Гьайни сен Рутул районни хаlдданани мактаббышее республикайни хъаlдхъыйнийий ыlлимни министерствайн ишилхъа адчыйни «Тепловой режим» донани программайква ремонтбы гьау. Мани ишбышис республикайни хазнейнче чlакlын пылбы къайиккы.

 Гьаlшде мани программайква Джинаlгъни хивни йыlкьнекни мактабейид гуджнада ишбы ал’гьааl водунбы.  Къийнийни йигъылхъассе мактабни адын ишбы таамхьа водунбы. Гыргын йиссейн къулеббы, аккабы, пlолбы, хъурк’бы тезелемишауйнбы. Мактабна бина сайдингыка абрелхъа абаччи. Устадарше гьаlшде гьаlракатыка сыныфбышейхъа отопление цlыцlаъа. Ман ишбыд гьайни йигъбышее таамхьесынбы. Мактабна директор Наджмудин Гьаlджиевни увгьойка, хивын мактаб аляуйн хаlдда сенбы водунбы. Мани сенбышее маlгьдын хаlдын ремонт цlедда водун гьаъа. Ремонтбы адкlынейид, дарсыбы явашау деш, чини къайдайл’дарсыбы ыккыйнбы Ремонтын ишбы  Гьаlджиев Гьаджийнийий Гьыlсейнов Гьаlбибулагьни хаlбвалика къеджи. Манбы гибгъылна иш гьагуйни вахталхъассе быкырааъас чалышмишоохьи вобунбы. Гьаlшде манбышихъад тикинтийни материалбышикена кеситийвалла дешда.  Ишбы саламатда ыккейсдимее, манбыше гьийгъанче гьихъа лазымын тикинтийн материал хъадыйн.Мактабын маъаlллимар, шыгыртар ремонтбышиле гуянмишоохьи.  Гьаlшде манбышихъад къуlмани сыныфбышее къулайква дарсыбы ыккейсын гьар джура имканбы водунбы.   Къийна «Тепловой режим» донани программайква Калелни хивни администрациейни Мухаlхни ва Аттални хиваршени дагъайдни сыныфбышди мактаббышейид ремантын ишбы гьаъа водунбы. Мухаlхни хивее гибгъылна иш таамоохьи вобна. Атталхъа машинена йаlхъ девхьайхъа гора, тикинтийн ишбы ыккекканбыше дагъамийвалла цыцlааъа. Манчихъа ил’дяакы, фыкрее аххъыйн ишбы  манбыше чини вахтал’ быкыраъасынбыва эйгьи. Къийна мани программайква Сувал’ни магьаlлыл’ни Лекни, Хьойикни, Муслагъни, Мишлешни хиваршейни мактаббышее ремонтын къеджи водунбы.