КьоIдъэсын сен быкырехьи дюнйелхъа хъигъоочIена чIырвалла- COVID-19 салат1увхьайн. Манчин быкырни дюнйейл’ ешемишоохьени инсанаршин джанбы охале хъыгъаы, ешайиш, хасиятбы бадалау.
Коронавирус чIырвалла Китайни Ухан’ шагьареенче гибгъыл. Сабара вахтале мана быкырни дюнйелхъа еймишивхьа. Быкырын оIлкабы карантиныква утIумхьа. Милйонбышика мани чIырвалике инсанар гьабтIу. ГьаIшдеб манчиквана мубариза вуккекка вобна. Анджах гьалекийс манчин оIги быкырда къацIакIванас аIхы деш. Гьелбедти, хайир манке ыхьес, агар инасарше кIарантинын тIабалбы гьуваджее ва вейбар ыIхее. ХаIббанани экспертбышди увгьойка, манчин оIги манке даянмишхьес, агар миллетыхъад садибын иммунитет ыхьее. Маныд агар хаIббанани инсанарше вакцина гьавъээ ихьес.
Инсанарше аIхреени вахталхъамее инам гьаъа ыхьа деш, мана чIырвалла джулхъа, джуни хизанылхъа гьивийхьарва. ГьаIшде къаджейнки, мана къарахабар гьаIкIена вухьай. АIхреени вахтал’ мани чIырвалике хаIббанабышин ваацIа-хъуваацIанбы, дёлесинбы гьабтIу. ХаIббанабышин дёлесинбы гьабтIуйке гуджин дохтурарше къадтивхьанавъу.
Шаца мани коронавирусыке йизын декий едиб чIырыхъувхьа. Манбы къыIлина хивеехъа ейлягъыс абкIын вухьа. Хивее манбы кьоIйирсана чIырыхъувхьа. Йигъ-йигъыле манбышда джанана гьаIл писхъоохьи гибгъыл. Маджбырувхьайнбы телесюгба МаIгьачкъалеехъа савкIалас. Гьале югда ыхьа, манбы шенче гьиняхъа къавуккыйнбы. Сабара йигъбышиле кIарантин гиххьы.
Шагьареехъа хъабыйнкъаI, манбышихъаб гьаIл деший. Къыздырмайке манбыше гьиджоомыджад йишонаъан къаммышехьи деший. ДжитIада, манбы шени дюнйейлхъа ааIс са аддымий аху. Дохтурар хъобтIул. Манбыше гьаманиджаб йигъыл’ декий ед’ больницехъа гивхьу. Сура вазна манбы мааъаб вухьа. Манбышисахъа уIххъа-хъооIна инсан ыхьа деш. Садджу охьанасын кар ыккекка ыхьа ва маныд дохтурарше джосахъа хъели ыхьа. Сагъул дохтураршис, манбыше декий ед’ къелилхъа хъавъуйнбы. АIлгьамдуллягь, Аллагье манбы гьувааджийнбы. Анджах мани чIырывалике хъетIуйн джанас зиян гьаIшдед мейид водун. КьоIнкъунсана улен иших, къайиххьый, фагьам кIыл’хъыхьа.
Гьамани джитIани вахтни аIрее хаIбба коронавирусыке йишди хивын ешли инсанар гьабтIы. ОIбкабы ёхламишаъасди меега хусулсы поликлиникабышее учарат илёдзур, КТ гьауй 5-6 аазырыс илхъеIчу. ДжамаъаIтыхъад гыргынкъухъад деш ыхьа маIгьдын имканбы.
Йишди увгьойква, вахтал’ вейбар ыIхийнбыхьий, мункум вобний гьаIшдеб манбы ешемишоохьи вухьес. Манке хаIббанани инсанарше, больницабышее джигабы дехьайхъа гора, маалиджебы хайбышее гьаъы ва гьаIшдед гьаъа водунбы. Мааалидже гьаъана вазият гьаIшде сыкIылба юг хъувхьа вобна. Республике госпитал’бы ачмишау. ГьаIфтикбышее гьаIшде дарманбы, маскабы авайкенбы. Дохтурар хаIбхъебхьайнбы маалиджебы гьаъас. Россияйл’ мани чIыривалис эксина хьулеблехье джура вакцина гьазиравъу вобна. ХаIббанани ааIлимаршини увгьойква, манчин югун натийджабы гьели водунбы.
ГьуIрматыкван йишин чоджар, йичибы, агар вушди джанахъад вейба уIвхас гьидяагван кьадагъабы дешхье, вакцина гьееъэ. Манке гьам шу сагъба аахвас ва вушди дёлесинбышис шокена къорху вухьес деш.
