Мишлеш Сувал’ни маIгьалыл’на эн хаIбна цIаIхбышда хив вобна. Мани хивее администрацие, мактаб, больница, клуб, ушах бахче, ветернар участок ва медын ташкилатбы водунбы.

 Хивын джегьил’ хизанбы кочмышхьайхъа ил’дяаку,  сен-сениле хив хаIбхъоохьи вобна. Манчиква барабардад хивни аIрайлин гьаъасын тасарруфат ишбы хаIдхъехьи. Ман ишбы йаIхъбышиква, йыIгъаршиква, гармабышиква, вейхбышиква, гимгабышиква багълыдананбы водунбы.

Мишлешна хив Самур дамайни сагъни ва солни сурал’ вобна. ДжамаIтни аIрее манчикIле гунайл’на йиссейна уба ва къузайл’на тезе убава эйгьи. Манбы сана-санчиква хьебни йыIгъарше гийцIан. КьоIбле йыIгъ поштини йаIххъынбы, сайиб пиядаба илгъеебачIена йыIгъ вобна.  МанчикIле джамаъаIтни аIрее  АIрифна йыIгъва эйгьи. Мана йыIгъ депутани вахтал’ АIриф УIмаровее алявъу.

Гыргын кар сениле-сенилхъа  йиссе хъехьи гийгъал. Манчис хыл’уIвхас вуккан. Мана йыIгън акьвад тезелемаишаъасда вахт хъабы. ОIт’мишхьайни уIл’джумее , мана йыIгъ хъааъасдимее , хивни джамаъаIтын имааджий гьавъу. Мана хъааъасда мислягьаIт тезера сечмишауйни Мишлешни хивни администрациейни хааIрункъвее Ислям Ибрагьимове къавдже.  Админстрациейни харджийква йыIгъын даха бадалау. Ман тезе администраторын хивни хайиреехъан цIеддыйн атдым водун. ГьаIшде мани йыIгъыле окIанче, осбышике хъооIн адамера, шалабышикван едар, ушахар  раIгьатба , къорху дена илгъебачIенбы.

 Ши хивни джамаъаIтыкIле эйгьен: « Вушди къел’-хылес кьудрат гьелен!» Ислям маъаIллимысыд тезе ишил’ угъурбы аIрзуламишаъа!