзюдока маlшгъулехьи ёкьудъэсди сыныфейнче гиргъыл. Къийна зы Туркиейл’ ешемишехьи. Мани оlлкайн залхъа джаванаршина милли десте тапшырмишавъу вобна. Манбы джурабаджура чемпионатбышейхъа, турнирбышейхъа, кубокбышейхъа гьаlзирааъа. 
 – Туркиейни милли дестейс хаlбвалла гьааъас нягьаlрне хъары?- Шокlле ацlан, гьихъа зы Азербайджанна спортсменний. Йизди баджарыхыс республикайн югна кьийматный гьоолена. Туркиейхъа зы теклифыква аркlын. Махъа зы цlерра спортсменн хьинне хъортул’. Сабара сенбына мани оlлкайни дестейна уlзву ыхьа. Манбышди дестейква саджигее хаlдданани турнирбышее иштыракау. Ахтыйн джигабы аххъы. Тренерийвалла гьааъана хаlбба вахт дешобна. Манчихъа ил’дяакы, зы гьаlзирааъани дестейн югун натийджабы гьагва. Тулайни вилаетыл’ ши са кlынягъаlйн, са нукlрайн, сайид капширын медалбы алятlу. Маныб писин гьагуйбы дешинбы. 
— Йигъни угъурбышике шас гаф гьееъэ.
— Зы хаlдданани горушбышда иштыракчий ворна. Манчини аlрайл’ кьомана джига чемпионатбышис гьооли. Къийна зы Азербайджаннайий Туркиейна чемпион ворна. Манчиле савагьийда, захъад медын алятlуйн угъурбыд водунбы. Гьалекийс джаванра ворна. Геледжагъыл’ манчиле югун ва ахтын джигабы аххъасын захъад имканбы водунбы. 
— Аlхырейни сенбышее йихъбышди джаванаршини аlрайл’ спортулхъан гьавас хаlд хъыхьа. Гьаlшде шахъаб гъу хьиннен хаlбба доюкан спортсменар вобунбы. Манбышикван алаакьабы гьувадженбыне? 

 — Ман дурустун ихтилет водун. Къийнийни йигъыл’ йихъбышди джаванарше спортулхъан югун гьавас гьагва. Манчин йизын йикl садджу шадаъа. Спортулхъа хъарына инсан, гьаlкlени йаlххъыл’ ворна. Манчике зиян дешин.  Гьаlшде йишди джаванаршини аlрайл’ дюнйейн, авропайн чемпионар вобунбы. Манбышин сиягьый нимее хаlдын ыхьее, миллетын до са гьаманмеега ахтывалее ихьес. Къийна захъад югун алаакьабы Урудж Вализаадайква водунбы. Шокlле ацlан, гьайни делесийвалее манкъве Авропайни чемпионате хьебыдъэсда джига авхъу. Амма манчихъа ил’дяакы, Ромайни шагьарее илгъечlуйни чемпионате мана  цlеррыйна ыхьа. Умуд гьааъана геледжагъыл’ мана олимпиадайнар чемпион ихьес.
— Манкъуни угъурбышиле шинаб шадба вобунбы…
— Сувагыл’ни хивее дзюдойн мактаб ишлемишехьен хаlдда сенбы водунбы. Мани сенбышее мактабын хаlбба спортсменар гьаlзиравъу. Гадебишыква саджиге манбышди аlрайл’ ичериб вобунбы. Гьелбетде, мани карее тренераршина заlгьмат кlеливханааъас вуккан деш. Манбышда гьуlрмат, дараджа ши  гьаммаше ахтывалее гьувааджи. Имкан вухьайнкъаl, манбышика горушмишоохьенбы. Къаджейнчикейий къайиххьыйнчике гаф гьааъа.  
— Туркиейл’ гъу нени миллетна уlзву хьиннене ацlа?

Зы гьаммаше эгьен  зы йихъый ворна. Мысаджад зы йизди миллетын до дюгуляъа деш. Гьамбазарше йизди миллетын до агъмишаъанкъаl, хаlбна дагъамийвалла цlыцlааъа.  Манчихъа гора, зы экlда-экlда манбышис нена миллетна ыхьай текрар гьаъан. Аlрейнче сабара йигъбы илгъечlуйле хъийгъа, манбышике зы нени миллетна ыхьай хъидгlын гьаъан. Сабаранбышис йикlел’ ахван. Хаlббананбыше кlелиханаъан. Мани саягъыл’ зы йишди миллетн до гьуваджес чалышмишехьи.
— Дил’гьам, югна спортсмен ихьесдимее гьиджооне гьаъас лазымда?
— Гьаlракатыка спортука машкъулхьес ыккан. Фыкрее гьаммаше ахтын джигабы аххъый ихьес ыккан. Садджу мягьаlр инсанке гьийд гиххьыйни аlрзубышилхъа гьихьараъас ахаlс. 
— Вахт тlабалавъу шаква горушмишхьайхъа гора, сагъра ихьена. Васый йигъни дестейс геледжагъыл’  угъурбы аlрзаъа.— Сагъул.