ГябтIуйн журналистар йикIел’ хъалявъу

Гьар сен, декабрьни 15-чил’, Дагъыстанее гябтIуйни журналистаршис къабсырна маджлис илгъоочIи. Манаб Дагъыстанни таарыхна са кIаарна варакь вобна. АIхреени 30 сенни аIрее  садджу йишди республике 15 агъаллана ачухни джувабыс экIын, хъодкуйн эгьес хъыIдяаIкьанан журналистар гябтIу. Манбыше джона ыIмыр республикайн джамаъаIт къорху дена ешемишхьеджинва, достый душман хъуваацIеджинва геледжагъылхъана умыд вухьеджинва къабсыр. Анджах манбы гябтIуйни ва гябтIас амур гьувойн хаIббанан ваIгьщи инсанар гьаIшдеб дустагъеехъа авхъу дешобунбы.

Гьайни сенийна маджлис Дагъыстанни журналистаршини Союзни мислягьаIтука илгъевчIу. Махъа  гябтIуйни журналистаршин достар, гогьарбы, джока ишлемишивхьайн журналистар  ва сабара министерствабышин, ташкилатбышин  къуллухчера сабы. Маджлис Дагъыстанни журналистаршини Союзни садре АIлий Камалове  вукку. Манкъвее гьар гикIуйни журналистыни гьаIкIее аIтрафлы маIълумат гьуво. Манкъуни увгьойка, журналистар гябтIуйн азгъун инсанар сабарабы авхъу сенбы гьувы дустагъее  вобунбы, сабарабышин силист аIлгьаа водун, сабарабы гьаIшдеб тIабалааъа вобунбы.  АI.Камалове увгьойн:  « Журналистаршин оIлум джо вуккекани ишиква багълыда ыхьа.  Манбышин хъодкуда эйгьен ихтелет’, хаIббананбышди бугъазее илёдзур. Къийна ишин бордж водун  манбышин едигар гьуваджий . Йишди ниятее водун журналистаршини бинаани гьийб манбышис гьаIйкал гивхьуй. Анджах пыл, кумаг, мислягьаIт девхьайхъа гора, мана месала гьаIшдеб гьаIллавъу дешобна». Манкъухъад хъигьна чыхыш  кIазетбышдийий журналбышди бинаани директрое УIмаросман ГьаIджиеве гьаъы: « Гьел’бедти, ши ман йишин гьбамбазар ненкеджаб кIеливханааъас вуккан деш. Ши манбышди гьийб борджее вобунбы.  Сабара сенбына гьихъа хаIбба журналистар гябтIу, яраламишавъу инвалидар гьавъу. Йизди увгьойка , ши манбышди гьаIкIеедын югын китаб къайиккас ыккан. Манче гьар журналистни гьакIеедынI материал, джуна шикыл’ гьевлес лазымда. Хъийгъа мани китабын презентацие мактаббышее, китабханабышее, ненченбыйий ман журналистар мааъад  алгъагьас. Гьасре джегьилершикIле ацахьеджин, нишиле аллайий манбы гябтIу. Хъийгъаб , мана месала гьаIйкални гьаIкIеена меб республикайни тезе регьбераршини гьийб къалхымишааъас вуккан. Шахъаб умуд вобна, мани карее шас хыл’ авхъасда….». Маджлисее чыхышбы гьаъанбыше  джурабаджур мислягьаIтбы къаджы. Манчини аIрее, шагьарбышди кучебышис, мактаббышис  журналистаршин добы гьувой , манбышди хизанбышис кумагбы гьувой ва медынбы.Мана маджлис таамувхьайле хъийгъа, гьамани джаб утагъее кьоIдъэсда маджлис гибгъыл. Гьини маджлисна метлеб едини мизел’ ойкIанни миллетбышди кIазетбышди журналистаршини ишис кьиймат гьувой вухьа.  Мааъад миллетбышди СМИ-ин дагъамийвал’бы ва геледжах ашкарау. Чыхыш гьаъани гыргынкъвее са гIаленче хьинне увгьойн: « Агар едина миз’ шаке гьувааджес даIвхее, ши миллетбы хьинне аахвас деш. ЧIакIни  миллетбышди аIрее ши батмишивхьесынбы…»  Маныд шаке, едини мизел’ ойкIанни журналистаршике, маъаIллимаршике, хизаныке аIслыда водун. Гьел’бедти,  гьоIкуматыныд кумаг гьелес ыккан. Анджах сабаранбышис едина миз’ къуллухылхъа эчIесдимее лазымоохьи. Къийна дагъамна вазият мактаббышее, университетбышее яратмышивхьа вобна.  Едини мизяаршин ва адабиятын санаъаIт аляатIанбы кIыл’ хъувхьа. Манчихъадыд хаIдда багьнабы водунбы. Мактаббышее китаббы едини мизекен ва адабиятыкен еттыгъда дешинбы. Суалбы хаIдда, амма чисын джаваббы хъелена дешда..Маджлисее едини мизел’ ойкIанни миллетни СМИ-ди журналистаршис грамотабы гьуво ва манбы Тезе сенийни журналистаршини маджлисеехъа хъобтIул.