«Нур» — йишди миллетин кIазет

Дюнйейл’ хаIдда санаъаIтбы водунбы. Манчини гьаарынчихъаб чина йаIхъ  ва чина лазымийвалла вобна. СанаъаIт хъодкуда гьаъас аIхий хаIдын гьунар водун. Дагъамни санаъаIтбышди джаргеаъад журналистын санаъаIт водун.

 Сабара сенбына гьихъа садджу йишди республике джаб хаIбба доюкан журналистар гябт1у. Манчина сабабыб вухьана хъодкуйн джуваб увгьой ва джамаъаIтын тераф аххъый. Къийна ман саъаIъат гьаъани инсаныхъад хаIдда гьаIллаъасын суалбы водунбы. Ши, «НУР» кIазетын ишчера, чалышмишоохьенбы шаке аIхани къайдайл’ йишди миллетни гьаIкIеедын маIълумат гьелес, манбышин сес республикайни, гьоIкуматни регьбераршилхъа гьихьараъас; ши чалышмишивхьайнбы йишди халкьыни аIре ыхьайни югни ва писди гьаIдисабышди гьаIкIеена хабар хъобкуба шолхъа гьивхьарааъас; ши чалышмишивхьайнбы йишди халкьын аIдатбы, адабият, миз, маданият саламатда гьивааджес; ши чалышмишивхьайнбы Дагъыстанейий Азарбайджан ешемишоохьени цIаIхбышин алакьабы маIгькамаъас. Йишди ишис кьиймат садджу шоке гьевлес  вааIхас,    няъас увгьее йишда иш шокIле къоодже вобна. Анджах сабара вахтал’ йишди кIазетни гьаIкIее лазымдешин ихтелет’бы, гафбы гьаъа. КIазетис кьиймат манчин  акьва къидеджуйни инсанарше  гьооли. Гьел’бедти,   шахъадыд саIгьвбы эйхьенбы. Вахтал гыргыни джигеехъа вуIххъас усылоохьи деш. Сабара инсанаршис, ишбышис хъобкуна кьиймат гьевлес вааIха деш. ГьуIрматыс лайикьын инсанар, фагьам гьидёву «аIхъээ» аахва. Халкьыс кIапIекIын хайир гьидёвойн инсанар акьвалхъа хъигъеебачIи. Манбышди гьаIкIее кIоран макьаалабы ойкIан . Шу шакIле йишин нукьсанбы эгьес ыккан, шакасана гаф джигайл’, ваяхуд редакцеехъа абы гьааъас вуккан. Манке ши хъобкуни мислягьаIтеехъа хъавалесынбы. Интернетеехъа иккебчIу , мерункъуни дойиле грамматик саIгьвбышикван «аIкIел’» гьоолен хабарбы окIанас ыккан деш. Йишди кIазетын варакьбы ойкIанни инсаныс ачухда водунбы. Ман зы джегьилершикIле эйгье. Агар ши сана-санкъус хыл’ авхъее, манке йишин кIазет гьалед юг хъихьес. «НУР» шавунджад деш, ман йишди цIаIхбышин (йихъбышин) кIазет водун. Манчихъа гора, манчина гьуIрмат гьуваадже. Агар гьуIрмат гьидвааджихьее, миллетни меега чалышмишоохьени инсанаршин гьавас гьакьвар гьимаъа. Хааишаъа гимгабышее, майданбышее, маджлисбышее лазым дешин ихтелет’бы йишон гьимаъа!  Гыргыни цIаIхбышис Аллагье  югун ешайиш гьелен.  Аамин!