Аlхырейни сенбышее дюнйейл’ гееб дагъамна вазият яранмишувхьа. Гуджнаква еймишоохьени пандемиейн гьокуlматбышис диндж гьели деш. Коронавирусни азарыке гьар йигъыс хаlбба инсанар гьабатlа. Манчин оlги алятlасдимее, гыргынанкъаl гуджнада профилактикайн ишбы ыккекка, инсанаршис вейбар ыхыйхаl.
Къийнийни йигъыл’ вакцинабы сабара оlлкабышее гьаlзирааъа водунбы. Россиейд’ инсанаршина сагъламийвалла гьуваджени ташкилатбышед мани сардан хаlбна иш вуккекка вобна. Хусулсан,цlебба коронавирусыке дарман гьаlзиравъу. Гьаlшде Россиейл’ инсанаршис вакцина гьаъасдиме хьебыдле джурабаджурайн дарманбы къекка водунбы. Манбы — Гам-Ковид-Вак, ЭпиВак-корона, Кави-Вак водунбы. Россиейл’ гьаlзираъани вакцинабышис хаlдданани гьокуlматбыше ахтына кьиймат гьооли. Дарман гьаlзиравъуйни институтбышдыйий лабораториебышди вукlлелинбышди увгьойка, манчин инсананаршин джан тавул’ гьуваджи. Гыргыда манбы ёхламабы илгъечlуйн вейбар водонбы. Манчихъа гора, вакцинайле хъаваlкьанас вуккан деш. Манчин инсанни джанейхъа инфекцие гьидяасарасдимее иммунитет хаlдхъаъа. Гьаlшде мани сардан Россиейни хаlдданани джигабышее вакцинайна кампание гьаlракате вобна. Амма сабара регионбыше мани сардан саймазыйвалла гьааъа. Инсанарше вакцина гьааъас телесмишоохьи деш. Мани ишил’ къийна дагъамна вазият Къузайл’ни Кавказни регионбышее яранмишувхьа. Манбышди джаргее Дагъыстаныд водун.Республикайни сагъламийвалла гьуваджени ташкилатбышди гьувойни маlълуматхъа гора, хаlббананбыше вакцинайс разивалла гьооли деш. Манбыше гьаlкь-нагьаlкьни ихтилетбышис кlыры гьуво, вакцина гьааъас телесмишоохьи деш. Аlхырейни вахтал’ вакцинайка багълыба инсанаршини гlалейнче шакlлед хаlдда джурабаджура ихтилетбы къийхьи. Манбыше ацlа –дяцlа лазымындешин фитнабы еймишаъа. Маlъна дешин ихтилетбы гьаъанбышди аlрайл’ кьуллухчериб растына хъавайленбы. Манбыше инсанаршис кумаг гьаъасди джигее, пузгъунийвалла абаччи. Манчихъа горад, геллесда вакцина гьааъас гьаlзирувхьайнбы, фыкыр бадалаъана. . Манчихъа ил’дяакы, марказыле акьаlнани районбышее мана иш къулайлхъа абчына. Масалан, Рутул районее къийнийни йигъылхъассе 500 инсане вакцина гьавъу. Районни больницайни хааlрынкъуни Султlан Абеевни увгьойка, районейхъа 700 доза вакцина хъабы. Манчике суранчиле хаlддананбы ыхыlйнбы. Къийна районе вакцинабы гьаъасдимее хьебыдле дохтураршина десте ишлемишоохьи. Манбышда са Рутул, кьоlбъэсда Цlаlхее. хьебыдъэсдаб Мишлешее еррашмишувхьа. С. Абеевни джуваббышихъа гора, цlедда вакцинацие гьокуlматни ишил’ ишлемишоохьенбышис, дохтураршис, маъаlллимаршис гьааъа. Манбышиле гъайре, инсанаршини аlрайл’ джони хайишиква вейбар ыхыйхаlнбыб кlылба дешинбы. Манбышикlле ацlан, короновирусыкан зарафат ыккан деш. Шаца мани чlырывалике хиваршее гьабтlыйнбыб вухьайнбы. Геледжагъыл’ маlгьдын гьадисабы дехьесдимее, манбыше вакцина гьааъас гьаlзирба вобунбы. Къийнийни йигъылхъасее Сувал’ни Магьаlлыл’ ващелхъа авабкьырни инсане вакцина гьавъу. Манбышди аlрайл’ мактаббын директорара, маъаlллимар, менни ишбышил’ ишлемишоохьенбы вобунбы. Республикее кьодле этапна вакцина гьавъуйнбышди аlрайл’ цlеббыйнбы «Нур» кlазетын ишчер вухьа. Манбышда сайир, кlазетна джавабдар катиб Камил’ Шамхалов ворна. «Вакцина гьавъуй шаваджар зы маджбыр гьау деш. Къийна республикее мани сардан яранмишувхьана вазият закlле югба ваацlа. Хьебыдле милйон аlгьалийнани Дагъыстане са сенни аlрайл’ 1500 авабкьырийн инсанар гьабтlы. Начахувхьайнбышин сай къат-къатна хаlдда водун. Мани азарыке садджу вакцинациейн къорамишаъас. Вакцина гьавъуйна сабаб гьам зы, гьамыб йизын дёлесинбы коронавирусыке гьувааджый вобна». Коронавирусыке чlыры хъидехьесдимее , зынаб манчина вакцина гьавъуна. Закlле ацlан, мана илгъоочlена чlырывалла вобна. Шавукlледжад ацlа деш, мана азар ненче хъавалес ва шавуке илгъебчlес вухьай. Манчихъа гора, зы аlгьтият къавджена. Вакцина гьавъуйле, пашманийвалла цlыцlаъа деш. Къийна коронавирусни пандемиейн инсанаршис хаlдын зиян гьели. Манчикена гичl гьалекийс аlрейнче абкlын дешда. Йишда сагъламийвалла садджу ши чини вахтал’ гьавъуйни вакцинайке аlсылыба. Дора мани карее саймазыйвалла гьидяаъас. Геджвалейххъа гьидябсыр, вакцина гьааъас. Къийнийни йизды макьале зы ненаджар вакцина гьааъас маджбыраъа деш. Гьарункъукlле джуна иш югба ваацlа. Гыргына сагъра ихьена. Чlырынбы девхьенбы.
