Гьайни гьорани дюнйейле гьаIкIени дюнйелхъа Аллагье югун инсанар джусахъа зараба алябатIа. Манбы гьаIкIен джуваббы водунбы. Манкъун аркIыний йишди халкьыни меега йыIкьын зиян водун. МаIгьбын билигыкван, ацIааликван , джаIмаъаIтыс хайир гьелен инсанар гьайни дюнйелхъа сейракба абайли ва бирданхьессе авайкIан. Ненайий манкъуква танышра ыхьа, гыргынкъус мана хъийккынна.
Айваз ПирмаIгьаммадов 1965 сенни августни 24-чил ЦIаIхийни хивее маIъаллимни хизане едике ыхьа. Мактабейхъа едике ыхьайни хивее аркIын. Хъийгъа, хизан Къах районни Агъйезийни хивейхъа кочмишивхьайхъа гора, манкъве джун хъаIдхъый маани йыIкьнекни мактабе давамау. МаIъаллимни духайхъад писда хъаIдхъасын ихтияр дешдий. Манчини аллар, Айваз гьаммаше югда хъаIдаххъанбышди джаргэй ихьес чалышмышхьа. Манкъухъад математика, физика ва менни предметбышикен югун ацIаал'бы ыхьа. Ман гьунарбы деккиква, Мавлиддин маIъаллимыква, алакьада ыхьа. Няъас увгьее манкъве математикайн дарсбыний гьеленбы.
Мактаб аIълада быкырау, Айваз ПирмаIгьаммадов Азербайджанни халкьни тасарруфатни институтейхъа иккечIу. ХХ асырни 80-ъэсди сенбышее маIгьадни доюквани аали мактабейхъа манатдена иккечIуй, хаIбна хошбахтыйвалланий. Мани вахтал' мааъад хъаIдхъас ыккананкъве 30-35 аазыр манат гьазирааъасний вуккан. Мааъад кьаIрадни джибаква, амма гяцIыйни вукIлеква тека-сейрак инсанейний хъаIдаххъан. Манбышда сайир кIыл'ни миллетна камалукана дих Айваз ыхьа.
Телябанани вахталийдын Баквеедын сенбы манкъве угъадука алгъавгьу. Няъас увгьее мана чалышмышхьана гьам югда хъаIдхъас, гьамыд аали мактабни ыIмрее гьаракатукан иштырак гьаъас.
Институт таамаийле хъийгъа, джегьил' саIнаъаткар бугъалтер-экономистни къуллухыл' Агъйезийни тIымыл'ни савхозе геедни гьавасука ишлемишехьи гиргъыл. Гьаммаше адалатыйвалла гозетяаъас вуккан вухьай, нягьаIкьни ишбышилхъа йаIхъ гьидевлес вуккан вухьай, напс темиз'да аххъас лазымда ыхьай манкъукIле хизане деккике, едике зарада-зарада къийхьенбыний. Манчини аллад, А. ПирмаIгьамадов чалышмышхьана ман наIсигьатбы тезе ишни джигайл' ишекечирмишаъас. Анджах гьинкъун гьаракатбы хаIдда сенбына ишлемишоохьени къуллухчершис кьабыл' дехьайнбы. Няъас увгьее гьини ташкилате чин къайда-кьаанунбы ыхьа.
Сабара гагьна мааъар ишлемишхьайле хъийгъа, ПирмаIгьаммадов Айваз Мавлиддинна дих Ватанылхъа саркIыл. МаIгьачкъалэй ишилхъа дюзел'мишхьа. 1989 сен манкъве хизан къурмишавъу, джуни ыIмырена ёлдаш калел'бышда Анварна йиш Гул'бениз йихьа. Манбыше кьоIйре духба - Самирый ГьаIджимаIгьаммад ва йиш Рейгьан чIакIы хъавъу, манбышис хъаIдхъыйбы гьуво. Самирый Рейгьан эвлемишавъуйнбы. Манбышихъа джон ушахар вобунбы. Амма джуни хылен кIыл'на дих эвлемишаъас манкъус кьисмат дехьайн.
Айваз ПирмаIгьаммадов Дагъыстан Республикайни гьуIкумни идаарабышее, министерствабышейий ведомствабышее ахтыйни къуллухбышил' ишлемишхьа. Няаъар ишлемиш ыхьейир, манкъве ишни гьамбазаршини аIрее хаIбна гьуIрмат къазанмишавъу. Джуни сагъвале аали мактаббышин экономикайн факультет таамаийни хаIббанани джегьил' саIнаъаткараршис кьийматукан мыIслягьатбы гьуво. ГьаIшде манбышин геллесынбы гьуIрматукан къуллухчер вобунбы.
Югни, писди йигъбышил' мана джуни миллетыква саджигэй ыхьа. Манкъве йишди кIазетисыд аIхан кумаг гьаъанний. А. ПирмаIгьаммадовни фыкрее хаIдда гьаъасын ишбы ыхьа, анджах аIджалын маджал гьуво деш. Мавлиддинна дих Айвазе джуни заIгьматбышиква, гьунарбышиква ыIмрее ачухна гов гьабсыр.
«Нур» кIазетни редакциейн, цIаIхни халкьыни джаIмаъатын раIгьматтыгъни хизаныс, гогьарбышис, дёлесынбышис башсагълыгъийвалла гьооли ва манкъуна джига дженнете хъааъанава эйгьи. ЙикI'бышис сабырбы гьеленбы.