Гьар сен октябрьни хьончил’ Россиейл’ маъаlллимаршин йигъ алгъайгьен аlдат водун. Маъаlллимийвалла дагъамын ва лазымын санаъаlт водун. Мани санаъаlтылхъа хъарына инсан менни санаъаlтылхъа айкlан деш. Манкъуна ыlмыр ушахаршис тербие, ацlаал’ гьувойка багълыба воохьи. Йишди миллетыхъабыб мани санаъаlтылхъа аlшкь гьагуйн ва гьаагван инсанар кlылба дешинбы. Манбышда гьарна са ахтыйни доюс лайкьра ворна.
Маъаlллимийвалла гьаъани инсаныхъаб ацlаалиле гъайре, сабыр, раlгьим, инсафыйвалла вуккан. Манбышди йикlее нагьаlкьийвалла, кубытийвалла, сарсахийвалла мыссаджаб девхьес вуккан. Кар ацlани маъаlллимее ушахаршис гьаммаше югун билиг, тербие гьелес, шыгыртаршис хъодкуда ешайиш ыккейсдимее йаlхъ гьагвас. Мани саягъылин маъаlллимар йишди гыргыни хиваршее вобунбы.
Ши гьаммаше йишди саватукани, камалукани, абырыквани маъаlллимаршиле гуянмыш вухьа. Манбы шахъаб гьар вахтал’ вухьайнбы. Къийнийни йигъылиб мактаббышее, аали мактаббышее миллетын, республикайн до ахты хъаъан маъаlллимарыб хаlбба растына хъавайли. Манбыше джони ишиквайий, санаъаlтыс гьаъани кlыл’валика гьалалын къык одхьан водун.
Маъаlллимаршини йигъыл’ ши манбы йикlел’ хъаваляаъа, манбышиква горушмишоохьенбы, шас гьувойни тербиейс, ацlаалис миннатдарийвалла билдирааъа.
Гьайни сеныд маъаlллимаршин йигъ республикайни шагьарбышейий районбышее хаlдни тентенейква илгъечlу. Рутул районни администрациее манчис къадсырийн иджлас илгъечlу. Районни хааlрынкъве Ибрагьим Ибрагьимове югба ишлемишувхьайни маъаlллимаршис грамотабыйий, пайбы гьуво. Манбышди ишис ахтына кьиймат гьуво. Геледжагъыл’ угъурбы аlрзау.
Мактаббышейид манчис гьазирауйн уфтанын тадбырбы, йигъынджахбы илгъечlу. Мишлешни хивни йыlкьнекни мактабее шыгыртаршее маъаlллимаршис къабсырна маджлис алгъавгьу. Мактабнни директоре Ислам Ибрагьимове мактабын маъаlллимар джуни чыхышее табрикавъу ва манбышди ишис ахтыйна кьиймат гьуво. Мани йигъыл’ чыхыш мактабни доюкани маъаlллиме, хаlдда сенбына мани санаъаlтыс къуллух гьааъани агъсаххъал Нуруллагь Мамедовейид гьауйн. Манкъве мактабни маъаlллимаршис югун дилягбы гьеххъы.Дагъайдни сыныфбышди ушахарше маъаlллимар маlъныйбышиква, шечlбышиква шадавъу. Маъаlллимаршис къабсырийни маджлисни аlхырее садибын шикыл’бы ыхыl.
Магьаlбна уфтанна маджлис Тезе Муслагъни хивни йыlкьнекни мактабейиб вухьа. Мактабна директор Сафар Наврузове маджлис маъаlллимар табрик гьавъуйка аахъы. Гойне хьинне ушахарше гьийгъанче гьихъа гьаlзирауйн тамашебы гьагу, шечlбы хъаlдхъы. Манбыше джос дарс гьелени маъаlллимаршис джанана сагъвалла аlрзавъу.
Маъаlллимаршини йигъыс къадсырийн йигъынджагъбы цlаlхбышди менни мактабышейид илгъечlуйнбы.
