Октябрьни къайимоленчил’ МаIгьачкъалее, таарыхни «Россия- йизын таарых» музейе шейх Джабраил’-эфендийни едигарыс къабсырна маджлис илгъевчIу. Мана « Возрождение Цахурской долины» фондын ДР-ни миллетни сиясатни ва динни ишбышди министерствайни, сайиб ДР-ни Муфтиятни кумагыква гьазиравъу.Октябрьни къайимоленчил’ МаIгьачкъалее, таарыхни «Россия- йизын таарых» музейе шейх Джабраил’-эфендийни едигарыс къабсырна маджлис илгъевчIу. Мана « Возрождение Цахурской долины» фондын ДР-ни миллетни сиясатни ва динни ишбышди министерствайни, сайиб ДР-ни Муфтиятни кумагыква гьазиравъу.
Мани суваабыквани маджлисее иштыракаъас ДР-ни министерствабышеенчен къуллухчера, ааIли мактаббышин ааIлимар, Муфтиятын ишчер, имамар, телябабы, журналистар ва хиваршеенче, районбышеенче, шагьарбышеенче цIаIхбышин джамаъаIт ады.
Маджлис ДР-ни Муфтиятни каатибе ГьаIсан-эфендий Магьмудове ачухавъу ва вуккы. Мана Къуръанеени сурайква гибгъыл.
Хъийгъа маджлис вуккеканкъвее Джабараил’-эфендийни гьаIкIеедын маIълумат, ыIмрена йаIхъ, диныква алаакьан ишбы йишонаъасдимее, абыйни мигьманаршис хааишаы.
Джуни чыхыше ДР-ни миллетни сиясатни ва динни ишбышди министрни цIеррыйни маIъвыне Арсен Магьмудове увгьойн : « Эйгьи вод, кьоIдле кьийматыкван кар эхьи : вахт ва едигар. Шейх Джабарил’-эфендее къаджейн хаирыкван ишбы , къийнад йикIел’ аху водунбы. Мана раIгьматыххъа аркIынийн 120 сен ыхьейид, манкъвее хайирыквана гов садджу вудж едике ыхьайни джигееджаб деш гьабсыр, едигарыс джун динын асарбы гьар джура республикабышил’, вилаетбышил’, оIлкабышил’ гьадсыр. Къийна магьаIбни шейхарше гьадсырыйн ваъаIзбы йишди джегьилершис дарсбы ихьес ыккан. Ман йишин аIдатбы, гьайни дагъамни вахтал’ гьуваджес ыккан».
Дагъыстанни муфтийни маIъвыне АIгьмад Магьаммадове маджлисеехъа сабыйнбы Дагъыстанни Муфтийни АIгьмад–гьаIджий АIбдулаевни дойиле табрикавьу ва джегьилершис насигьаIтысын джуваббы къахувы. АIгьмад–гьаIджийни увгьойква, ши шейх Джабараил’-эфендийна дараджа гьуIрматыква гьувааджес вуккан, няъас увгьее мана гыргынкъункъусджар шейхна гьыIсабехьи.
Джабараил’-эфендийни ыIмрени ва джуни диныква багълыдани ишбышди гьаIкIеедын аIтрафлы маIълумат Дагъыстанни гуманитар институтни маъаIллиме Мурадула МагьаIммадове гьаы.
Манкъвее увгьойн : «Ёкудъэсда муршид Джабраил’–эфендий ал’ — ЦIахури едике ЦIаIхни хивее ыхьа, амма мана Азарбайджан, Лекит’ цIаIхбышди хивее ешемишхьа. ЦIерра мана Алмалы шейх ГьаIджий АIгьмад–эфендийна мюрид ыцхьа. Магьмуд–эфендий Сибирыле хъарыйле хъийгъа, Джабраил-эфендий джуни 300 мюридаршиква вирд алеетIас манкъусахъа хъабы. Сабара вахтале манкъус шейхна дараджа гьувы. Магьмуд- эфендийс Джабараил’ -эфендий гьаммаше хошра хъарайли ыхьа ва гьаммаше мана , манкъун динни сардан гьаIракатбы оIгунмишаъа ыхьа . Джабараил’- эфендийн гьаIракатбы къадже , Магьмуд–эфендийе манкъус инсанаршисын ваъаIзбы ва тербие гьелес иджааза гьувы. Мана боес джитIана, улехъа къуIмана, уфтанын ихтелет’ гьаъана инсан ыхьа. Джун мюридар духйебы хьинне авхъу. Джабараил’ — эфендий 1898 сенни октябрьни вуза ( Хиджрайква 1307 сенни 12 уIл’джумни аIхрее) раIгьматыххъа аркIын. …»
Джабраил’-эфендийни едигарыс къабсырни маджлисее чыхышбы «Нурул-ислам» кIазетни хааIрни редакторе Магьмуд ГьаIджиеве , цIаIхбышди «Нур» кIазетни хааIрни редакторе Байрам АIбдуллаеве, Халкьни Маджлисни оIгийни депутате Фикрет Раджабове , Дагъыстанни гуманитар университетни ректоре НуIгькьадий Багьмудкьадиеве , Рутул районни имаме ГьаIзрат – гьаIджий Кьадимове, ЦIаIхни сельсоветни хааIрункъвее Вагиф АIлиеве гьаы.
Маджлис аIлгъааIни аIрее Джабраил’–эфендийни гьаIкIеедын джитIан кино гьагу.
Маджлисни аIхрее ЦIаIхни дерайни имаме Эл’дар–гьаIджее мана къурмишаввъуйни « Возрождение Цахурской долины» фондыни джегьилершис ва мана гьавъуйс кумаг гьувойн ДР-ни миллетни сиясатни ва динни ишбышди министрыс Энрик Муслимовыс, ДР-ни Муфтийс АIгьмад-гьаIджий АIбдулаевыс, джамаъаIтчийс Мамед Мамедовыс, СМИ-ди журналистаршис, абыйни мигьманаршис минаттдарыйвалла агъмишавъу.
Гойне мани утагъее саджигеедын шикыл’бы цIыцIаы. Абыйни мигьманарше интервьюбы гьуво ва кофебы ширынныгъбышиква илёдгъу.
МислягьаIтеехъа хъабыйнбы гьар сен манчик акаран динегьлершини гьаIкIеедын маджлисбы алгъагьас.
