ЦIаIхни дерайни имамни Эл’дар гьаIджийни увгьойка, Сувал’ни маIгьалыл’ни хаIдданани манзикбышее кьуIмаалла дешда. Сабара манзикбышис аIдатый ремонт гьаый лазымда водун. Шахъаб ман ишбы гьаъас аIхасын инсанар гыргыни хиваршее вобунбы. Инсаныхъад пыл ыхьай, вар-девлет вухьай гьунар дешодун. Гьунар ман водун , агар хыл’ ачухда , йикI темизда ыхьай. Садакьайхъад хаIдын — кIылин эйхьен дешки. Манзик , йыIгъ, гарма аляъуй, йаIхъ гьавъуй ман эн хаIдын сувааб водун. Гьеленар, аляатIанар Аллагь ворна.
Къийнийна йишда гаф Мишлешни манзикни гьаIкIеена вобна. Мишлешни манзикыхъад йиссейн таарых водун ва мана алявъуйн асырбы эхьи. Манчина бинаа йиссейба вобна. Совет гьоIкуматни девырее манчилхъа фыкыр гьуво деш. ГьыIгъыдкырыйн, одкIулыйн джигабы аляу деш.
Юххьан, къыIлина, цывылихъа манзикни абна гьаваа гейб мыкIаба воохьи деш. УIл’джуман ва шаIгьдын кубар гьаъас дагъамийвалла ва даркашийвалла воохьи деш. Анджах кьыIдимына мааъад не пешт’бы, не отопление дехьайхъа гора, кубар гьаъан инсанар мыкIаалин авхъаахъа. АIсас манчихъа гора ешлибы, кьаIсинбы кьыIдимына кубаршис абайли деш. Аллагь разийра ахвана, мана дагъамийвалла къийна Мурадов Небийни Мурадни дихни кумагыква аIреенче абкIынна. Манчини гьаIкIеена хабар шас Мишлешни хивни хааIрункъве Ислям Ибрагьимове гьувы :
« ГьаIкIебаб шахъаб манзикее къуIмаалла девхьайквана дагъамийвалла вобний. АIсас мана къыIдимына воохьи. Сабара вахтна гьихъа заквасана йизда сыныфна гьамбаз Мурадов Небий Мурадна дих ющенхьа. Ши мислягьаIтеехъа хъабыйнбы, хивна йыIкьнекна манзик къуIмаъабкIааъас. Ман ишбы гьаъасын харджийбы Небее джулхъа алеетIу. Ши гьабкIын базареенче лазымын дурбабы, хамутбы, радиаторбы ва медын ыIгьтаджбы алишу. Манчина устад лезгибышди хивеенчена ГьаIмыд’ АIлидаров ыхьа. Манкъус кумаг йишди хивни МагьаIммаджанов Чинизе гьаы. ТокIаква багълыданан ишбыд МагьаIммадаIлиев Сааките гьаы. Мана иш мани устадарше са уIл’джумни аIрее гьавъу таамавъуна. Иш таамувхьайле хъийгъа, ши ёхламишауйн нягьаIдый отопление ишлемишехьи. Манчиле ши разийба авху. ГьаIшде раIгьатба манзикехъа кубар гьаъас ва ыIбаадат гьаъас вуIххъас гыргынбы вухьесынбы. Манзик къуIмаба вобна».
Манзикбы, йаIхъбы, гармабы, йыгъаIр садакьайс аляуй хаIдын сувааб водун. Ненкъвейий мани йаIххъеехъа харджийбы гьаы, Аллагье манкъуна баракат къат-къатна хаIбхъааъа.
Сабара сенбына гьихъа , Мишлешни манзикни гьийбна магьаIлла абрелхъа хъавалявъу. Махъа плита гёку, инсанар гивийаран джигабы хъаы. Манке ман ишбы гьаъасдимее, джуни кьул’пеенчен кумаг Мамедов Агъаширин дохтуре ва МаIгьарраме гьуво. МанбышикIлед сагъул-варул эйгьи.
Мишлешбышихъаб ишкарарыб, къуллухчераб еттыгъба вобунбы. Югданий ихьес, агар Небийн, Агъаширинын, МагьаIррамын хайир ишбы чечнайс алеетIу, медын хайирысын ишбы хивее къаджее. Ин ша Аллагь, гьаIмагьдыд ихьесын!
