Сентябрьни 5-8-ле Владивостокни шагьарее АIкьанани машрикьын экономикайн форум (Дальневосточный экономический форум) Россиейни Президентни Владимир Путинни иштракука илгъечIу.
Мани форумее Дагъыстанни хааIрынкъве Сергей Меликове иштракаъу ва мааъад йишди республикайс ааидын тадбирбы къаджу.
Форум гигъалассе гьихъа республикайни хаIрынкъве иджлас алгъавгьу ва мааъад туризмайс аидын масалабы агъмишау, няъас увгьое хъийни йыгъыл’ Владимир Путинни хаIбваликва ГьоIкматни советын(Госсоветын) туризмыс къадсырийн иджлас илгъеджес ыхьа.
Сергей Меликове иджлас ыккеканкъаI увгьойн: «ХъоIни сен, Дагъыстанни Къаекентни районе, дерйагьни къырагъыл’ курортхьиннена шагьар ва быкырнироссиейна ушахаршина марказ аляъа гигъалас. Мани джигее Сочи шагьареедын хьинен курорт, ва «Артек», «Орленк», «Океан» хьинен ушахарше истирагьат гьаъан марказбы аляъас. Ман карбы гьаъас 200 гьектар джигайн ыккан, ва маъад 30 аазыр инсан ахвасын отел’бы аляъас фыкырей водун. Мани карбышис 300 млрд пылын ыккан.
Мааъад истирагьат, малидже гьаъас гыргын шараитбы водонбы, ва ши чалышмишувхьесынбы махъа инвесторар хъобтIул ман проект таамаъас. Шакле ацIан ман проект быкырауий вахарийн кар деш водон, амма умуд вобна гьоIкматни сурале шас кумаг ихьесын ва Дагъыстаней курортна шагьар аляаъас ваIхаIсда. Гьайни сен Дагъыстанейхъа 1,5 млн. турист ары ва манбышис йишда республика кьабыл’ивхьана. Республикайни экономикайс ман хаIдын кумаг водон»,-ва Меликове увгьо.
Сайид мани иджласе Сергей Меликове курортни шагьарбышей туристаршин полиция къурмишаас ыкканва увгьо. Манъкуни увгьойква маIгьдын полицие Москвайни, Владивостокни ва Новосибирскни вилаетбышил’ водонбы.
Владивостокни шагьарей алгъааIни форуме С. Меликов «Интерфаксни» журналистаршиква горушмишхъа ва манбышди суалбышис джаваббы хъеленкъаI сабара цIедын тадбирбы ацIараляъу.
Манкъуни увгьой ква, МагьаIчкъалайни дерйагьни портна дараджа инвесторар хъобтIул ахты хъааъас фыкырей водон ва ман «Север-Юг» транспортни ва логистикайни коридорын са сура ихьес ыккан.
«Манче прикаспийский гьуIкматбышилхъа ва мани гьуIкматбышиле Россиейлхъа оIгийл’ Авропайле хъадайлен малбы гьаххъас вахарийда ихьес. Манчиле савагьийда ши республикайн транспортын ва логистикайн коридор «Север-Юг» артмишаасдимей, йаIхъбы хъаъа ва артмышаъа водунбы, Азербайджанни ва Россиейни сергьадбышейдын инсанар, машинбы, ва поездбы къеккан пунктбышин ремонтбы гьаъа водонбы. Ши «Баку – Ростов» донана трасса гьоIкматни кумагуква хъааъа гибгъыл вобонбы»,-ва республикайни хааIрынкъве ацIаляъу.
Хъийни йыгъыл’ ГьуIкматни советни (Госсовет) иджласе Владимир Путинни хаIбваликва туризмын масалабы агъмишау. Мани иджласе Дагъыстанни хааIрынкъве Сергей Меликове иштиракаъу, ва маъад республикайни туризмайн масалабы агъмишаъу.
Россиейни Президентни увгьойква Шимал Кавказыл’ туризмна ва рекреациейна вазийят ахты хъаас вукан ва Каспийни дерйагьни кIане «Каякент» донана курортна зона тезелемишааъас вуккан.
Манкъуни увгьойква, советни девырыл’ мана курортна зона гееб югна вухьа.
Сайид эгьес, Дагъыстанни хаарынкъве мани форуме сабара аIлакъабышис къолбы цIыцIау. Масалан С. Меликове ва «Туризм.рф» донани корпарациейни генеральный директоре Сергей Суханове республикайл туризмын ишбы къаджесда савда багъламишавъу. Мана савда багъламшаанкъаI Россиейни Правительствайни хааIрынкъуна маавин Дмитрий Чернышенко ыхьа.
Эгьес эйхьи, АIкьанани машрикьни экономикайни форуме Дагъыстанни хааIрынкъве хаIдын иштиракаъу ва мааъад агъмишауйин тадбирбы аIхрейхъамее къаджее республикайни экономикайс, инсанаршис ишбы ыхьайс, республикейхъа туристаршин абый хаIдхъыхьайс ва сабара медни карбышис хаIдын кумаг ихьес.
Ин ша Аллагь геледжагъыл’ Дагъыстан Россиейни туризмайна марказ вухьес ва шасахъа садджу йишди регионбышиле джаб деш, хаариджи гьоIкматбышлеб мигьманар аблесынбы!.
