Къийна республикайни хаlдданани районбышей йиссейн мактаббы тезелемишаъа водунбы. Гьайни сен мана иш хъаlдхъыйнийий ыlлимни министерствайн ишилхъа адчыйни «Къуlмалийн режим» донани программайка вуккекка вобна.
Рутул районее мани программайква 19 мактаб тезелемишаъа водун. Манбы гьинчиле хаlдда сенбына гьихъа аляуйхъа гора, йиссей хъыхьа. Республикее «100 мактаб» донани проектыка ремонт гьауйни мактаббыд «Къуlмалийн режим» программехъа адчу водунбы. Манке мани проектейхъа Къенни ва Мишлешни хиваршин мактаббы гядкlу.Мишлешни хивни йыlкьнекни мактабее гьайни сен сыныфбы къуlма гьаъасдимее отопление, къулеббы, аккабы бадалауй фыкрее аххъы. Манчиле савагьийда, мактабна чардахыб тезелемишааъасда. Мактабни директорни Ислам Ибрагьимовни увгьойка, гьаlшде мани сардан мактабее гьаракатука ишбы ыккекка водунбы. Усатадар гьагуйни вахталххъассе ишбы таамаъас чалышмишоохьи вобунбы. Мани саягъылин ишбы Сувал’ни магьаlлни менни хиваршейни мактаббышейид ыккекканбы. Муслагъни хивни йыlкьнекни мактабее пlолбы, хъурк’бы, къулеббы, аккабы тезелемишау таамувхьайнбы. Сабара йигъбышиле хъийгъа отопление къайиккас. Манчиле гъайре, мактабни баругбышис сывагъбы ыlхыйхан ишбыд къедженбы. Мактабни директорни Мустафа Магьаlррамовни увгьойка, устадаршихъаб тикинтийни материалыквана кеситийвалла дешда. Манбышис иш явашдевхьесдимее гыргын лазымын материал гьийгъанче гьихъа хъады водун. Къийна мани саягъылин ишбы Джинаlгъни хивни йыlкьнекни мактабейид гьаъа водунбы. Хивын мактаб ишлемишехьен хаlдда сенбы водунбы. Аlхырейни сабара сенбышее мактаб темизда йиссейний хъыхьа. Гьаlшде мааъаб гуджнаква устадар ишлемишоохьи. Манбыше йиссейн пlолбы, къулеббы, аккабы тезенчика бадалаъа. Сыныфбы къуlма адкlвасдимее отоплениебы цlыцlаъа.Цlаlхыйн, Миххьейн, Гыл’мецlын мактаббы тезенчини джаргее водунбы. Добы агъмишауйни мактаббышихъад гьихъаджад отоплениебы ыхьайнбы. Амма манчихъа ил’дяакы, Гыл’мецlни хивни мактабын отопление гьагуйни къайдайл’ ишлемишехьи деш. Кьыlдмина мактабын сыныфбы гьаммаше мыкlада эйхьи. Къийна ремонтын ишбы Рутул районни чlакlни мактаббышей джад деш, дагъайдын сыныфбынани мактабышейид къеджи водунбы. Хьойикни хивын дагъайдын сыныфбынан мактаб джурайни программайква ремонт гьаъа. Гьаlшде мактабна чардах бадалавъу таамувхьана. Устадарше мактабни бинайс сайдинг ыlхыйле хъийгъаl, отопление цlыцlаъас. Муlхаlхни, Аттални, Лекни хиваршейни мактаббышейид магьаlдын ишбы ыккекка водунбы. Рутул районни мактаббышее ыккекани ишбышди алла дурустын маlълумат районни хъаlдхъыйни управлениейни хаlрынкъве Ферман маъаlллиме гьуво.. Манкъуни увгьойка, къийна районни 20 мактабее ремонтын ишбы ыккекка. Манчини аlрайл’ Рутулын 1№ мактаб «100 мактаб» донани проектыка ремонт гьаъа водун. Ман Ахуйн 19 мактаб «Къумалайн режим» программайква тезелемишаъа водунбы. Ишбы ыккейсдимее чlакlни мактаббышди гьаарынчис 3 милйон манат пылна гьуво. Дагъайдын сыныфбынани мактаббышис 580 аазыр манат пылына къавукку. Цlедда мани сиягьейхъа хурун мактаббы гядкlу дешдий. Манчина сабаб республикайни хъаlдхъыйнийий ыlлимни министерствайн 20 ушахыле кlыл’ба сайнани мактаббышис «Къуlмалыйн режим» программехъа адчес гьайсар ыхьа деш. Манбы къырагъыл’ идяхвасдимее, ши манбышике хаlдын хаишау. Садджу манчиле хъийгъа манбыше манбы сиягьейхъа адчы. Гойне хьинне, гьихъа отоплениебынан мактаббыд мани программейхъа гядакlва дешдий. Къийна ши гьамаlгьдын мактаббыд мани программейхъа адчес чалышмишоохьи вобунбы. Мааъадыд шахъад ремонтын ишбы ыккейсын умудбы водунбы. Районни гыргыни мактаббышее тикинтийн ишбы ООО «21 век» донани ташкилатын къеджи водунбы. Манбыше мыкlаал’бы хъалессе гидгъылыйн ишбы быкыраъас чалышмишоохьи.
