Россиейни мактаббышее цlеддийни сентябырыле тезе хъаlдхъийн сен гидгъыл. Хъаlдхъийни ва ыlлимнии министерствайн гьувойни маlълуматыхъа гора, 2021-ъэсди сенее тезеба мактаббышейхъа са милйоный молюдваlщ аазыр ушахар хъабы. Шацыйни сенихъа иляаканкъаl, гьаlшде мактабейхъа хъабыйни ушахаршин сай ючlаlд аазырна хаlдда водун.
Мани сардан Дагъыстанейиб аlхырейни сенбышее вазият юг хъувхьа вобна. Сениле-сенилхъа цlеддийни сыныфбышейхъа хъавайлени ушахаршин сай хаlдхъехьи водун. Гьайни тезе хъаlдхъийни сенее ёкьцlале йигlни аазыр ушахарше мактаббышин аккабы аахъы.
Тезе хъаlдхъийни сенис къадсырыйн тадбырбы Рутул районни Сувал’ни магьаlлыл’ни мактаббышейид илгъечlуйнбы. Манбыше, аlдат гьуваджы, сифтаба цlеддийни сыныфейхъа хъабыйн ушахар югба къаршиламишавъу. Сыныфбышика, манбышис дарс гьелесди маъаlллимаршика танышувхьессе гьихъа, линейкайн йигъынджахбы алгъавгьу. Мактабни директорарше махъа сабыйн ушахар, манбышин деккярий едяр, дарсыбы гьелессын маъаlллимар хъаlдхъийни сениква табриквъу. Манбышис хъаlдхъее угъурбы аlрзау.
Мани саягъылидын тадбырбы Бабаюртни районее цlаlхыйн миллет ешемишехьени хиваршейид илгъечlуйнбы. Мактаббышейхъа шадба хъабыйн ушахар маъаlллимарше къаршиламишавъу. Манбышис хъаlдхъее угъурбы гьеххъы.
Гьайни сен мактаббышейхъа тезе хъабыйни ушахаршин сайид гьийдни сенбышихъа иляаканкъаl, хаlдхъыхьа. Манбышди аlрайл’ аlхырейни сенбышее кьомана джига Тезе Муслагъни йыlкьнекни мактабын авхъаахъа. Мактабна директор Сафар Наврузовни увгьойка, гьайни сен сифтийни сыныфейхъа 22 ушахар хъабы. Шацыйхъа иляаканкъаl, мактабейхъа хъабыйни ушахаршин сай кьоlни элеес агъалла хъихьа. Манчиле савагьийба мактабыхъаб 11 ъэсди сыныфе хъаlдаххъан хьойре шыгыртыр вобунбы. Ючlудъэсди сыныфее 7 джегьиле ацlал’ алятlа водун.
Мани сиягьей хъийгъыйна джига Калел’ни мактабын авххъаахъа. Мактабна директор Фергьад Аlлиевни увгьойка, гьайни сен тезеба мактабейхъа 15 ушахар хъабы. Манчиле гъайре йыцlыдсадъэсди сыныфее хьони, ючlуlдъэсди сыныфейид хьони ушахын ацlаал’ алятlа водун.
Гьайни сен Мишлешни хивни мактабнаб вазият югба вобна. Садъэсди сыныфейхъа тезеба йихьыйре ушахао хъабы. Йицlыдсадъэсди сыныфей йигни шигырте хъаlдхъас. Ючlыдъэсди сыныфейхъа 7 ушах илгъебчlы.
Гылмецlни хивни йыlкьнекни мактабейхъа хъабыйни ушахаршин сайид агъалла хъихьа. Гьайни сен хьони ушахын цlедда мактабын аккабы аахъы. Къийна мактабни йицlыдсадъэсди сыныфее хьебни, ючlуlдъэсди сыныфейид кьоlни шыгырте хъаlдаххъа водун.
Джинаlгъни хивни мактабейхъа тезеба йихьыйре ушахар хъабы. Мактабна директор Наджмуддин Гьаlджиевни увгьойка,гьале гозетее кьоlйреб хъавалесынбы вобунбы. Мактабни йыцlыдсадъэсди сыныфее са, ючlуlдъэсди сыныфейид са телебайн билиг алятlа водун.
Цlаlхыйнийий Муслагъни йыlкьнекни мактаббышди цlеббыйни сыныфбышехъа сасса ушахар хъабы. Муслагъни хивее йыцlыдсадъэсди сыныфее са шыгырт ворна. Цlаlхыйни хивни мактаббыхъад йыцlыдсадъэсыний ючlуlдъэсын сыныфбы дешинбы.
Дагъамна вазият Миххьегlни хивни йыlкьнекни мактабее яранмишувхьа. Къийна мактабейхъа кьоlйре ушах хъабайли.
Дагъайдни сыныфбышди аlрайл’ энки хаlбба ушахар Хьойикни мактаббыхъаб вобунбы. Мактабни хааlрынкъуни Эфенди Бабаевни увгьойка, гьайни сен тезеба мактабейхъа кьоlйре ушахар хъабы. Атталныйий Муlхаlхни хиваршейни мактаббышейхъа тезе хъаlдхъийни сенее хъабыйн ушахар дешинбы.
«Нур» кlазетни редакциейн тезе хъаlдхъийни сениква мактабейхъа хъабыйн ушахар, манбышин делесинбы, маъаlллимар йикlейнче табрикааъа. Манбышис югун хъаlдхъийбы, угъурбы аlрзаъа.
Редакциейн Тезе Муслагъни хивни йыlкьнекни мактабыс директорна хъарынна Сафар Наврузовыр табрикаъана. Манкъус тезе къуллухыл’ джанани сагъвалика йикlеедын мурадбы быкырхьес аlрзаъа.
