Гьар сен ноябрьни 12-чил Россиейл’ Сбербанкни ишчершин йигъ алгъайгьи Сбербанкни ташкилатыхъад геед йиссейн таарых водун. 1841-ъэсди сен Россиейни императоре Николай l пылбы гьуваджесдимее маlгьдын ташкилат къурмишаъаасди амыр гьуво. Къийна Сбербанк хаlдын ва такьатукван ташкилат водун. Россиейни хаlдданани аlгьалийн джон пылбы мааъад гьувааджи. Къийнийна йишда мигьман Сбербанкна ишчий, кар ацlана менеджер Уlмаров Максим Гул’бекна дих ворна.
— Максим, Сбербанк къийна хаlдын финансбышин институт водун. Дора йишда гаф манчини ишике гивгъалас.
— Сбербанк къийна Россиейл’ ва сабара Авропайни чlакlни оlлкабышее ишлемишехьен ташкилат водун. Манче инсанаршис вая ташкилатбышис гьаагвани хидматыке йишонхьес хъадее, манчис хаlбба вахт лазымувхьес. Манчихъа гора, манчин инсанаршис гьагвани энки лазымни карбышике гаф гьааъас. Къийна банкын инсанаршис пылыква багълыда гьарджура ишбы ыккекка водунбы. Манчин маlъашбы, пенсиебы, пособиебы алятlасдимее инсанршина иш вахарий хъааъа. Гойне хьинне инсанарше гьийдни сенбышей хьинне пылбы муджрыбышее гьувааджи деш. Манбышда девлет, къазындж картее эйхьи. Лазымни джигеехъа манбышике ишлемишаъас ахаlн. Манчиле гъайре йишди банкын офисейхъа иттябы сана-санкъус телефоныка пылбы алгъагьасын имканбыд гьели водунбы. Маlгьдын ва сабара медын джурабаджура ишбы банкын ыккека водунбы.
— Аlхырейни вахтал’ джурабаджура джигабышейнче инсанаршини телефонбышейхъа зенгбы хъадайли. Манбыше Сбербанкни ишчершини доюле кумаг гьагвасын теклифбы гийхьи.
— Манбы гьорбы гьаъанбы вобунбы. Манбышика ненкеджаб йишонебхьес вуккан деш. Манбыше мани саягъыл’ инсанаршике пыл хъоlхъаl. Маlгьаб алдамишувхьайни инсанаршин сай хаlдын водун. Гьаlкеlни Сбербанкни ишчерше ненкеджад шоке алава маlълумат алятlас деш. Манбышихъад вушди аллан лазымын маlълумат гьеххалика водун. Хъийгъалетти, ши гьаммаше йишди офисейхъа абыйни инсанаршиква ишлемишоохьи. Ненкеджад телефоныка манбышис хидмат гьаагва деш. Манчихъа гора, къийна ачухда эйгьен, телефоныка зенгау хидмат гьаагванбышис инам гьимаъа. Мани карее гьаммаше аяхба вухьес вуккан.
— Къийна гыргынкъве маъаlшбы, пенсиебы, ушахаршис гьелен пособиебы бакоматейнче алятlа. Мани сардан цlаlхни дерайл’ воохьени инсанарше дагъамийваллабы цlыцlаъа. Энки делесни банкоматысхъа 25 километр водун.
— Мани карее сувал’ни хиваршне ешемишоохьени инсанаршихъаб х дагъамийваллабы водунбы. Манбышис энки делесын банкомат Лучекни хивее водун. Увгьойбышихъа гора, маайид гьар вахтал’ пыл хъыгъайшес эйхьи деш. Къийна республикайни Правительствайква Сбербанкын мани сардан хаlбна иш вуккекка вобна. Манбы инсанаршина иш вахарий хъааъасдимее, сабара акьаlнани хиваршейхъа банкоматбы гиххьес чалышмишоохьи вобунбы. Гойне хьинне, банкомат гиххьесдимее манчикен хайир хаlдын ихьес ыккан. Къийна сувал’ Сбербанкын картабы ишлемишаъанбышин сай хаlдхъехьи водун. Сабара вахтыле маlгьдын банкомат мааъадыд ихьесын.
— Максим, аlхырейни вахтал’ инсанаршини аlрайл’ бадалхьесын хабарбы вод. Манчини гьаlкlее йигъна фыкыр ваацlахьес вуккканий.
— Закlлед маlгьдын ихтилетбы экlда – экlда къийхьи. Йишда иш манчика багълыба дешда. Йишда макъсад Сбербанкын гьагуйни къайдайл’ инсанаршис кумаг гьувой вобна. Маlгьдын гафбы гьаммаше инсанаршин арайл’ ыхьайнбы. Манбы оlлке гыранийвалла гибгъылмее сикlылдад гуджламишехьенбы.
— Дора сикlыл’на гаф гъу республикайни парламенте ишлемишехьени сенбышди гьаlкlее гьааъас. Гъу ёкьудле сенна джаванаршини парламенте йихъбышикена депутат ыхьа.
— Зы республикайни джаванаршини парламенте цlеррийна ва аlхырейна депутат ыхьа. Зы аркlынийле хъийгъа, мааъар йишда депутат ыхьа деш. Депутатна ишлемишехьенкъаl, зы гьамбазаршика саджигее хаlдда джаванаршис ааидын мисалабы ишилхъа адчы. Манбы джаван аилебышис кумаг гьелесын, хиваршее джаванар аахвасын, манбышис иш джигабы аахъасын мисалабы ыхьа. Къийна ши манке ишилхъа адчыйн хаlдданан мисалабы ишлемишехьи водунбы. Амма манчихъа ил’дяакы, джаванаршин дагъамийваллабы аlрейнче адкlын дешинбы.
— Максим, мани сардан дагъамна вазият йишди джаванаршихъаб вобна. Геллесди вахтал’ манбышис хъаlдхъыйс сикlы иш авайки деш.
— Йигъни ихтилетыка зынар разийра ворна. Къийна джаванаршихъад гьихъа аlл’гьасын имканбы дешданкъаl, медицинайн кумаг камдананкъаl, югун ешайиш ыккейсын имканбы кlылдананкъаl, сувабышил’ джаванарыб аахвас деш. Джаванар хиваршее аахвасдимее хаlдда ишбы къаджес лазымда. Манбышин ешайиш юг хъаъасдимее гьокуlматын гьар суракен кумаг гьелес ыккан. Къийна хаlдда мани сардан ишилхъа адчыйн федерал, республикайн программабы водунбы. Амма манчина гудж шакlле къооджи дешоб.
— Гъу Сбербанкни ташкилате ишлемишехьена хаlдда сенбы водунбы, вале гъайре шлемишоохьенбы хаlббане вобынбы?
— Йишиин ташкилат хаlдын водун. Гьелбетте, шахъаб мани системе ишлемишоохьен хил’дже инсанар вобунбы. Закlле сабарабы ваацlанб.
— Максим, гъу Сбербанкни ишчершини йигъыква табрик гьаъа. Вас джанана сагъвалла, угъурбы аlрзаъа.
— Сагъра ихьена!
