Аттални хивее ешемишехьена Гьаlсилов Мавлидине операторийвалла гьааъа гиргъыл’на хаlдда сенбы дешинбы. Мани сенбышее манкъве саламатна видеотека савъу. Манкъве йишди халкьыка багълыда цlыцlауйни сюжетбыше, хурни роликlбыше, кинобыше ютубни сайфабышее гьеххааликан иляакыйнбы саъа водунбы. Гьаlшдер мана гьаlракатыка ишлемишехьи ворна.
-Мавлидин, гъу цlыцlауйни видеоматериалбышихъа иляаканбышин йикl шадаъа. Уфтанни сувабышихъа, аlрагбышихъа, дамабышихъа иляккыйле инсан иляккас ыккан.
-Йизди ишис ахтына кьиймат гьувойхъа гора, сагъба вухьенбы. Гьаlкlедад, уфтанын видеоматериал цlыцlауй йиздимейид хаlбна хошбахтийвалла вобна. Йишди табиятна уфтанийвалла интернетни куманыква дюнйейни гьар суралхъа гьивхьаравъуй, йизда мурад вухьа. Къийна манчини сайфабышее хаlдда йишди батlрайни табиятыка багълыданан видеоматериалбы гьеххалика гьуво водунбы. Мааъад йизди видеобышика саджигее медни авторарше цlыцlауйн материалбыд растына хъадайленбы. Мани карее манбышда заlгьматыб кlылба дешда. Зы чалышмишхьесда геледжагъылид йишди табиятыс, аlдатбышис, инсанаршис къадсырыйн медын джурабаджура видеоматериалбы ютубейхъа гиххьес. Манчика саджигее йишди халкьына дараджа ахты хъаъас.
-Операторийвалла гьавъуй сибыкна иш дешда. Мани санаъаlтылхъа гъу наlгьарне гирхьу?
-Цlеррийна цlаlхбышда оператор Магьаlчкъалайни шагьарее даватбы давлатбы цlыцlаъана йишди Аттални хивейнчена Ыlсаев Магьаlммад ыхьа. Джамаъаlтыкlле мана гьамыр «Подгорный» хьинне ацlа ыхьа. Мана экlра-экlра даватбы цlыцlаъас йишди бинабышилхъар арайленаний. Манке зы кlыл’на гадений. Мани вахтал видеокамерабы тека’сейракни инсанаршихъадний. Магьаlммад хивейхъа арыйнкъаl, хивын ушахар манкъусхъаний сабайленбы. Шакlлеб манке цlеббаний видеокамера къавджу. Эле гьамани вахтале захъад мани санаъаlтылхъан гьавас гидгъыл. Аlрейнче сабара сенбы адкlынийле хъийгъа, йизди деккей видеокамера илившу. Манквъе хил’дже сенбына хивына оператор ыхьа. Гойне хьинне, декке зынар аlрабирра кумагыс аляратlа ыхьа. Хъийгъа, зы темизра мани санаъатылхъа илгъечlу. 2007-ъэсди сениле мани санаъаlтна ийесси ворна.
— Шакlле ацlан, гъу садджу табиятджад деш, даватбыд цlыlцаъанбы. Мани сардан гьиджоо эгьес ахаlйий?
— Маныд зы гьаъан. Гьар сен 45-50 даватбы цlыцlаъасын заказбы эйхьи. Аlхырейни сенбышее зы экlра-экlра Ставрополни, Краснодарни, Ростовни, Маскlавни шагьарбышейхъар хъойтlална. Залхъа хаlдда заказбы сувал’ни хиваршейнче хъадайли. Уlлджумбына сувал’ даватбы цlыцlаъа ахвана вахтыб воохьена. Манке аlра авайкы, йишди сувабышилидын уфтанын табият цlыцlаъа, чlакlни хиварше ишлемишехьени музейбышейхъа гьайкlан, марахукван карбы видеоейхъа алятlа. Къийна захъад мани сардан савъуна хаlбна видеотека вобна. Манбы уфтанда гьувадженбы. Манбы мысаджад гьаккалаъа деш. Таарыхын материал хьинне гьуваджен.
— Къийнийни йигъылъ, эгьес эйхьи, гыргына оператор ворна. Гыргынкъуке телефонбышика цlыцlаъас ахаlн…
— (Ахъаlна гьаъа). Йигъни ихтилетиде зынар разийра ворна. Цlыlцаъас гыргынкъве цlыцlаъан, амма къулай денани ишихъаб мысаджаб кьиймат воохьена деш. Югун сюжетбы садджу санаъаlткарыкlле цlыцlаъас ахаl. Гойне хьинне, телефоннийий камерайни аlрайл’ хаlдын тафавут водун. Видеокамерайн шикlыл’бы темизда, айдында гьагва.
-Йигъни хизанее кьоlйре дих чlакlы хъоохьи. Манбышди аlрайл’ йигъни санаъаlтылхъа гьавас гьагвана ворнане?
— Манбы гьалакийс хуруба вобунбы. Манчихъа ил’дяакы, манбышди кьоlйирсана видеокамерайлхъа гьавасыканбы вобунбы. Чlакlы хъувхьайнкъаl манбышин гьавас йизди санаъаlтылхъа ахвас-идяхас ыхьай ацlа деш. Манбыше йизын санаъаlт сечмишауей, заке манбышин ыlхас ахаlс деш.
-Мавлидин, вахт тlабалавъу зака горушмишхьайхъа гора, сагъра ихьена. Вас джанана сагъвалла, ишил’ угъурбы аlрзаъа.
— Сагъул!
