Гьар инсаныхъаб гьайни дюнйейл’ Аллагье гьувона джус сикIы ыIмырна йаIхъ вобна, чини югвалика ва дагъамийваллабышиква. Гьаарна чалышмишехьена хизанни, хивни джамаъаIтни, миллетни аIрей ваахаIна гьуIрмат къазанмишааъас ва хайирекан ишбы гьаъас. Санкъуке ман кар гьаъас аIхан, сассар ворна гьиччуд гьидяъу гьамахуIр гьини дюнйейле урват-гьуIрмат дена айкIан.
Йишди цIаIхбышди гьар хивей джо къеджени ишбышиква, мигьманийвалис йаIххъыле аIл’гьаана инсан хъортIул’ са истакIан чейна гьуво оIтмишаана, лазымни джигей кумаг гьуво хыл’ авхъаххъан инсанар оIгийлиб вухьайнбы ва гьаIшдеб вобонбы.
Манбышда сайир хьойиккелий Раджабов Элдар СейидаIгьмадна дих ворна.
Сувал’ни магьалыл’ мана дяцIана ва хъидявацIана инсан баджагьаIт вор. Няъас увгьее гьаммаше югни-писди йигъыл’ мана гыргынанкъаI гьийхьарна.
Гьайни июнyи 13-е Элдар Раджабов едике ыхьайн 60 сен быкыр ыхьа. Манкъуна дек ХаIбни Ватанни даIвъийна ветеран СейидаIгьмад ГьаIджимагьаIммадна дих экIра джар гьини дюнqейле аркIын ва мана джуни чоджершиква ва йичибышиква едилхъа аху.
Еде Айшат АIбдуллайни йишее адамий дена джен ушахар чIакIы хъавъу джени хылеква манбы эвле-атта гьавъу. Ушахаршей Элдар чоджий йихьыръесда ыхьа. Манкъве кIылваликеджад хаахъа кумаг гьели гиргъыл’. Мактаб таамауйле хъийгъа «Правда» донани колхозее ишлемиш ыхьа ва эскерийвалла таамавъу хъарийле хъийгъар мана мани колхозее машинена шоферна ишлемишхьа. Манкъуна пеше машинеква Улан-Хол, Бабаюрт воохьени пешекараршис, фегьлебышис кар гьаххъий вухьа. Сабара сенбына манкъве колхозни садрийн машиныд гьаъайкин. Колхозенче хъигъечIийле хъийгъа мана районей йаIхъбышди идарей ишлемишхьа. ГьаIшде Хойикни хивей ерлешмишехьени 58-ъэсди «Согют» донани пожарный частыл’ машинена шофер ишлемишехьи ворна.
Ишил дешди вахтал’ Элдар чоджей джуни хусуси самасвал машинеква хиваршее хайбы аляъани, хайбы хъаъани инсанаршис чейлягъна къум абайли. Маныд джамаъаIтыс хаIдын кумаг водон.
Сайид манкъун саIнаъат тIотIар гьивааджий водон. Элдар Раджабов сувал’ни хиваршей тIотIаршина иш ваацIанбышда са ворна. Сабара сенбына гьихъа дагъыстанни РГВК донани телеканалын журналистар Хьойикни хивейхъа абы манкъуни гьаIкIей верлиш гьазирау ва гыргыни республикайлхъа джар деш Россиейни ва сабара гьуIкуматбышилхъар гьагвуна, няъас увгьее мана телеканал спутниковый вобна ва 50-ни гьуIкуматыл манчихъа иляккас воохьи.
Элдар чодже джуни хьунашейква Ханым истагъыка югна аиле къурмишавъу ва екьудле ушах хаIдхъау: кьоIйре гаде ва кьоIйре ичий. Манбишке даватбы гьидяъуна са кIыл’на дих ворна. ИншаАллагь манкъуныд югун йигъ манбышикIле гьайни делесийвал’бышей къаджес къисматаъан. Джо джони ушахаршиле, невабышиле гуянмиш вухьенбы ва невабышин югын йигъбы къаджес къисматаъанбы.
Сайид закIле гьаман эгьес ыккан, йишин кIазет къеккан 27 сен водон ва гьар сен йишин журналистар 3-4 элейс сувалхъа командировкейхъа гьавайкIан. Ши гьаммаше мани хизанын мигьманар вохьи ва хаахъахьинне джахъа авайкан. Эгьес эйхьи манбышин хав «Нур» кIазетын сувалин резиденция водон. Манчихъа гора редакциейни коллективни сурале Элдар чоджийкIле ва Ханым баджийкIле хаIдын сагъулва эйгьи ва йишдимее гьауйн заIгьматбы сувабыс оокIананбыва эйгьи.
Элдар чоджийс джун юбилей тебрик гьаъанва эйгьи ва джус джанана сагъвалла, хылийна ыIмыр, аилее хошбахтийвалла, арзуламишааъа. ВаIш сен гьаъас кьисматаъан. Аамин!
