Мишлешна хив къийна ЦIаIхни дерайл’ эн хаIбна вобна ва манчихъад хаIдын таарых водон. Ман таарых ацIахьай ва далыйле хъооIни тайфабышис хъувой гыргынкъун бордж водон.
Мани хивун хаIдын таарых ХаIбна Ватанна даIвъийни девурел ыхьа, няъас увгьее. мани вахтал’ ватан душманыке къорамиш гьааъас 80 хаIрра джаван даIвъэйхъа аркIын, амма джон хаIббананбы аIвхъуна сабкIыл деш. Мани вахтыйн уцIурбы гьаIшдед йикIелидхын деш.
Манчихъа гора, гьайни сен Рутулни хивей районенче даIвъийехъа гьабкIынинбышис къабсырна гьаIйкал ачмиш гьавъу, амма мани гьаIйкалей гыргыда йишин хивар ыхьа деш ва гыргыни йишди давIъэйхъа гьабкIынни инсанаршин добы ыхьа деш. Манчихъа гора йишди гьар хивей махуIдын гьаIйкалбы гиххьесва хиваршин чIакIынбы къарарейхъа xъабы.
Мишлешни хивеe ветеранаршис къабсырна гьаIйкал вухьана, амма мани хивни хаIрынкъве Рамазан Къубалыеве мана тезелемиш гьааъас фыкырейхъа алябтIу ва мана джуни джувабыл ахуна. Хивни кIыл’ни бюджетенче пыл къайиккы, манкъве гьаIйкал алявъу ва махъа гыргыни даIвъэйхъа гьабкIынни хивни инсанаршин добы адчуйнбы.
Мана гейб Мишлешни хивнимей джаб деш, йишди миллетнимейгаб гейб хаIбна иш вобна. Умуд вобна, мани гьаIйкалын ачмишувхьай уфтанда илгъечIес ва махъа мани ветеранаршин духйебы ва невабы аблес.
Заc гьаман эгьес ыккан, къийна Мишлеше хив уфтан хъивхьесдимей хаIдын ишбы къеджи водонбы. Мани хивей кулыбын ремонт таамухьайн, гимга уфтан хъивхьана, кучебы абырейхъа хъадыйнбы ва чис хивни, йишди миллетни доюкани инсанаршин добы гьуво водонбы. Мани ишбышин 90% хивни администрациейни сурале къаджу.
Ши кIазетни оIтмишхьайни номрабышей хивни манзикни ва гимгайни гьийдын джига тезелемиш гьауйни Агъаширин Мамедовни ва МагьаIрам Рамазановни гьаIкIей одкIун ыхьа. МаIхубни игитершикIле сагъулва эгьес ыккан ва гьассыре манбыхьинненбы мишлешбышихъаб ва йишди миллетыхъаб хаIбба вухьеджен.
Сайид гьаман къейд гьаъас ыккан, хивей къеджени ишбышей гейбна заIгьмат устадаршина вобна. Джони хылеббышис кьувват гьевлена ва маIхудын ишбы гейд къаджес джос кьисмат ихьенбы.
Мишлешни хивна хаIрна Рамазан Къубалыевни увгьойка, хивей сабара ишбы гьуIкматни программабышди кумагыка къаджес назарей алятIу водонбы. Мани пIланыхъа гора хивейхъа хьинена хатI тезелемиш гьавъуй, кучебышейхъа ишыгъ цIыцIауй, парк гьауй (джааъад ушахаршин майдан, спорткомплекс, ва динж алятIан джига). Манчин документбы гьазир гьау республикайни экономикайни Министерствейхъа хъуво водонбыва,- манкъве увгьо. Умуд гьааъана, ман ишбыд ихьесынбы.
Ши Мишлешни хивни хаIрынкъус Рамазан чоджийс ва мани хивни джаIмаъатыс югун угъурбы аIрзуламыш гьаъа.
