ЦIаIхбы, йихъбы, кьоIбле Ватаннан халкь водун. Йишди миллетни хаIббананбыше джона Ватан гьам Дагъыстан, гьамыб Азарбайджан гьыIсабааъа.
Азарбайджан Республике хьебцIалилхъа авадкьурийн цIаIхбышин хивар водунбы. Закатала районена Дагълы донана хив (оIгийл’ АIли Байрамлы) энки чIакIни хиваршина са вобна. Гьиняаъар хьебни аазырыле гьеххана инсан гуд’мишехьи. Дагълыйна хив Къалал, Кьаркьвай, Кьас, Эзгилли хиваршенче кочмишхьайни халкьбыше къурмишавъу. Совет гьуIкуматни вахтал’ хивни джаIмаъатын хаIббананбы кIалхозе ишлемишоохьи вухьа. Мани тасарруфатенче доюкан пешекарар, малдарар, сагъмалчер хъигъебчIу. Манбы гьуIкуматни ахтыйни наградабышис лайикьба къавджу. Манбышиле гъайре Дагълыйни хивын районыс, оIлкайс, дюнйейс камалукан къуллухчер, дохтурар, маIъаллимар, инженерар, устадар гьуво.
Мани хивни гьаIшдийни джегьилершед джо вухьайн джигайн до югвалис агъмишаийниме хаIдын гьаракатбы гьаъа. Дора сабаранбышиква шу танышааъас.
Амиров Намик Фамилна дих 2002 сен Дагълы хивее (АIли Байрамлы) едике ыхьа. Муса Мусаевни доюлин хивын йыIкьнекин мактаб таамау. Манчиле хъийгъа Намик Азарбайджан девлетни нафтни ва промышленностни университетехъа иккечIу. ГьаIшде мана мани университетна 3 курсна телеба ворна.
Намик Амирове MECANICS командайни таркибе TeknoFest Azerbaijan 2022 конкурсе иштыракау. Намикни командайн 2 проекте джон гьунарбы гьагу. ЦIеддыйн проект робототехникайква багълыда ыхьа. Мааъаб манбыше 1 джига авхъу. Джегьилерше аIкIеликвана верыгъна панель гьазиравъу. Манчин стационарни верыгъни батареебышиле 38% энергие хаIбба гьооли.
КьоIдъэсди проекте Намикни камандайн BakuSkills конкурсе иштыракау. Ман проект кафебышее, ресторанбышее сервисын кумаг гьелени роботыс къадсырыйн ыхьа. Манбыше робот 3D принтере чапау. Манчина кьаркьала лотни формайл’ гьазиравъу. Роботыхъаб 12 кило алебтIасда имкан вобна. Манчини вукIлел’ пыл кIеччуйниме баIдже гьавъу. Махъа пыл кIеччуйнкъаI, роботын сагъулва эйгьи. Роботыс «Чайл Е» до гьуво.
Йишди макьалайна кьоIръэсда кьаIгьраман АIлиева Гюнел’ Зафарна йиш ворна. Мана 1997 сен Закатала районни Дагълы (АIли Байрамлы) хивее едике йихьа. Гюнеле хивын йыIкьнекин мактаб таамау. Гойне хьинне Бакуйни девлет университетын физикайн факультет быкрау, бакалаврна дараджа алебтIу. Манчиле хъийгъа хъаIдхъий Турциейл’ ОIмер Халисдемирни университете давамау, физикайни магистрни дараджайс лайикьра къайджы. ГьаIшде Гюнел’ АIлиева физикайна маIъаллима ишлемишейхьи.
Г. АIлиевае TeknoFest Azerbaijan 2022 конкурсни социални технологиебышис къадсырыйни номинациее иштыракау. Мана KRIPT 10 камандайна хааIрна йихьа. Гюнелни баджарагъыква манбыше 2 джига авхъу.
Джегьилерше гьагуйни проектна макьсад шигыртарше геледжагъысда хъобкуна пеше сечмишавъий вухьа. Мани сардан MyFuturejob сайтыд гьазирау. Манчин шигыртаршис геледжагъылисын угъурыкван йаIхъбы тIабалаъас кумаг гьели.
Ши кьоIни камалукани джегьилершини гьаIкIее хабаравъу. Шахъаб маIгьбын гьаракатукан инсанар кIыл’ба дешобунбы. Манбы ашкарааъас вуккан, манбышди гьаIкIее окIанас ыккан. Умудааъана, манчее шу шас хыл’ авхъасда гьуIрматыкван кIазет хъаIдаххъанбы.
