Майни вузани 9-чил’ гыргынанкъаl Хаlбна Ватанна даlвъий таамувхьайни 77-ъэсди сенис къадсырийн шадваллабы илгъечlу. Мани йигъыл’ майдамбышейхъа хъигъебчlыйни инсанарше фронтей вухьайн эскерар йикlел’ хъавалявъу. «Нур» кlазетни хааlрни редакторус Байрам Аlбдуллаевыс гьини элейсын майни вузан байрамбы Маскlавни шагьарее алгъагьас кьисматхьа.
Б. Аlбдуллаеве Гъамувхьайни йигъыл’ Маскlавни шагьаре Чlарани майдамыл’ни гыргыни тадбырбышее иштырак гьау. «Бессмертный полкни» акциее манкъве Хьойикни хивын ветеранар йикlел’ хъавалявъу. Манкъве хыле Аlбдуллаев Шерифна, Кьасымов Кьасымна, Бабаев Гъайбуллагьна, Бабаев Пашайна, Раджабов Сейидаlгьмадна шикыл’ авхъу илгъечlу. Манчиле гъайре, шикылее авхуйни ветеранаршин добы одкIуд ыхьа. Журналистни увгьойка, мани йигъыл’ вуджее садджу джони хивын фронтовикарджаб деш, гыргын Цlаlхни халкьыке даlвъэйхъа гьабкlынийнбы йикlел’ хъавалявъу. Хаlбни Россиейлхъа кlыл’ни цlаlхни миллетын Ватанни даlвъийн ветеранар гьаагу. Манбышда игитийвалла, джомардийвалла авхуйни халкьбышис ашкаравъу. Манбышда дараджа сыкlылбаб ахты хъааъас чалышмишхьа. — Хаlбни Ватанни даlвъэйхъа хаlбба цlаlхни халкьын адамейр, джаванар гьабкlын. Къийна са хизан дешда, манчин уцlур хъидетlуйн. Фронтейхъа абкlынийбышике геллесынбы мааъаб авху. Оlлка фашистаршике къорамишааъава вурушбышей джан гьуво. Даlвъийле сабкlылыйнбышда геллесда яраламишхьана ыхьа. Къийна дагъамын вурушбы таамхьайн 77 сен быкырхьа. Амма манке хъетlуйн уцlурбы шас йикlел’ водунбы. Манбы ненкеджад кlелиханас деш. Ши душманаршике къорамишавъуйни эскераршин добы гьаммаше йикlел’ гьуваджесынбы. Ман йишин гыргынкъун бордж водун. Хьодле сенна адкlынни вурушбышее цlаlхни халкьын иштыракыд хаlдын ыхьа. Манке кlыл’ни Хьойикни хивейнче 23 джаван фронтейхъа хъувку. Манбы Аlбдуллаев Шериф, Бабаев Гъайбуллагь, Бабаев Паша, Бабаев Маджид, ГьаlджимагьаIммадов Сейфуллагь,Гьамзатов Ыlса, Гьуlсейнджанов Аlгьмад, Заманов Мурад, Кьасымов Кьасым, Кьурбанов Закарий, Лелаев Аlбдулла, Магьаlммадов Керим, Маллеев Мали, Мамедов Маlнаф, Мурадов Незир, Наврузов Небий, Наврузов Навруз, Раджабов Сейидаlгьмад, Тагъиев Шихаlгьмад, Тарханов Гьаlджиаlлий, Шаlъбанов Гьаlсан, ШаIъбанов Сираджиддин, Эфендиев Шейихмагьаlммад вухьа. Манбышди кьоlнкъуни гьаlкlее дурустын маlълумат дешин. Мани саягъылин игитер гыргыни хиваршей вухьайнбы. Манбышин добы йыlкьале хъооlни насылбышикlлед ацlахьес ыккан. Сенбы адкlынийле, Хаlбни Ватанни даlвъийни иштыракчершин сай сейрак хъехьи водун. Цlаlхни халкьыхъаб ветеранар авхуйнбы дешинбы. Дора манбышди гыргынкъус раlгьмат къахивлес.
