Исламни диныс ыIбаадат гьаий, манчилхъан инам йикIеенче ыхьай ва динни гьаIкIеедын кIораленчен ацIаал’ алеетIуй хаIдын сувааб водун. Гьайни гунагьбынани дюнйейл’ ешемишехьенхъаI, гьар инсане гьаммашийни дюнйехъана джига гьазирааъас вуккан.
Ши, цIаIхбыб, мусурманаршини уммайнбы вобунбы, манчихъа гора Исламни диныс ыIбаадат гьаъас ыккан. Мусурманийлхъа хьодле шартI водун бирмишау . Манчин сайид Рамандина ваз авхъуй вобна. Рамандини вуза мусурманарше сивар аххъаххъа, таIрмыгьбы гьаъа, писди, нягьаIкьни карбышике туба гьааъа, фитIрабы къещи.
Рамандини вуза динни гьаIкIеедын маджлисбы, мавлидбы алгъавгьуй, саджигеедын кубар гьауй, таIрмыгьеехъа сабый, ифтар джамаъаIтыква гьавъуй хаIдни суваабыс гьыIсабехьи. Мана сунна вобна.
Пейгъанбар МуIгьаммадни (с.аIл.с.) гьаIдисе эйгьен: «КьоIйре мусурманий сана-санкъука хъызаахы, хыл’-хылес гьуво горушмишивхьайнкъаI, манбы гьале сана-санкъуке къирагъламишивхьессе джад , манбышин гунагьбы гьойгъаланбы».
Рамандина ваз йыIкьнеехъа гьибхьыр. Манчина гьуIрмат авхъуй, исламни диныс ыIбаадат гьаъани гыргыни инсанаршилхъа бирмишавъуна фарз вобна, ва мусурманаршина эн дилягбы, доъаIбы кьабыляаъана ваз вобна. Рамандик инсанаршини аIреедын муIгьуббат саджигее манзикее гьаыйни кубарше, саджигее гьахувыйни сиварше уIтумаъа. Шукур Аллагьылхъа, гьаIшде дин гьаъани инсаныс мешат ачухда гьаъана дешда. Манчихъа гора, каамил’ни аIкIелеени, джан сагъни инсанее ыIбаадат гьаъас ыккан.
АIхреени сенбышее исламын дин утIумаъасдимее ва ман джегьилершилхъа еймишаъасдимее цIаIхбышди хиваршини имамарше, кьома ЦIаIхни дерайни имамыква Эл’дар гьаIджийква саджигее хаIбба иш, маджлисбы ыккы. Гьар сен манбыше Рамандини вуза, аIсас цIаIхбы ешемишоохьени Урсиятыл’ни шагьарбышее, Дагъыстанеени шагьарбышее хиваршее маджлисбы алгъайгьи. Мааъад Исламни динни гьаIкIеедын маIълумат гьели, ваIъазбы, нашидбы хъаIдаххъа, суалбышис джаваббы хъели. Джурабаджур конкурсбы алгъайгьи.
Гьайни сен цIеббыйна маджлис ва сивар гьахувый Саратовни шагьаре ыхьа. Хъийгъа маIгьабна маджлис МаскIавни шагьаре илгъевчIу. Махъа МаскIав ешемишоохьен цIаIхбы джони хизанбышиква абы. Дагъыстанеенче абыйни динэгьлерше манбышис динни гьаIкIеедын ацIаал’бы гьувы, саджигее кубар гьаы, югун дилягбы гьеххъы, сивар гьахувы. Мани йигъыл’ хаIдда сенбына сана-санкъукIле къидёоджен цIаIхбы хъызаахы, джона ватан, ушахийвалла йикIелхъа хъавалявъу. КьоIдъэсди йигъыл’ Эл’дар гьаIджий джуни гьамбазаршиква сивар гьихелес ва маджлисее иштырак гьаъас Астарханни шагьареехъа хъобтIул. Манбы Астарханни шагьарее «Шукур» ташкилатни мудирарше къаршламишавъу. Мани шагьарее хаIбба цIаIхбы джони хизанбышиква ешемишоохьи вобунбы. Манбышин геллесынбы «Шукур» ташкилатее ишлемишоохьи. Манчини ишини гьаIкIеедын маIълумат ши оIгийл’ йишди кIазетее хьулехье гьувойн. Манчина хааIрна муслагъалий ШаIъбан Мамедов ворна. Мана динилхъа майил’нана ва инсанаршилхъа раIгьымнана мусурманий чодж ворна. Сенис манкъвее хайирхагь (благотворительный) акциебы алгъайгьи, джони хивее къыIлина спортын турнирбы алгъайгьи, хивни аIрайлин тасарруфат ишбы къеджи, джегьилершис хыл’ авхъааххъа. Гьайни элеесыб, мани ташкилате гейб уфтанна маджлис вухьа. ХаIдни утагъеехъа цIаIхбышин джамаъаIт: агъсаххъалар, адамер, едар, ушахар сабы. Манбышис сивар ачмишаъасын хорагбы , мейвабы суфранылхъа гиххьы. Абыйни мигьманарше ваIъазбы ва нашидбы хъаIдхъы. Исламни динна баракат, темизийвалла, уфтаныйвалла ашкаравъу. Сивар гьахувыйле хъийгъа, саджигее хаIнелин кубар гьау. Быкырни йишди миллетис хайир — доъаIбы гьеххъы. Маджлисни аIхрее едигарыс шикыл’бы цIыцIаы.
Ниятее водун маIгьдын маджлисбы, ифтарбы медни шагьарбышейид, хиваршейид алгъавгьуй. Ин ша Аллагь!
