Гьайни йигъбышее республикайни малкъара гьувааджени тасарруфатбы ейлагъбышейхъа кочес хъигъебчlы. Къийна манбыше джохъад водун дамазлыгъбы кlылда – кlылда сувалхъа хъыккекка водунбы. Кочейхъа хъигъебчlыйнбышди аlрее Рутул районын маладарарыб вобунбы.
Районни хивни тасарруфатни управлениейн гьувойни маlълуматхъа гора, гьайни сен ейлагъейхъа хаlдда малкъара хъалес. Тасарруфатбышее давараршиква саджигее, чаврабыйий балканарыд ейлагъбышейхъа хъыккейсынбы. Къийнийни йигъылхъассе районни геллесди СПК-быше, хусулсу фермерарше дамазлыгъбы сувалхъа алхъау водунбы. Авхуйнбыбы йаlххъа вобунбы. Сабара йигъбышиле манбыб ейлагъбышейхъа савалесынбы. Гьайни сен сувалхъа цlедда кlуссурбышиний калел’бышин хусулсу чавра гьуваджен фермерар хъабы. Гьиххъа ейлагъбышейхъа чавра хъадайлен дешдий. Къийна республикайни хивни тасарруфатын манбы кочаъас маджбураъанбы. Манчина сабаб къышлагъбышее водун оlрышбы гьувааджий, манчис истирагьат гьувой водун. Малдарарше чаврабышика санад гуджнада даварарыд ейлагъбышейхъа хъыккека водунбы. Гьар сенийдын хьинне, гьайни сеныд сувалхъа цlедда СПК «Ленинин» даварар хъады. Тасарруфатна хааlрна Исакь Балаеве увгьойн: «Гьайни сенийн давараршин коч писда ыхьа деш. Ейлагъбышейхъа кьоlд аазырыле гьеххана давар хъувккы вобна. Манбы гыргыда саламатда джигайлхъа гьидкыр. Сабара йигъбынана манбы ямаджбышее ихьес. Гойне хьинне, манбы бинайлхъа хъыккейс».Муслагъбышихъаб шаца хусулсу даварар гьуваджена йихьыбле биргаданий. Гьайни сен манчина са камувхьана. КФХ «Бугъанда» тассурауфатын кьыlдим дагъамда хъадыйхъа гора, джон дамазлыгъ масса гьевлес гибхьы. Ахуйни хьони КФХ-ке санчин сувалхъа кочау. Манаб КФХ «Къузай» водуна. КФХ «Огонь» Чечнайл’ авху. КФХ «Ходжа» Ставрополни оlрышбыше ерлешмишувхьа. СПК «Сверлдловна» садры Магьтимагьаlммад Ферзаlлиевни увгьойква, сениле-сенилхъа дамазлыгъбы гьувааджий дагъам хъехье водун. Шаца тасарруфатбышис геедни дагъамийваликва къышлагъбы авайкы. Гойне хьинне малкъара гьувадженбышис кыlдмийни мыкlал’быше гуджнан зиян гьуво. Хаlдда малкъара чlыривалике гьатlу. Манчиле гъайре, гьатlыйни малкъарайкен нениджад КФХ-н компенсация алетlу деш». Къийна малкъара гьувадженбышис гьокуlматни суракен алава кумаг ыккан. Манбы джохъад водни дагъамийвалика текба гьавасрас вуккан деш. Саджу мани саягъыл’ дамазлыгъбышин сай хаlдхъаъас ахаlс. Дешхьэе, хусулсу фермерарше дамазлыгъбы масса гьелесынбы. СПК «Восток-2» донан джинсен даварар гьуваджен тасарруфат республике югунбышди джаргейний. Манбыше гьар сен Россиейни регионбышее алгъаъани давараршини гьагуйбышей иштиракный гьаъан. Къийна районын маlгьдын доюкан тасарруфат гьуваджес аlхыl деш. Кьырагъыле кумаг дехьайхъа гора, маныд дагъадмишхьайн.Гьайни сенийн кьыlдим гыл’мецlбышди малкъара гьуваджени тасарруфатбышисыд дагъамын хъады. Манбышди малдарарше кьыlдим Магьаlрамкентни районее алгъавгьу. Оlришбышихъад гьеххалика малкъарайсын алаф ыхьа деш. Манбыше кыlдим гьадкlын гьаlйванар емыл’ гьуваджы. СПК-на садры Имам Ширинов пешекараршика саджигее, мани сардан яранмишувхьайни дагъамийвалике, кьыlдмийке хъигъечlес ахыlна. Къийна манкъун дамазлыгъ ейлагъбышейхъа гьийхьар водун. -«Йишин къышлагъбы делес ихьейид, даварар сувалхъа машинбышика хъыккекка водунбы. Манбы сувалхъа алхъаъассе гьиххъа, лазымын профилактик ишбы ыккы водунбы. Гьаваабы югда хъадее сабара йигъбышике бинайлхъа гьивхьарасынбы».Къийна гьинчиле сабара сенбына гьихъа кьаlрад ахуйни сувабышис ейлагъбышейхъа хъадыйни малкlарайн уфтанийвалла гьооли. Ахтыйни сувабышди гьар сурал’ гьегани гейбышди сесен инсанын йикl шадааъа. Сувалхъа кочейхъа хъабыйнбышда иш угъатыка вухьена!
