Гьайни сен Сувал’ни магьаlлыл’ инсанаршин ешайиш юг хъаъасдимее хаlдда джурабаджура ишбы ыккы. Мааъад ыккыйни ишбышике «Нур» кlазетын аlтрафлы маlълумат гьувойн. Къийнийна йишда гаф Цlаlхыйни хивее ыккыйни тикинтийни ишбышди гьаlкlее вухьес. Гьайни сен Сувал’ни магьаlлыл’ инсанаршин ешайиш юг хъаъасдимее хаlдда джурабаджура ишбы ыккы. Мааъад ыккыйни ишбышике «Нур» кlазетын аlтрафлы маlълумат гьувойн. Къийнийна йишда гаф Цlаlхыйни хивее ыккыйни тикинтийни ишбышди гьаlкlее вухьес.
Гьайни сен Цlаlхыйни хивее гьехаалика ишбы къаджы. Мааъаб хивни аlрайл’на поштна йаlхъ аlкь хъавъу, Хаlбни Ватанни даlвъыйни иштыракчершис гивхьуйни абидайна джига бадалавъу, дагъамни джигабыше магьаlджарбы илёзарау, хивни авуд ахтыйн бендбы аляу, йиссейна булах тезелемишавъу. Са сенее манимееган ишбы ыккый сувад’и джигайл’ сибыкна иш дешобна. Водни дагъамийвал’бышихъа ил’дяакы, тикинтийн ишбы къедженбыше вахталхъассе гибгъылна иш быкарааъас чалышмишувхьайнбы. Къийна сикlыл’на иш бендбы аляъанбышихъаб авху. Манаб сенни аlхырейхъасее быкыраъасынва манбыше эйгьи.
Гье’бетде, 2021-ъэсын сен хивнимее дагъамда гидгъыл. Адыйни ыкlейкlбыше хивни инсанаршис хаlбна даддешийвалла гьуво. Джамаъаlтни увгьойка, фаляакатын хивынбышис хаlдын зиян гьуво. Амма манчис сикlы гьоlкуматыкен кумаг дехьайн.
2021сен хаlбна иш хивни аlрайл’ республикайни «Дагъавтодор» ташкилатын гьавъу. Подрядын ишбы «Лаконя» донани ташкилатын ыккы. Манбыше даарни джигабышее йаlхъ аlкь хъавъу, поштни йаlххъыни авуд ахтыйн бендбы аляу. Манзикни муглекна йаlхъ абрелхъа абчы. Гьаlшде Хаlбни Ватанни даlвъыйни иштыракчершини абидайсана майдам генгиш хъувхьа вобна. Гыргынчиле хаlдда Цlаlхыйни хивыс ярашугъ тезеба алявъуйни булахын гьооли вобна. Булах тезелемиш Хаlнмагьаlммад Раlгьимовни хизанын гьавъу. Гьаlшде мана абрелхъа абчыйле хъийгъа, махъа хьян гяцlес абайленбышин сайид хаlдхъыхьа. Махъа садджу цlаlхыйни хивынбыджаб деш, менни хиваршейнче абайленбыб воохьенбы. Инсанаршини увгьойка, булахын хьян хаlдданани чlырываллабышда дарман вобна.
Хивни администрациейни хааlрынкъве Вагиф Аlлиеве гьайни сен Цlаlхыйни хивее ыккыйни ишбышике багълыда гаф гьааъанкъаl увгьойн: « 2021-ъэсын сен хивыс дагъамда гидгъылейид, ши йикl дена хъувхьа деш. Дагъамийвал’бышихъа ил’дяакы, гьаlракатыка ишлемишувхьайнбы. Ши ыккыйн ишбы шокlле къеджи водунбы. Хаlбба вахтный хивни аlрайл’ мани саягъылин ишбы гьидяъан. Манчика ши явашоохьи деш. Гьийгъанче хъооlни сенылид шахъад хаlдда фыкрее аххъыйн ишбы водунбы. Манчини аlрайл’ кьомана джига манзикни реконструкциейн авхъаххъа вобна. Мана тезелемишаъасдимее гыргын санаъаlтбы сау водунбы. Манчиле гъайре хывын клубыд абрелхъа адчесди фыкрее вобунбы. Ыкlейкlын манчисыд хаlдын зиян гьуво».
Гыргынкъуле хаlбба гьавъуйни ишбышис хивын джамаъаlт шадехьи. Манбыше заквани горушее ишбы гьаъас кумаг гьувойнбышис югун дилягбы гьеххъы. Дагъамни йигъыл’ джока саджигее вухьайнбышис джанана сагъвалла аlрзавъу.
Цlаlхыйни хиве гьавъуйни ишбышин нейинки мааъаб ешемишоохьенбышин, къырагъыле абыйнбышин йикl шадаъа. Манбыб къаджейнчике разийба аахва. Умуд гьааъана, хъооlни сен мани къайдайлин ишбы ахуйни Сувал’ни магьаlлыл’ни хиваршейид къаджесынбы.
