Хьойикни хивее манзикий мактаб тезелемишау

Хьойикни хивни джамаъаlтын гьаlракатыка хивын мактабый dва манзик абрелхъа адаччи водунбы. Мани объектбышисын пыл гьокуlматни  къайиккы. Гьаlшде устадарше мыкlал’бы гигъалассе ишбы быкыраъас гьаlракатаъа.

Хивна манзик алявъуна хаlдда сенбы водунбы. Ешлибышди увгьойка, манчин йиссейн таарых водун  Совет гьокуlматни вахтал’  дин гьаъанбышис йаlхъ гьидевойхъа гора, манзик’  утlумавъуна. Гьинчиле сабара сенбына гьихъа джамаъаlтын мана  тезелемишавъуна.  Баругбышис сувагъбы ыхыl, хъуркий полбы тезелемишау, аккабыйий къулеббы бадалау, чардах алябтlу. Манке гыргыда ман ишбы хивни джамаъаlтын кlыл’да-кlыл’да сауйни пылни кумагыква ыккы. Манзикин аккабы аххъыйнбы. Гьайни сен тезедан ремонтын ишбы гидгъыл. Ини элеес инсанаршини фыкреедын аххъыйн ишбы быкыраъасдимее Халкьни Маджлисни депутате Фикрет Раджабовее хаlдын иштыракау.  Манкъве манзик быкырааъасдимее  мана  гьокуlматни программейхъа абчы. Манчис республикайни миллетбышдийий динэгьлибышди ишбышихъа иляакани министерствайн 250 аазыр манат пылна гьуво. Хивни манзикни имам Мустафа Бабаевни увгьойка,  алятlуйни пылыке тезебанба манзикна чардах алябтlу, мураалий гивхьу, инсанарше гиджаlрахий аляатlан джигабышейхъа кафель ыхыl ва сабара медын ишбы ыккы. Къийна хивни манзикена иш быкырувхьана. Гьаlшде сабара хурун ишбы аху водунбы. Манбыд геджвалейхъа гьасарас деш. Манзике ремонтын ишбы ыккейс кумаг Магьаlчкъалейнче гьаркlынни ишкар Айдын Бабаеве гьуво. Манкъуни гьунарыква гыргын ишбы чини вахтал’ быкырауйнбы. Гьелбетде, мани карее хивни джамаъаlтыныд  хаlдын иштирак гьау. Хивын мактабыд йиссейда водун. Гьаlшде мааъадыд ремонтын ишбы ыккека водунбы. Республикайни хъаlдхъыйнийий ыlлимни министерствайн «Теплый режим» донани программайка мактабна чардах бадалавъу. Манчиле савагьийда баругбышис сайдинг ыхыl. Гойне хьиннед, отоплениебы цlыцlаъас. Мани ишбышис гьокуlматын 580 аазыр манат пылна къавукку. Мактабна директор Эфенди Бабаевни увгьойка, гьаlшде мактабее устадар гуджнаба ишлемишоохьи вобунбы. Манбыше чардах бадалавъу таамувхьайнбы, къийна сайдинг ыхыйхаl водун.  Манчиле хъийгъа сыныфбышейхъа отопление цlыцlаъас.Са-кьоlдле кал-ма хивни джаванарше аахъыйни фондни гьаlкlее эйгьес ыккан. Гьайни делесвалей, фондейхъа сауйни пылыке хивни някьвбышин ёкь сура сеткlейхъа адчес. Манчиле савагьийда, хивын йиссейн зиярат абрейхъа адчес. Мани сардан фыкрее аххъыйн ишбы быкыраъасдимее лазымын тикинитийн материал алищы водун. Ман ва сабара медын ишбы юххьанийке гигъалас мыслягьаlт къавджу. Хьойикин джамаъаlт хивее къеджени ишбышиле разийда водун ва югни суралхъани бадалхьайбышиле шадехьенбы. Мани карее джос кумаг гьувойнбышис джамаъаlтын минатдарийвалла агъмишааъа.