Сура сен быкырхьа  Украинее спецоперацие аIлгъааIн. Манчина цIеббыйна сабаб Украине яратмишихьайни фашизмайна, нацизмайна кок юзмишавъуй вобна.

Мани ыIхна хаIдхъыхьа,  эбыканийий машекани  ярайлхъа  садкIыл. КьоIдъэсда сабаб, Донбас ешемишехьени джамаъаIтын ихтиярбы гозетяуй вухьа. 8 сенн водун Киевни режимын мааъад ешемишехьени инсанаршис диндж гьиделен.  Хьебыдъэсда сабабыб, йишин гьоIкумат  НАТО-ни гьыIджумыке къорамишауй вобна. Гьел’бедти, ман спецоперацие гигъаласда мислягьаIт вахарийба  деш кьабылявъу.  ГьоIкуматни ХааIрункъуни Владимир Путинни увгьойка,  мебна чара авху деш. Къийна Россияйни армиейн офицера,  Росгвардиейн контрактникар, ДНР-ын, ЛНР-ын ополченцар Украинее фашистаршини, нацистаршини режимыква вурушмишеебаххьи вобунбы. Дюнйейл’ ешемишеебаххьени инсанаршис кIелидхынийнбы КьоIдъэсди дюнйейл’ни даIвъийн дарсбы. Къийна мед Авропайни оIлкабыше, Америкайн укронацистаршини режимыс ярах гьели водун. Манчиква гьалед даIвъийн цIа къурдаламишаъа. Анджах хъобкувалла Россиейни сурал’ вобна.  Ненбыйий хъобкуба, манбы гъамувхьесынбы.

Украинее аIл’гьааIни спецоперацие  цIаIхни миллетни джегьилершед  гьаIракатыыкван иштырак гьаъа водун. Манбыше джон Ватанни гьийдын бордж игитерше хьинне хъели водун. МагьаIбна шахъаб хив дешда, спецоперацие джони хивеенчена джегьил’ дешда. Сабара хизанбышеенче 2-3 чоджар мааъаб вобунбы. 

Манбышин сабарабы отпускабышис хъабы, меб сабкIыл абкIынийнбы.

Гьайни дёлесийвалее 10 йигъни истирагьатыс Мышлешехъа АIшдиев   АIбутIалиб Ибригьмана дих хъары.  Мана хивын игит’хьинне къаршламишау. Манкъукан горуш Мишлешни хивни администрацие илгъечIу.  Хивни хааIрункъуни Ислам Ибрагьимовни увгьойква, горуше АIбутIалибе вазият йишонавъу. Манкъвее йишди офицераршина, эскераршина игитийвалла агъмишавъу. Манкъуни увгьойка, къийна Армиее хаIдын инам, ыIгьтибар  гьокуматни Президентылхъан, оборонайни министрылхъан ва РФ-ни Генеральный штабылхъан водун. Джо йигъ-йигъыле гьихъа аIлгьаа вобунбы.

АIбутIалибее эскерна къуллух гьааъан хаIдда сенбы водунбы. Спецоперацие гидгъылни йигъыле мана мааъар ворна.

АIбутIалиб Ашдиевыс  Мишлешни хивни администрациейни дойиле горушее шарафукана грамота гьувы. 

ЙицIыдле йигъ хивееъад гьау, мана мер джуни гьамазаршисахъа саркIыл’ аркIынна.

АIбуталиб хьиннен игитер шахъаб хаIбба вобунбы. Ши манбышис зарада спецоперацие таамхьай ва гъамувхьай аIрзуламишааъа. Сагъба, саламатба джони хизанбышеехъа хъавалес кьисматхьен. МыкIана чара манбышисахъа хъыздяаххана. Амин!