Къийна Россиейн гьаракатыква украинайн халкь азгъунувхьайни миллетчершике темизяаъасдимее мааъад спецоперация ыккекка. Манбышин оlги алятlасдимее хаlбна иш вуккекка. Эскерарше дагъамийвал’бышихъа ил’дяакы, душманарше аххъыйн шагьарбыйий хивар сакlалаъанбы.
Шаlъбанов Осман Динмагьаlммадна дих спецоперацие гидгъылни цlеддыйни йигъыке мааъар ворна. Манкъве гьаlкlени игитис аваакlыйн ишбы къеджи. Са офицер хьинне хаlбба тезеба спецоперациейхъа хъабыйни джаванаршис кумаг гьели. Манбышис вурушбы ыккейсын къулайбы хаlдхъаъа.
Осман едике 1974-ъэсди сен Муслагъни хивее ыхьа. 1991-ъэсди сен хивын йыIкьнекин мактаб быкырау. Гьаманиджар сен мана Дагъыстанни хивни тасарруфатни академиейхъа иккечlу. Хъаlдхъый таамауйле хъийгъа, 1997-ъэсди сен Ватан кьорамишааъас эскерийвалейхъа аляртlу. Манкъуна эскерийвалла Амурни вилаетни Благовещенскни шагьарее илгъевчlу.
Ватанни гьийд бордж хъувойле хъийгъа, Осман Дагъыстанейхъа саркlыл. Мана 1999-ъэсди сен ДР-ни МВД-ни ОМОН-2 ишлемишехьи гиръыл. Мана вахт Дагъыстаннимее сибыкна вухьа деш. Милициейн ишчер гьар йигъыс хаlдни дагъамийвал’бышика растына хъавайли вухьа. Республикее эйхьени терактбыше, джурабаджура джинаятбыше шавусджад диндж гьели ыхьа деш. Осман джуни командираршикайий гьамбазаршика саджигее мани саягъыл’ни нагьаlкьийвал’бышика мубариза вукку. Республикайна водун конституцие гьувааджес чалышмишхьа. Мана гичlыле хъидаlркыlн, ишиле аркIын деш.
О. ШаIъбановни ишис гьокуlматын, манкъуни командирарше, гьамбазарше ахтына кьиймат гьуво. Мана джурабаджура медалбышисый ахтыни мукафатбышис лайикьра къаджы. «Отличник милиции», «Лучший сотрудник специальных подразделений», «За отличие в службе ll и lll степени» ва сабара медын наградабы гьуво. Манчиле гъайре Османыхъад РФ-ни МВД-ни суракед гьувойн таlрыфын кагъызбыйий грамотабыд водунбы.
Мана Каспийскни шагьарее ишлемишехьени ОМОН-2 «Скорпион» дестее чалышмишехьи ворна. Къийна манкъве Запорожиейни Черниговни ва Энергодарни шагьарбышее хидмат вуккекка. Джуни гьамбазаршика саджигее инсанаршина сакитийвалла гьувааджи.
Шацыйни сен Османни баджарагъыс Муслагъни хивни джамаъаlтын кьиймат гьуво. Манбыше мана хивни администрациейна хааlрна сечмишау. Амма мана мани къуллухул’ хаlрра аху деш. Украинее спецоперация гидгъылмее, Османее къуллух къалебчына. Мана Ватан миллетчершике къорамишааъасдимее гьамбазаршика саджигее махъа аркlын.
Осман ШаIъбанов югна командир, гьамыр югна хизанна гьам саIгьыб ворна. Мана хьебни йишна дек’ ворна. Манбыше хаlм-йигъ дек’ эскерейнче хъалес гозетяъа.
«НУР» кIазетни редакциейн Османыс ва гыргыни спецоперациее иштыракаъани игитершис сагъба-саламатба хизанбышеехъа хъабый аIрзаъа.
