Табиятыква гьыIдчат гьаъас ыккан деш. Манчин бирданхьессе фаляакат, мисийбат адайли. ЦIайике, гёгъыйбышике, селершике, ыкIкейкIбышике, зел-зелебышике, мыцбышике ненаджар къорамишхьа дешорна. Анджах аIгьтият гьаммаше гьувааджес вуккан.
Мисала вобна: « АIгьтият гьувааджена, Аллагьее къорамишаъа». Гьихъийаллани дюнйейн чини « пайике» цIаIхбыб камааъа деш. Сенис са фаляакат абайлена. Гьайни дёлесийвалее мед табиятын чина гудж гьаагу. Гьайни элейс поштина йаIхъ са уIлджумна Сувал’ни маIгьалылхъана утIумывхьа. Манчина сабаб, одкIулыйн кьул’ ыхьа.
Гьийдни кIазетни нумрабышее ши тезеба, гунайни сураке, Сувал’ни маIгьалылхъа гьааъани поштини йаIххъыIни гьаIкIеедын макьаалебы гьувойнбы. Ман хаIдын проект водун. Гьалекийс мана йаIхъ гьавъу таамувхьа дешобна. Манчихъа гора, гёгъыйбы ыхьамее , мана гьивийгIанна. Манчин авгъанчее ааIна йиссейна пощтина йаIхъ утIумааъана. Анджах, йаIхъбы гьаъани ташкилатын мана гьаммаше темизяаъана. Гьайни элейс быкырна сува оогъанче даахъа гивку, манчихъа гора уIлджумна йаIхъ къацIабкIын.
Манаб са Сувал’ни дерайлхъа ааIна поштина йаIхъ вобна. ЙаIхъ дешданкъаI, гыргын даянмишехьен. Мал, охьанасын кар тIашмишаъас эхьи деш. Къийна Сувал’ни маIгалыл’ 12 цIаIхбышда 1 аварбышда хивар водунбы. Мааъар 3-4 аазыр инсанар ешемишоохьи вобунбы. Манбышисын охьанасын кар, аляъасын палтар, гёххьанасын янаджагъ авакьараъас ыккан. АIсас дагъамийваллаб, йыIкьра чIырыхъихьана инсан маалиджейс районни ва шагьарни больницеехъа гьихьараъас даIхий вобна. Эле гьамани йигъбышее ушах ихьесда хьунаще чIырыхъийхьа. ДжамаъаIтын мана гейрни четинийваликва одкIулни кьулершеенче алгъарчу.
Сувал’ни маIгьалыл’ яраммишивхьана вазият бил’дирааъасдимее Федерал телеканална мухбир Саркар МагьаIммадовыква верлиш цIыIцаъана десте гьабкIын. Манбышика саджигее «НУР» кIазетна хааIрна редактор Байрам АIбдуллаевыр гьаркIын. Гьамани джад йигъыл «Россия 1» телеканалыле фаляакатни гьаIкIеедын верлиш гьагу. Анджах, джамаъаIтни увгьойква, районни чIакIынбыше, къуллухчерше манчилхъа кIорана фыкыр гьувы деш.
ЦIеббыйн кумаг гьеленбы хайирхагь фонд «Инсан» ва Сулейман Керимовын фонд «Нова» ыхьа. Манбыше инсанаршис одхьанни карана кьочIе савъу. Ман ДР-ни РФ-ни МЧС-ни верталётыква кьоIни элейс Сувал’ни магьаIлылхъа хъыккы. Вертолет Мишлешни чейлягъа гиххы. Гойне ман кар сиягьийбышиква гыргыни администрациебышеехъа пайлемишау. Манбышед хизанбышис битIалау.
ГьаIмагьдын джад хайирхагь кумаг дарманбышикван Рутул районни йыIкьнекни больницайн Мишлешни участковый больницайс гьуво.
Къийнийни йигъылхъассе поштини йаIххъына джыгъыр ачмишавъу вобна. Машинбы ийкар гидгъылыйнбы. Анджах мед йаIхъбы окIаласда къорху мейиб вобна. Дагъавтодорни увгьойква, ярамишивхьайни вазиятыкена хабар джохъаб вобна. Мааъад ишбы са саъаIтна
