Аlхырейни сенбышее гьокуlматни «100 мактаб» донани программайка республике хаlдда ишбы къаджы. Къийна манчика багълыда хаlдданан мактаббы абрелхъа адчы. Маlгьдын ишбы Рутул районни мактаббышейид ыккыйнбы.
Гьайни сен мани программайка районни хьони йыlкьнекни мактаббышей ремонтбы гидгъыл водунбы. Манбы Йыlгьракын, Гылмецlын, Аранын, Джилихурын, Цудикын мактаббы водунбы.
Гыл’мецlни хивын мактаб гьинчиле хаlдда сенбына гьихъа аляуйн водун. Мана кьоlбле мартабанана бина вобна. Къийна ман мактаб хъаlдхъыйни министерствайни стандартбышис уйгъунда дехьайхъа гора, тезелемишаъан. Мактабее ремонтын ишбы гидгъылыйн хаlбба вахт дешда. Гьаlшде устадарше мактабна чардах бадалавъу, адни ишбышилхъа гибгъыл. Манбышди фыкрее мактабын адын баругбы гипсокартоныка, пlолбы, аккабы, отоплениейна система тезелемишавъуй вобна.
Районни хъаlдхъыйни управлениейна хааlрна Ферман Аlгьмадбековни увгьойка, «100 мактаб донани програмайка шаца районни сабара мактаббыше ремонтын ишбы ыккыйнбы. Гьайни сенийн ремонтын ишбы ыккыйниме республикайни хазнейнче 20 милйон манат пылна къавукку. Сабара вахтна гьихъа мактаббышее ыккеккани ишбышика танышхьесдимее районее республикайна промышленностнайий алверна министр Низами Халилов ыхьа. Мана къаджыйни ишбышиле разийра аху. Къийнийни йигъыл’ гыргын ишбы аххъыйни пlланыка ал’гьааl водунбы.
Гыл’мецlни хивни йыlкьенейкни мактабе ремонтын ишбы Гьаlджиев Гьаlджее хаlбвалла гьааъани «Каспий Гарант строй» ташкилатын ыккекка водунбы. Къийна мааъар йицlыйре инсан ишлемишехьи. Манбыше гьаlракатыка хылехъа алябтlына иш вахтал’ быкырааъас чалышмишоохьи вобунбы. Манчисыд устадаршихъад гьеххаалика тикинтийн материалбы водунбы. Мактабыс ремонт гьаъасдимее гьокуlматын йихьыдле милйоный ёкьудваlш аазыр манат пылна гьуво. Объект августни вузани йицlынчил’ таамауй фыкрее водун.
Устадаршина десте Мишлешни хивейнчена вобна. Манбы Гьыlсейнов Джангьангир, Гьыlсейнов Эскер, Аlбдуллаев Магьаlммад ва мебынбы вобунбы. Манбышди увгьойка, гибгъылна иш сыкlылбаб экlба быкырааъас джохъад имканбы водунбы.
Мактабе ыккеккани ремонтни ишбышиле хивын джамаъаlтыд рязийда. Манбышиле хаlбба мактабейхъа хъавалесын ушахар шадоохьи. Манбы тезе хъаlдхъыйн сен уфтанни мактабеехъа хъавалес гьаlзироохьи вобунбы.
