ХъаIдхъийн 2021-2022 сен таарихехъа адкIынийн. Са-кьоIни вузале ЕГЭ-бы хъувойле хъийгъа, санахьийн дерд’бы дешин мактабын ушахар хаIбни, хыллийни джурабаджур «доламабынани» ыIмреехъа иккебчIес. Манчика барабарда джегьилершини оIгее хаIбни ыIмреехъан дарвазабы ачмишхьес.
ЦIеддыйн инсанын каамил’ атдымбы мактабеенче гийгъал. Ушахын ацIааал’, тербие, гьаIракатбы, вардешбы мааъад къурмишехьи. Манбыд маъаIллимыкейий шыгыртыке аIслыда. Гьел’бедти, манбышин кумагчерыб деккярый едяар вобунбы. Деккяршинайи едяаршина мурад вобна джони ушахаршин ешайиш югун ыхьай, маъаIллимаршина мурад вобна джони шыгыртарше мактабее алеетIуйн ацIаал’бы хъодкуда ыIмрее ишлемишаъас аIхий, ушахарыб борджулыба вобунбы ыIмрен кьанунбы гьуваджы, джос ыIмыр, тербие, ацIаал’ гьувойни инсанаршина гьуIрмат гьувааджий. Сенис мактаббыше милийонбышиква ушахар къоокка. Манбышди гьарункъухъад са язы, са йаIхъ вобна. Анджах, ши, чIакIынбыше манбы хъобкуни йаIхъылхъа гяагьас вуккан.
АIхреедын 2- 3 сен йишди гьоIкуматыс , дюнйейс джад гейд писда хъады. ЦIебба инсанар коронавирусни чIырывалин дареехъа авъу, хъийгъад дюнйейл’ аIлгъаан спецоперациебыше, вурушбыше, гьыIдчатбыше инджикааъа. Гьел’бедти маIгьадни карбыше хъаIдхъийн гьаIракатбыд даахъа хъаъа, няъас увгьее манбышин геледжагъ нягьаIдын ыхьай къеджи дешод.
Тезе хъаIдхъийни къурлышин, мункум вобна, джегьил’на ыIмыр гьавакьарааъас, нейиб шадааъас. ОIгийл’ мактабын гьаIкIени ацIааликван, тербиейкван ушахарний къоокка. Манбышди гьаарункъухъаб мураад вухьа. ГьаIшде санахьийни ушахни оIгее «мычIахын чIалаг» водун. Манчихъа ил’дяакы, шахъаб умыд вобна гьайни сен мактаб таамауйни гьарни ушахее джусда хъобкуна ыIмыреехъана йаIхъ тIабалааъасда. ЫIмыр чини чархыл’ аIлгьаа вобна, югуный писин сана-санчиква бадалехьи..
ЦIаIхбышихъабыб гьайни сен мактаб таамаъан ушахар хаIбба вобунбы. Гыргыни мактаббышее аIхреедын зенгбы ыхьайнбы.
Сувал’ни магьаIлыл’ни мактаббышее аIхреени зенгын маджлисбы ярашугъыква илгъечIи. Мани маджлисбышее «Нур» кIазетни ишчершед иштыракаы. Сувал’ни маIгьалыл’ нягьаIдый мактаббышее аIхреедын зенгбы илгъечIу, манчини гьаIкIеедын маIълумат йишди мухбирни макьаале водун.
Манчиле гъайре, цIаIхбышди ушахарше Бабаюртни районеедын Камбулатын, Калелин, Теземуслагъын йыIкьнекни мактаббы гьайни сен таамау. Маайид аIхреени зенгыс къадсырийн маджлисбы илгъечIу.
Гьайни сенийна аIхреени зенгыс къабсырна маджлисна линейка Теземуслагъни мактабее майни 21-чил’ вухьа. Мани аIхреени зенгыква багълыбанани маджлисее маъаIллимарше, Муслагъни хивни администрациейхъа гядакIвани ташкилатбышди къуллухчерше, ушахаршини деккяршейий едяарше, хивни джамаъаIтын иштыракаъу. Манчини гьаIкIеена хабар шас мактабни директоре Сафар Наврузове гьуво: « Гьайни сен аIхреени зенгыс къабсырна маджлис гейдни ярашугъыква, гьаIракатыква илгъевчIу. Мактабын маъаIллимар чалышмишивхьайнбы мактаб таамаъанбышис байрам къурмишаъас. Мани йигъыл’ мактаб беземишау. Мааъад маъаIллимарше, ушахаршини деккярше едяарше ушахаршис угъурбы аIрзуламишаъан чыхышбы гьау. 2021-22 хъаIдхъийни сенее йишди мактабын йихьыйре 9 сыныфын , хьойре 11 сыныфын шыгыртар къавуккы. Шахъад хаIдын умудбы манбышилхъа водунбы. Инам гьаъан , манбыше ОГЭ- бы, ЕГЭ- бы югда хъелес ва джос ыкканни аали мактаббышеехъа эбчIес…»
АIхреени зенгыс къабсырна линейка таамувхьайле хъийгъа, мактабни магьаIлле маIърака вухьа. Гойне маъаIллимар, къоокан мактабын ушахар, джон едяарый деккяр, абыйн мигьманар чей илёгъас мактабни утагъеехъа эбчIу.
