Гьар сен декабрьни вузани 22-чил’ Россииейл’ энергетикарше джони санаъаIтын байрам алгъайгьи.
Энергетикайна отрасль оlлкайни экономикайна гуджнакана сура вобна. Къийнийни йигъыл’ Россиейн дюнйейл’ токl гьувойс ёкьубъэсда джига авхъаахъа. Гьаlшде оlлкее ишлемишехьени АЭС-бышин, ГЭС-бышин, ТЭС-бышин ва хурни ГЭС-бышин оlлкайс лазымынмееган ишыгъ гьели водун. Манчиле савагьийда, оlлкайн гьеххада ахуйн ишыгъ къырагъылхъа масса гьели.
Дагъыстанын чlакlныйий хурни ГЭС-бышди сайихъа гора Россиейл’ ахтына джига авхъаахъа. Гьаlшде энергетикайни сферее азырбышиква гьаlкlен санаъаlткарар чалышмишоохьи. Гьайни сен республикее тезе хаlдын веригъен токlан ишыгъ гьелен станция аляу. Ман Южно-сухокумскни шагьаре водун. Геледжагъыл’ маlгьдын станциебы республикайни медни джигабышейид аляуй назарее аххъы водунбы. Гойне хьинне, елканын токl гьелен электростанциебыд аляъасын республикайхъад имканбы водунбы. Манбыд делесни сенбышее ишилхъа адчесынбы.
Республикее ишлемишехьени станциебыше гьелен токl Дагъыстаныс гьеххаалика чlаlвехьи водун. Амма мани сардан аlхырейни сенбышее республикее яранмишувхьайни вазиятын ши шадааъа деш. Экlда-экlда айкlанни ишыгъбышике гыргынкъве зигаара гьааъа. Манбыше суал гьели: «Няъасый ши манмеега хаlдда электростанциебынани республикее ишыгъбы дена аахва?»
Республикайни энергетикайнийий тарифбышди министерствайкlле инсанаршина мани кареена дагъамийвалла югба ваацlа. Манчина сабаб хаlдда сенбына селлимда ахуйни ишыгъни трансформатбышике, йиссе хъыхьайни диракбышикейий симаршике къооджи. Къийна манбы тезенчика бадалаъасдимее Дагъыстаныс хаlдын пыл ыккан. Гьар сен республикайни хазнейнче мани ишбышис къеккан пыл къийхьар деш. Манчихъа гора, яранмишувхьана вазият садджу инвестициебышди кумагыка быкырааъас ваахаlс.
Сенеиле-сенилхъа шагьарбышее, районбышее тикинтибы хаlдхъехьи. Манчика саджигее ишлемишаъани ишыгъен киловатбыд хаlдхъехьи. Трансформаторбы гуджейхъа гядакlва. Манчихъа гора, хайбышис вая ташкилатбышис ман къийхьар деш.
Мани сардан энки дагъамна вазият аlкьанани сувал’ни районбышее вобна. Мааъб воохьен инсанар геллесди вахтал’ тlокlбы дена аахва. Мани карас Рутул районни Сувал’ни Магьаlлыл’ ешемишоохьен инсанар вардишба вобунбы. Къийна манбышда гыргына энергетик ворна. Манбыше къырагъыле кумаг дена диракбыд бастураъанбы, симаарад цlыцlаъанбы.
Районни ишыгъбышихъа иляакани ташкилатни ишчерше аlхырейни сенбышее хаlбна иш къавджу. Манбыше водни дагъамийвал’бышихъа ил’дяакы, геллесын йиссе хъыхьайн диракбыйий симар тезенчиква бадалауйнбы. Хиваршедын трансформаторбы гуджламишауйнбы. Манчихъа ил’дяакы, мана иш къулайлхъа ачесдимее вахт вуккан.
Сувал’ни хиваршейдын хьиннен дагъамийваллабы Бабаюртни зонайл’ни бинабышилид водонбы. Мааъаб воохьени инсанршихъаб мани сураке хаlдда дагаъамийваллабы водунбы. Аlхырейни сенбышее хивар хаlдхъехьи гидгъыл. Гьар сурал’ гуджнаква тикинтийн ишбы ыккекка. Хьони сенни аlрее Камбулатна хив кьоlни элес хаlб хъувхьа. Джаванарше гьаlракатыква хайбы, джурабаджура аваданийбы аляъа водунбы. Гьайни делесвалей манбыше джони пылыке хивыс тезе трансформатор алищы.
Къийна республикайхъад мани ишбышика багълыда хаlдда джурабаджура ишилхъа адчесын программабыйий проектбы водунбы. Манбы ишлемишехьи гидгъылийле хъийгъа, ишыгъбышикван дагъамийваллабыд аlрейнче ааlсынбы. Манбы кlылда-кlылда хъихьесын ишбы водунбы.
«Нур» кlазетын гыргыба энергетикар джони санаlъатни йигъыква табрик гьааъанбы. Къийна цlаlхбышихъаб мани отраслее чалышмишоохьен инсанар кlылба дешинбы. Манбышис джанана сагъвалла, ишбышее угъурбы аlрзаъа.
