Декабрьни 4-чил’ цIаIхбышди доюкани маъаIллимыс Шамхалов МаIгьаммадшарифыс Нуруллагьни духайс 60 сен быкырхьа.
ллагье гьар инсаныс ыIмрен язы ойкIан. Быкырба чичик акаран, са кьисматнан, са бахтнан инсанар воохьи деш. Дюнйейл’ гьар джурайн хасиятбынан инсанар вобунбы: сабы алдаахьвананбы, сабы гьыIдчатбы гьаъанбы, сабы оIгунмыш воохьенбы, сабы пахылыйвалла цIыцIааъанбы, сабы фитнаа, гъийбат гьааъанбы ва мебынбы. Анджах инсанаршини аIрее магьаIбна тайфаб вобна – манбыше джона иш вукIул’ кIебчу гьааъа.
Манбыше джоджаб джо мысаджаб гьихъа гьооли деш, мебынбышиле гьеххара ыккекка деш, добышихъабый мукафатбышихъаб хъигьна къадаахьван деш. МаIгьабни инсанаршина кьадир, вааджибыйвалла вахтбы аIрайле адкIынле хъийгъа ацIехьи, йаIъни таарыхын джаб манбышис кьиймат гьоолена.
МаIгьаммадшариф маъаIллим къидеджен хил’дже сенбы ыхьейид, редакциейн манкъукан алаакьабы гьувадженбы. Йишин кIазет хъаIдаххъанбышикIле мана лап югра ацIа ворна. Манкъвее сабара сенбына гьихъа кIазете йишди миллетни таарыхыква, мизеква, маданиятыква, адабиятыква багълыданан марахукан макьаалебыний ойкIан. ГьаIшде мана Закаталайни шагьарее ешемишехьи. Манкъуни нассылна кок Дагъыстанни Калел’ни хивыка багълыба вобна. МаIгьаммадшариф Шамхалов Калел’ни хивее 1962 сен едике ыхьа. ЙыIкьнекин мактаб Закаталайни шагьарее таамау. Гойне манкъвее Бакуйни шагьаре М. Ф.Ахундовни дойилин урусни мизений адабиятын институт таамау. Манчиле хъийгъа, джуна ыIмыр маъаIллимни санаъаIтыква алаакьа гьавъу. Хил’дже сенбына Азербайджан маъаIллимна ишлемишхьайле хъийгъа, Дагъыстанни девлет педагожи институтни аспирантуреехъа иккечIу; ыIлим ишбышиква маIшкьулехьи гиргъыл’; кIорааленче цIаIхни мизел’ ооъар ишлемишехьи гиргъыл’. Мани девырее МаIгьаммадшариф Шамхалове ааIлим Гьарун Ибрагьимовыс ед’ни мизелин мактаббышисын китаббы окIанас кумагау, ДДПУ телябабышис дарсбы гьуво. Анджах хизаныква багълыданани сабаббышихъа гора, манкъус кьисматывхьа деш Дагъыстанее меб юрд абчес. Манчихъа ил’дяакы, МагьаIммадшариф маъаIллимее гибгъылна иш гьаIшдеб гьаIракатее вобна. Манкъвее мысаджад Дагъыстанни ыIлимни мактаббышикван алаакьабы даянмышау деш.
АIхреени 15 сенни аIрее манкъвее Азербайджан цIаIхбышди маданиятыква, мизеква, адабиятыква, лугъатыква, хорагбышиква, фольклорыкыва багълыданан гейд уфтанын китаббы къайиккы. Манчиле гъайре, МагьаIммадшариф маъаIллимее цIаIхбышиква багълыда цIыцIауйни документал кинобышее иштыракаы. Са цIаIхбышди миллетыква багълыбанана маджлис мана дена Азербайджан илгъоочIи деш. Гьел’ бедти, сабара гьаIллагьидяуйн суалбыд, дагъамийвал’быд водунбы, амма манкъвее джун до цIаIхбышди таарыхеехъа югни сураке адчу.
МаIгьаммадшариф маъаIллимее цIаIхбы мысаджаб кьоIни оIлкайлхъа, кьоIни миллетылхъа джурааъа деш. Йишди миллетна адабиятна миз, адабият, таарых гьуваджий гозетяъас ыккан. Миллет кьоIни оIлкайл’ ешемишехьихьейд, ман са эбан миллет водун, манчихъа гора шакIле йишин таарых, аIдатбы ацIахьес ыккан ва гьуваджес ыккан. ШакIле йишин доюкан ааIлимар, дохтурар, динэгьлер ваацIавхьес вуккан. Манбышин насигьаIтбы, ваIъазбы, тербие гьелен увгьойбы гьуваджес ыккан, — манкъвее гьаммаше эйгьи.
М. Шамхаловни увгьойка, ман ишбы аIхреехъаме ыккесдимее пыл, кумаг, хыл’ авхъуй ыккан. Миллетыква багълыданан ишбы Дагъыстанее ва Азербайджан ешемишоохьени цIаIхбышин ааIлимар, ыIлимын ишчер, таарыхчер, шааирар са мислягьаIтеехъа хъабы гьаъас ыккан. Сенее са-кьоIни элеес хъызаахас вуккан, дагъамийвал’бы ашкараъас ыккан ва ил.ах. Манке натийджабы ихьесынбы.
Гьел’бедти, гьаIшде дюнйейл’на джаб вазият гейб югба дешобна. Ши зараба-зараба вуIххъас, хъызаахас воохьи деш. Миллетин сабара суалбы гьаIллаъас эхьи деш. Анджах шахъад имканбы водунбы Россиейл’ ва Азербайджаныл’ ешемишоохьени цIаIхбышди аIреедын алакьабы интернет истифаада гьаы, гьуваджес. ЦIеддыйке манбы мизеква, адабиятыква, маданиятыква багълыданан алакьабы ихьес ыккан. Къийхъа дюнйейн геледжагъ наIгьдын ихьес ыхьай садджу АллагьыкIле ацIа водун. Йишин бордж водун Аллагье шас гьувына миз’, Ватан гьувааджий. Шинад ман гьаIракатбы йишди ушахаршисхъа, невабышисахъа хъелес ыккан.
Агар шахъаб МаIгьаммадшариф маIъаллим хьиннеен инсанар вухьее, миллетид дюнйейни акьвал’ ахвасын. МаIгьбын инсанар миллетна баракат, хазна вобна. Къийнар мана миллетни тIаркIее ворна. Сенис цIаIхни миллетыква багълыданан кIалендарбы ва китаббы Азербайджан манкъвее гьазираъа.
АаIлимыле гъайре, мана югна хизанчий ворна. Джуни ыIмрени гьамбазыква Севиндж баджийква саджигее гьалални къыкыл’, маIърафатыкван, тербиейкван, билигыкван ушахар : дих Вугар, йиш Шагьла чIакIы хъавъу. Манбышис хъаIдхъий гьувы, эвлемишавъу. ГьаIшде манбышихъад джон хизанбы водунбы. Манбы МаIгьаммадшариф маъаIллимын маIгькамын далы водун.
«Нур» кIазетни редакциейн Шамхалов МаIгьаммадшариф Нуруллагьна дих джуни 60 сенни юбилейква табрикаъа. Джус, хизаныс джанана сагъвалла, баракат, шадна ыIмыр аIрзуламишааъа. Аллагье мана миллетике джурдяъана !
