Гыл’мецl Сувал’ни дерайл’на 2300 метруна ахтывале еррашмишивхьана цlаlхбышда хивобна. Манчини аллан цlеддыйн одкlунийбы йишди эрайни сифтийни асырбышиква алаакьада.
Цlаlхни мизес гыл’мецlни лугъадын уфтанийвалла гьооли, ед’ни мизен имканбы хаlдхъаъа. Гыл’мецl гьаргьаммаше игит’, камалукани, кlоран ихтилет гьаъани устадаршина юрд вухьа. Манбышди гьаlракатбышда, ацlаал’бышда, гьунарбышда гаф гыргынанкъаl еймишивхьа. Къийнийни йигъыл’ Урсиятыл’ гыл’мецlалий дешин регион баджагьаlт. Няаъаб вухьейиб манбыше сувахъанийн абырадаб гьуваджес чалышмишоохьи, гьуlрматыле къоъоохьа деш. Амурни вилаетил’ гуд’мишоохьени гыл’мецlбы кlыл’ба дешобунбы. Манбы джурабаджурни пешебышин ийессибы вобунбы. Кьурбанов Кьурбановус Белогорскни шагьарее ешемишхьес кьисматхьа. Манкъве Ватаныле, Гыл’мецlни хивыле, акьаlнаба тезе юрд абчу. Манчихъа ил’дяакы, Гьаlсанна дих Кьурбан ерры джамаъаlтыс сикlыл’ни манзиле делесна, гыранна инсан хъихьа. Гьелбетте, магьаlбна гьуlрмат, ахтывалла манкъве ишбышиква къазанмишавъу. Кь. Кьурбанов Белогорск шагьарни 2№ спортмактабна доюкана тренер ворна. Манкъве джегьилершис «джиуджитсу» японни гьичIобкурийн дарсыбы алгъайгьи. Кьурбан маъаlллиме джуни тренировкабышее гьаlшдийни замаанайн гьихъа алгъааlн технологиебы ишекечирмишаъа, тезе методикабышис фыкыр гьооли. Джиуджитсуйна тренер Кь.Кьурбановни увгьойка, вуджее джегьилер садджу мани гьичlобкурийвал’ни хусусиятбышиква деш танышааъа, аlсас месала манбы ыlмрени хъобкуни йаlххъылхъа гявгьу, гьаlкlен инсанар хъаlбхъавъуй вобна. Манчини аллад, манкъун такьатукан спортсменар гьаlзирааъан заlгьматбы кьаlрад алгьааlс мумкум дешдий. Кьурбан маъаlллимни шыгыртарше джурабаджурни дараджайквани спортни маджлисбышее ахтыйн джигабы аххъаххъа. Манбышди аlрее – Абу-Даби шагьаре илгъечlуйни дюнйейни чемпионате Тигран Меликян нукlрайни медалыс лайикьра къаджы, Маскlав ыхьайниЕвропайни турнире Анжелика Капшиенкое ва Роман Дружинине къизлен медалбы алятlу. Манчиле гъайре Кь.Кьурбанове гьаlзиравъуйни спортсменарше Урсиятыл’ни турнирбышейиб угъадык джона устадыйвалла гьаагвана. Белогорск шагьарни администрациейн манкъуна сагъламни джанакван джегьилер хаlбхъааъана иш таlърыфни, миннатдарийвал’ни грамотабышиква, кьийматукани пайбышиква агъмишааъа. Манкъуни увгьойка, джунимее энки хаlбна пай хошбахтукан инсанар къавджуй вобна. Кьурбан маъаlллим шагьарни мэриейн алгъайгьени хаlдданани маджлисбышда гыранна мигьман ворна. Манкъвейид вуджейид джаванар спортука машкьул вухьайс, саламатна ыlмыр вуккейс къадсырыйн маджлисбы кlыл’да деш тешкиляъа. Кьурбан Кьурбановни джуваббышихъа гора, джуна макьсад сагъни джанакван, маlттыни фыкрекван джегьилер хаlбхъавъуй вобна.
