. ЦIаIхни дерайлхъа телефон хъабына хил’дже сенбы водунбы. Манчин мааъаб ешемишоохьени инсанаршина ыIмыр нимеехье вахарий хъавъу. Са саъаIтни аIрее манчиква лазымна хабар няхъайий вуккан гьивхьарааъас воохьена. Гьел’бедти, хаIбна заIгьмат мани карее миххьегIалий Кьасумов ШаIъбане Юзбашийни дихее къавджу. Сувал’ни маIгьалылхъа телефонын алаакьа хъадый, манкъуни дойиква багълыда водун. АIхреени вахтал’ гыргыни сувал’ни цIаIхбышди хиваршехъа кабеликван интернет цIыцIаъы водун. Маныд гьаIракат цIаIхийгъалий Алхасов ГьаIджийни духйешин водун.Телефонын алаакьабы тавыл’ гьуваджесдимее, манчис вахтале-вахталхъа хыл’уIвхас вуккан. Дезгагьбы, цIыцIауйн токIан шнурбы, симар, диракбы, вышкайлхъан йаIххъар вахтал’ хъаъас ыккан.Са кьоIдле йигъ водун ЦIаIхни дерайл’ телефоныква юшонавъуй даянмишхьайн. ЦIаIхни администрациейни хааIрункъуни Вагиф АIлиевни увгьойква, йизбы гёгъыйле хъийгъа мыкIаал’бы, хъидгъырийбы ыхьа.  ХыIягъни хивыке алла вышкайлхъа ааIна кабель хъобху вобна. Мыкбышикена ва ыкIейкIна къорху вухьайхъа гора, илхъечIу кабель хъааъасда имкан дешда. СыкIылба гьаваа гьабкьырме, мана иш гьааъасда.  Геджвалилхъа  гьавассарас деш. ТокIан ишихбы воднанкъаI, гьалекийс ватцапеенче юшонааъас воохьенбы.