Къийна, эгьес эйхьи, миллетын до, тераф гьуваджен ва дагъамийвал’бы агъмишаъан кар са йишин кIазет «Нур» водун.
Йишди миллетыхъаб не республикайни халкьни маджлисе, не джегьилершини парламенте депутат, не джамаъаIтни палате уIзву, не чIакIни къуллухбышил’ инсанар дешинбы. Манчиле гъайре, ааIли марказбышее, мактаббышее ишлемишоохьен текасейрак ааIлимар вобунбы. МаIгьабна вазият ярамишивхьайн тахсиркарар шиджаб вобунбы, няъас увгье ши са мислягьаIтеехъа гейб четинба хъабайли. Са кар гьаъас гивгъалассе джаб, гьаарункъвее джулхъа ёргъан цIыцIааъа гивийгъал.
Къийна миллет дюнйейни акьвал’ ахвасдимее, манчина юшенааъана, оокIанна миз’, таарых, адабият, маданият гьуваджес ыккан. Манчиле къайре, ши йишда кок юрдыл’ утIумааъас вуккан. Ман карбы гьид’ваджее, ши менни миллетбышилхъа къарышмишивхьа, ит’батувхьесынбы.
Миллетна садибийвалла гьувааджесдимее аIхреени сенбыше хаIдда гьаIракатыкван ишбы къаджейнбы. Манбы СМИ-ква, мизеке ва адабиятыке гьаIзирааъани санаъаIткараршиква, къеккани мактаббышди, ыIлимни, методиквайни , художествееный китаббышиква багълыдананбы ыхьа.
Сен-сениле мана ишиб дагъам хъоохьи гибгъыл вобна, няъас увгьее далыйле хъооIни джегьилершини аIрее миллетни мизелхъан, маданиятылхъан, таарыхылхъан гьаваскарар сейракба къооджи. АцIа деш, шале хъийгъа манчиква маIшкьулоохьен джегьилер вухьесынбымы, дешхьее вухьесдешмы….
Интернет хъигъечIуйле хъийгъа , кIазетылхъан гьавас йишди хъаIдаххъанбышди аIрее кIыл’хъыхьа. Анджах , интернетын кIазет бадалаъас деш. Кагъызеххъа одкIунийн, гьаккалаъас аIха деш. Интернетее гьорбыд эйхьенбы.
Мани дагъамийвалихъа ил’дяакы, кIазет хъаIдаххъанбыб кIылба дешобунбы. Манбышин хаIббананбы ешбышеебын инсанар вобунбы.
Месалайс Бабаюртни районеени Быршни хивын джамаъаIт гьагвас эйхьи. Мааъаб рутулбы ешемишоохьи . Мани хивни пенсионерарше, маъаIллимарше гьар сен «Нур» ойкIанан, йиджид хъаIдаххъан. Йишди Бабаюртни районеени мухбирни МаIгьаммад ГьаIсиловни увгьойква , Быршни хивни гимгее «Нур» камехьи деш. Дюнйел’, гьоIкуматыл’, районе ыхьайни гьаIдисабышин хабарбы манчеенче аляатIа.
МаIгьдын кIазет хъаIдаххъанбышин гимгабы медни хиваршеейид водунбы. Гьел’бедти, манчин шас ишилхъан гьавас гьели. Шинаб чалышмишоохьенбы югун-югун миллетыква, йишди инсанаршиква багълыданан макьалебы окIанас.
Шокед хааишаъан, кIазет’ окIне, хъаIдхъе, еймишеъэ. «Нур», мииллет’на эл’чий ворна !
