Августни 30 –чил’ Рутул районни маданиятни марказе районни маъаIллимаршин августеедын иджлас илгъечIу. Ман районни хъаIдхъийни управлениейни хааIрункъее Ферман АIгьмадбегове ыккы. Махъа сабыйни маъаIллимаршини гьийд саламыкван чыхыш Рутул районни хааIрункъвее Ибрагьим Ибрагьимове гьау. Манкъвее джуни чыхышее районеени хъаIдхъийна аIваалат юшенавъу ва мактаббы тезе хъаIдхъийни сенийс нягьаIдый гьазирау водунбыва увгьы.
Иджласее районни хъаIдхъийни вазиятни гьаIкIеедын доклад «Стратегические цели и актуальные задачи обновления, содержания и повышения качества образования в МР «Рутулский район» районни хъаIдхъийни управлениейни хааIрункъее Ферман АIгьмадбегове гьаы.
Хъийгъа мани иджласее районни хъаIдхъийни управлениейн къуллучерше, мактаббышди директорарше, агъсаххъал маъаIллимарше чыхышбы гьаы.
Иджласни аIхрее югба ишлемишоохьени маъаIллимаршис Рутул районни хааIрунккъвее И. Ибрагьимове дипломбы ва грамотабы гьувы. Манбышди аIрее ЦIаIхни дерайн маъаIллимарыб вухьайнбы. Джона сайир Лекни мактабна урусыни мизелин ва адабиятын дарсыбы гьелена АIгмадов Вагьаб Магьаммадна дих ыхьа.
В. АIгьмадов Лекни мактабее ишлемишехьен къаюххьад сениле хаIдда водун. Мана махъа ишлемишхьес Дагъыстанни девлет педагожи университетни филологиейни факультетын цIаIхни ва урусни мизяршин шоIъба таамауйле хъийгъа . Мани вахтни аIрее манкъвее хаIбба билигыкван шигыртар хъавуккы. Вагьаб АIгьмадове къавуккыйни джегьилерше джурабаджур институтбы, университебы, коллежэбы таамау. Манбышди гьаарункъвее гьаIшде са санаъаIт гьаъа водун. Джегьилерше джони маъаIллимна гьуIрамтат гьаммаше авхъаахъана. Манкъун до садджу югвалис агъмишаъа. Мактабни маъаIллимаршини, ишчершини ва хивни джамаъаIтни аIрее манкъухъаб хаIбна гьуIрмат вобна.
В. АIгьмадов йишди миллетни таарыхна, мизена, адабиятна, маданиятна гьаваскар ворна. Манкъвее гьаммаше манчиква багълыданани йигъынджагъбышее иштыракаъа. Мана чалышмишехьена джуни ушахаршисыд миллетылхъа майил’ гьаъан тербие гьелес .
Вагьаб маъаIллим, вас джнанан сагвалла ши аIрзуламишааъа! Ши гъу грамотайква табрикаъа. Вас югуни ацIааликван, тербиейкван телябабы гьазирааъас кьисматхьен!
