Гьар инсаныс вудж едике ыхьайн джига, ушахыйвалла абкIынийн джига йикIес аIзизда эхьи. Хъийгъа гъу няаъар ешемишхьее, ваяхуд вахъад нимеега югун ешайишид ыхьее, меб йигъни йикIее ватан воохьи.
Йишди миллетис ватан Сувал’ни дерайл’ кьисматувхьа. Анджах мааъад ешайиш гьаый дагъамда ыхьайхъа гора, инсанар хизанбышиква , оIгийл’ АIраанеехъа, гойне Бабаюртни, Къызларни районбышеехъа, республикайни шагьарбышеехъа кочмишоохьи гибгъыл. ГьаIшде республикеейиб даянмишоохьи деш. Джегьилер хизанбышиква Урсиятыл’ни шагьарбышеехъа ешайиш гьаъас авайкIан. Къийна ман коч даянмишауй вахарийна иш дешобна. Гьар инсан джуни ыIмрена есси ворна. Месала вобна: «Балугъан кIоран хьян тIабалаъа, инсанее югун ешайиш гьаъасын джига». Хивар кьаIрахъыхьайн тахсиркар, терсинада ыккеккан сиясат ва экономиква ыхьа. Хиваршее ешемишоохьени инсанаршис артымишивхьесын имканбы гьуво деш. Советни девырее гьоIкуматни кумагыква маабын инсанар хивни тасарруфатыкваний маIшкьулоохьи, гьаIшде маныд , эгьес эйхьи, гьыIгъадкырийн. Эн хаIбна Сувал’ни дерайл’на дагъамийвалла, инсанар мааъаб идявхуй вобна.
Сувал’ни маIгьалылин цIаIхбышин хивар харабабышилхъа сийкIал водунбы. Калел’на хив авхуджаб деш. ХыIягъни хивее кьыIдимына ешемишехьена инсан эхьи деш. Сабара хиваршее 2-5 хав аху водун. ДжитIада , хивар кьаIсхъыхьа гьаатIа водунбы. Ман кар къедженкъаI, мааъар ешемишхьайни инсанни йикIес писда эхьи. Инсан ешемишдехьен хав са-кьоIни сенни аIрее ойкIал гийгъал. Манчихъа гора сенис къаъайдхьуйн, одкIулыйн джига хъаъас ыккан. Хайбышихъад, йицIабышихъад чардахбы дешхьее, сенис дахабышис лухунаъас ыккан. Акка-къул , пIол- пIатIалок ширрамишаъас ыккан. Бел’ки маIгьад гьуваджес аIха. Къийна хаIдданани хиваршеени хайбышди аккал’ куклакбы водунбы. АIсас Муслагъа, ЦIаIхее, Миххье маIгьабна вазият яраммишивхьа вобна.
Югданий ихьес сенис, лап са йигъыл’, имааджийс хиваршин джамаъаIтбы садыйнбыхьий. Гьар хивни инсанарше джон хайбы, йаIхъбы, вейхбы, горханабы, зияратбы абрелхъа хъаляээ. Мана йишда ватан вобна. Къийхъийн йигъ нягьаIд шалхъа хъалес ыхьай , шавукIле джад ацIа дешодун.
Гьайни дёлесийвалее Сувал’ни дерайл’ маIгькамын гёгъуйбы ыхьа. Манчиныб чина иш гьавъуна. ЦIаIхни хивее, хьян баругыле кIена кIейидхьу. РаIгьматтыгъ Мерденов Рамазан дайийн хъав одкIул. Шукур Аллагьылхъа, мааъар инсан ыхьа деш ва къоншибышисыд зиян ыхьа деш. Анджах хивни йыIкьнеедын хав харабайлхъа садкIыл. Сабара сенбына гьихъана ман хизанбышиква гяцIуйн хав ыхьа. Мани хааъар мигьман камехьена дешдий. ГьаIшде духйе , йишбы гьар шагьарбышее ешемишоохьи. Анджах манбы гьар сен хивеехъа абайленбы. Джони джанас сагъвалла гьевлена. Манбыше джон хав аляъасын. Гьел’бедти, инсанаршед кумагыс имааджийбы гьаъасынбы. Сенис маIгьад ойкIалан хайбы, йицIабы Сувал’ни магьаIлыл’ камехьи деш. Ман йишди гыргынкъусын хаджалат водун. НягьаIб мана дагъамийвалла гьаIллааъас вухьай, шакIле къеджи деш.
Гойнед хиваршини администрациебышди хаIбынбыше инсанаршис хабар гьевлес вуккан, агар ман одкIулыйн хайбы ваяхуд гьыIгъаткыр ааIн хайбы хъаъасдимее гьоIкуматыкен гьиджо кумагий гьеххъас аIхас. ОIгийл’ , страховать гьауйни хайбышис кумагний гьелен. ГьаIшде вобнане, дешдане мана программа ?
Гьасре Сувал’ни дерайл’ тезеда аляъан хайбы , ойкIаланчиле хаIдда ихьеджин; лампайн иших гёдхьанан, бухарайн кума алхъааIн хайбы хаIдда ихьеджин; ушахаршини аIхъаIнабышин сес къийххьен хайбы хаIдда ихьеджин. Аамин!
