ХХ-ъэсди асырее дюнйел’ эн хаIбна даIвъий вухьа. Мани даIвъийе хаIдданани оIлкабыше, миллетбыше иштыракау. Милйонбышиква джегьил эскерар, кьаIсинбы, ушахар манчин дюнйейле вукку. Аазырбышиква шагьарбы, хивар дагъылмишау.
Мысвалике, мыкаалике сан-гьыIсаб дена инсанар гьабтIу. Фашизмайн оIги ыIхасдимее эн уфтанни, гуджнаквани джегьилерше джанбы гиххьы. Анджах инсанарше манчин дарс ил’детIуйн. Мани «фашизм», «нацизм» донани азарын мед ярабы тезелемишаъа водунбы. Къийна ман кар шакIле ашкарда Украинее къеджи водун.
Йишин бордж водун ХаIбни Ватанни даIвъийн дарсбы кIелихан гьидяуй. Манчин зиян, уцIур , ыкIар гьидёвойн хав йишди гьокуматыл’ гьассыр деш. Хьулейре сипIырийне айху, хьулейре етим ушахне аху, хьулейре кут’не мани даIвъийн гьарсыл’ дюнйейни акьвал’. ГьаIшдед манчин ярабы мейид водунбы. Эн хаIдын зиян манке йишди оIлкайс хъетIу.
Мани давъийе иштырак йишди баба-дидершед гьауйн. Сабарабы тылыл’ ишлемишивхьа. Манбышда игитийвалла ши кIеливханааъа дешобна. Сени ветеранаршини едигарыс къадсырыйн йигъынджагъбы илгъечIи.
Гьайни аIхреени вахтал’ мана иш гьалеб гьаIракатеехъа эвчIу. Хиваршее гьаIйкалбы тезелемишаъу, дешди джигее манбы гиххьы.
ЦIаIхбышди ветеранаршини Союзыс садрывалла гьаааъас АIгьмадов НезирмаIгьаммад Эфендийна дих гиххьы. Мани джамаъаIтни ташкилатна метлеб ветеранаршиква багълыданан ишбы гьаIракатеехъа адчий вобна. Махъа ХаIбни Ватанни даIвъийни ветеранаршиква саджигее локальный даIвъийбышин ( Афганистан, Чечня, Дагъыстн, Украина) ветереранар гябакIа.
Июнни вуза Н. АIгьмадовее джегьилершини кумагыква ветеранаршис къадсырыйн футболун оIюн цIаIхбышди джегьилершини аIрее алгъавгьу. Джуни джибеенче хаIдданан харджий гьау.
Къийна мана иш даянмишивхьа дешобна. Мана чалышмишехьи ворна хиварше ветеранаршиква багълыданан ишбы ыккейс. Гьайни дёлесийвалее мана РГВКА-ни теле-верлиш дестейква Сувал’ни маIгьалылхъа гьаркIын. Манкъвее журналистыква Бейдуллагь Ибрагьимовыква ва оператор Мавлиддин ГьаIсиловыква ХаIбни ватанни ветеранаршис къадсырыйн верлиш гьазирау. Манбы ветеранаршини духйешиква, йишбышиква, невабышиква горушмишивхьа.
НезирмагьаIммад АIгьмадовни увгьойква ЦаIхни хивее ветеранаршис къадсырыйн хаIдын мемориал ачмишауй водун ва хиваршее джурабаджур спортын оIюнбы джегьилершини аIрее алгъавгьуй фыкрее водун. Манчиле гъайре, патриотически тербие гьелен горушбы мактаббышее алгъагьас.
Мани ишее ши Н. АIгьмадовыс угъурбы аIрзуламишаъа !
