Аlхырейни сенбышее йихъбышин эстрадайн маlънийбы гьаlракатейхъа хъады. Мани карее хаlдын гьунар йишди мизелидын маlънийбы гьаъани артистарше гьагу. Къийна манбышее ши тезе-тезе маlънийбышиква дават-давлатбышее, джурабаджурайни йигъынджагъбышее шадааъанбы. Манбышда сайир доюкана санаъаlткар Гьаlджий Халикьов ворна.
— Гьаlджий, йигъни маlънийбышис йихъбыше гьаммаше ахтына кьиймат гьооли. Манбы йишди халкьыс, манбышди саныхьыйнийий къийнийни йигъыс аваакlыйнбы водунбы.
— Йизди ишис ахтына кьиймат гьувойхъа гора, сагъба вухьенбы. Къийнийни йигъыл’ йизди репертуаре 80 агъаллан маlънийбы водунбы. Манбы гыргыда аlхырейни йицlни сеней одкlун. Маlънийбышин хаlддананбы зы одкlунийбыд водунбы. Манчини аlрайл’ йихъбышди шаираршин одкlунийн джуваббы водунбы. Манбы инсанаршилхъа гьидхьырнимее хаlбна иш вуккейс вуккан. Маlъний угъурукана вухьесдимее, югун оранжировка гьаъас ыккан. Манчис зы пыл хъийкан деш. Хъийгъа летти, сес окlанасдимее, югун студия сечмишаъа. Къийнийни йигъыл’ са маlъний оокlанас 20 000 манат пылна ишлемишааъа. Маныд кlылин пыл дешин. Манчихъа ил’дяакы, зы кьоlни вузале йизди репертуарейхъа са тезе маlъний абаччи.
— Мани карее вас кумаг гьелена ворнане?
-Зы обкlунни мол’цlал’ни маъаlнийна спонсор зы ворна. Захъад мысаджад къырагъыле кумаг ыхьа деш, няъас увгьое манчилхъа умудхьее, гьиччудджад гьаъас ахаlс деш. Гойне хьинне, захъаб спонсорар тlабалааъасда вахтыб дешда. Дагъамийвал’бышихъа ил’дяакы, заке эйхьени къайдайл’ яваш ишлемишехьи ворна. Даватбышейнче ва сабара менни тадбыршейнче садайлени пылбышике тезе маlънийбы ойкlан.
Гьаlджий, дора йихъбышди маданиятни къийнийни вазиятыке гаф гьаъаас…
— Къийна мани сардан йишди халкьыхъаб гееб дагъамна вазият вобна. Йишди миллетын йиссейн аlдатбы аlрейнче адкlын водунбы. Манбы ши чини вахтал’ гьуваджес даlхыйнбы. Шахъад гьаlшде водун кар хиваршее ахуйн клуббы водунбы. Мааъадыд гьичудджад дешин. Тамашебышин кружокбы вая фольклорын дестебы дешинбы хьинне адкlынийнбы. Гьинчиле сабара сенбына гьихъа Магьаlчкъалайни шагьарее тезе фольклоруна дестений савъу. Къийна манбы авху ыхьай закlле ацlа деш. Манбышикед йишин маданият кьелил’ хъаъас даlхыйн. Гьаlшде шахъар ворна са-кьоlйре эстрадайн артистар вобунбы. Гыргыда маданиятыка багълыданан ишбы манбыше ыккекка.
Геледжагъыл’ни пlланбышди гьаlкlее ацlахьес ыкканий?- Захъаб хьейибле тезе маlъний вобна. Гьаlшде манчини ооъар ишлемишехьи ворна. Манбы гьайни сен хъигъечlесын маlънийбыний. Пылыкени кеситийвалилхъа гора, быкыраъас аlхы деш. Тезе сен, умудааъана, быкыраъасынбы. Манбы геед югун ва шадын маlънийбы водунбы. Манчини аlрайл’ едис къабсырна маlънийиб вобна
Гьинчиле сабара вахтна гьихъа тезеба хъигъевчlуна шагьидаршис гьавъуйни маlънийн инсанар гъарыб гьавъу. Мани маlънийлхъа хаlббананбыше интернетей кlыры гьуво.
— Мана Къарабагъни даlвъийе гьабтlыйни йихъбышди гадебышис къабсырна маlъний вухьа. Шакlле ацlан, мани даlвъей йихъбышди гадебышин иштыракыд хаlдын ыхьа. Манбы йикlел’ хъаваляаъасдимее, манбышин добы тарыхейхъа окlанасдимее зы маlгьаlбна маlъний обкlун. Мана маlъний хаlббананбышис кьабыливхьа.
— Гьаlджий, макьале тезе сенни сифтыйни нумрее хъигъевчlес. Вахъад йишин миллет табрик гьаъасын имканбы водунбы. — Аlзизын йихъбышин джамаъаlт! Шу гыргыба тезе 2021-ъэсди сениква табрикааъа! Тезе сенее шос джанана сагъвалла, угъурбы аlрзаъа. Хайбыше болвалла, саламатийвалла вухьена.
— Васыд тезе сен мубаракда ихьен! Фыкрее аххъыйн ишбы быкыраъас къисматхьен.