АIхреедын зенг Камбулатни йыIкьнекни мактабеейид майни 21-чил’ ыхьа. Мани мактабее цIаIхбышдийий, аварбышди ушахарше хъаIдаххъа водун.
Мааъаб вухьайни маджлисын маIълумат шас едини мизен дарсбы гьелени мани мактабни маъаIллимее, йишди кIазетни штате дешди мухбире Валий маъаIллиме гьуво: «2022 сен юбилейный сен хьинне, йишди мактабни таарыхехъа эчIу. ХьебцIал’ъэсын къайиккый ыхьа. АIхреени зенгыс къабсырни маджлисеехъа хивын джамаъаIт сады. Гьайни сен йищин мактаб ючIудъэсди сыныфни 13 ушахее, йицIыссадъэсди сыныфни 5 джегьилее таамаъа водун. Маджлис 11 сыныфни регьберее Шамил’ Мазгарове вукку. Къоокканбы табрикаъан чыхышбы Калел’ни администрациейни хаIрункъуни маIъвыне АIлий ЫIмарове, мактабни директоре Рамазан Османове, завуче ГьуIсейн маъаIллиме, Идрис маъаIллиме гьаы. Мактабни дирекциейн аIълада хъаIдхъийни шыгыртаршис грамотабы ва дипломбы гьувы. Маджлис таамувхьайле хъийгъа, тамашейс концерт гьагу.
АIхреедын зенг ыIхыйле хъийгъа, 9 ва 11 сыныфбышин къоокканбы маъаIллимаршиква, джони деккяршиквайий едяаршиква экскурсиейс Сулакни каньонылхъа гьабкIын ..»
Калел’ни йыIкьнекни мактабеейид, шениса макктаббышее хьинне, аIхреедын зенг майни 21-чил’ ыIхы. Мани байрамыс къабсырна маджлис мактабни магьаIлле алгъавгьу. Тамашейс махъа хивын джамаъаIт сады. Маджлис мактабни организаторе Навруз Раджабове ачухавъу. Манкъуни увгьойква, гьайни хъаIдхъийни 2021-22 сен Калел’ни йыIкьнекни мактабын 9 сыныфын 5 шыгырт, 11 сыныфын 5 шыгырт къоокка вобунбы.
9 сыныфна регьбер Олесия Рамазанова, 11 сыныфна регьбер Джамалуддин Мамедов вобунбы.
АIхреени зенгыс къабсырна маджлис мактабни джегьил’ маъаIллимарше: Фаина Къараеваейий Айгун Давудовае вукку. Манбыше къоокканбы табрикаъан чыхыш гьаъас мактабни директорыс Фергьад АIлиевыс, завучис ТIагьир Джанаевыс, сыныфбышди регьбераршис, шыгыртаршини деккяршисый едяаршис гьуво. Маджлисее хурни сыныфбышди ушахарше шечI’бы хъаIдхъы ва маIънийбы гьекIу. Къеккани сыныфбышди джегьилерше хуруни ушахаршис пайбы гьуво. Гойне магьаIлле маIърака гибгъыл. Шыгыртарше, маъаIллимарше, деккяршейий едяарше мыкIаар гьау ва едигарыс шикыл’бы цIыцIау. Хъийгъа хаIйбышеехъа шарар къайиккы. Маджлисыле хъийгъа гыргынбы суфранылхъа сабы. МаIгьаб Калел’ни мактабее маджлис таамувхьа.
«Нур» кlазетни журналистарше гыргыни мактаббы таамаъани джегьилершис джанана сагъвалла, хъаlдхъее угъурбы, ЕГЭ-быше гьаlракатбы аlрзуламишаъа!
