Дагъыстанни Муфтийни китабын презентацие

Февральни 9-чил’ МаIгьачкъале Доствал’ни  хааъад  Дагъыстанни Муфтийн АIгьмад АIбдулаевни таджикаршини мизелхъа сакIалауйни  «Темизин хасиятбынан динэгьлер»  («Благонравие праведников») китабын презентацие илгъечIу.

Маджлис ачмышааъанкъаI, ДР-ни миллетни сиясатни ва динбышди ишбышди  министерствайс сабара гагьна хаIбвалла гьааъани Энрик Муслимове  увгьойн:- ДР-ни Муфтийн  китаб цIедда, аIрабни мизел’ одкIунийн, 2015-ъэсди сен чапаы. Хъийгъа, аIхреени 6 сенни аIрее ман урусни, аварбышди, къиргизаршини, узбекаршини, къазахаршини мизаршилхъа сакIалау . Къийна ман китаб таджикаршини мизел’ одкIун водун.  Таджикаршини мизелхъа китаб сакIалаъасда мислягьаIт  ДР-ни Миннацын Тадлжикаршини мусурманни уммайни хааишбышиква къавдже….Манкъуни чыхышле хъийгъа, Таджикстангъанчени гьаIфизее йикIеке Кьуръан хъаIбхъы.ДР-ни Муфтийни АIгьмад эфендийни дойиле маджлисе  Дагъыстанни муфтиятни садрее Шамил’ Алиханове чыхыш гьау. Манкъуни увгьойква , мани китабыква ушахаршис хъодкуйн тербие гьелес ва динылхъана раIгьым гьаIракатеехъа хъаваляаъас аIхасысынбы. Гойне, «Темизин хасиятбынан динэгьлер» китаб  нягьаIдый таджикаршини мизелхъа  сакIалау, редакторе МуIгьаммад-Фаругь АIзимове марахукан чыхыш гьаы. Гойне чыхышбы Дагъыстанни язычершини Союзни садрее М. АIгьмадове, «Имам Шамил’ни» фондыни президенте А. Харчаеве, аали мактаббышиди ааIлимарше ва джамаъаIтни эл’черше гьаы.Мани маджлисе ДР-ни Муфтиятни гьакIеедын видеороликбы гьагу. Дагъыстанни девлет университетни ва Дагъыстанни гуманитарный институтни телябабыше урусни ва таджикаршини мизел’ шечIбы хъаIдхъы ва нашидбы  гьекIу.