Гьайни вузани 18-че йишди гьоIкуматыл’ дохтураршин йигъ (День медицинского работника) алгъавгьу ва мани йигъыл’ гыргыни дохтураршис ши табрикбы къахову. Дохтурийвалла гьавъуй вахарийн кар деш водон, няъас увгьее инсанна ыIмыр цIебба Аллагьни хыле вобна, гойнеб дохтурни хыле.
Зы гьаммаше ахтына кьиймат йишди йихъбышди дохтураршис гьуво ва гьооли вобна, няъас увгьее шахъаб гееб ацIаал’нан, гьуIрматукан дохтур-ааIлимар, профеcсорар, доцентар вухьа ва гьаIшдеб вобонбы. Джони аIрее едарыб кIылба деш вобонбы. Къийнийна йизда гаф 30-л’ сенна Рутулни районни ЦIаIхийни хивейни дохтураршини амбулаториее ишлемишеехьени Раджабова Эмнехатун ХанаIгьмадни йишени гьаIкIее вобна. МаIнкъее дохтурийвалла гьааъан 30-л’ сен гьайни вуза быкырехьи.
Эмнехатун Раджабова МихьегIни хивее едике йихьа ва мани хивее мактаб таамаъу. Мактаб таамаъуйле хъийгъа, мана Дербентни шагьарейни медучилищни фельдшерни шоIъбеехъа иккIейчIу ва 1993-ъъсди сен манн быкрау. Училище тамаъуйле хъийгъа мана МихьегIни хивее ФАПе ишлемишеехьи гиргъыл’. Сабара вахтале хъийгъа Э. Раджабова ЦIаIхийни хивеени дохтураршди амбулаториехъа ишлемишийхьес аркIын. Мана къийнийни йигъылхъамее мани амбулаториее фельдшерна ишлемишеехьи ворна.
Къийна мана мани амбулаториее, эгьес эйхьи эн лазымна дохтур ворна.
Мани амбулаториейхъа ёкьубле хив илякка (ЦIаIхий, МихьегI, Хьойик, ХыIягъ) ва мани хиваршее инсан чIыры хъыхьанкъаI махъа дохтурусахъава арайли.
Эмнехатуныква гаф гьааъанкъаI манкъее эйгьен гьамахуIбна вахт воохьена йидж чIырыни инсанысахъа мыкIани, гегъани вахтал’ хаахъа гьайекIан.
МанкъыIни увгьойква коронавирусна хасталла вобнанкъаI эгьес эйхьи гейд дагъамда ыхьа, няъас увгьее мани хасталике чIырыхьивхьанбы хаIбба вухьа ва гьарынкъус джус аидын маалидже гьаъас ыккан ыхьа.
Мани дагъамийвалике ши илгъебчIуйнбы, къийнийни йbгъыл’ йишди хиваршее манчике чIырына инсан дешда. Шас хаIдданан кумаг Рутулни районни больницайни сураке ыхьа. Гойнед сабара инсанарше «Инсан» донани фондехъа пылбы алгъавъу шас лазымын дарманбы, вейбабы, маскIабы ады. Шавае мани вахтал’ шас кумаг гьуво манбышикIле сагъолва эйгьи.
Эмнехатун Раджабовайни увгьойква? амбулаториtе къийнийни йbгъыл’ лазымын дарманбыйи веебар водонбы.
«Ши хиваршее инсан чIырыхъыхьайнкъаI манкъус лазымын маалидже гьаъа гивийгъаламбы, амма бирдан вазиqят дагъамба вухьее, мана инсан Рутулни больницейхъа оIтираъана ва мааъад гуджнан маалидже гьаъа.
Йишди хиваршее энки хаIбба зобаке, ичIалатыке, быгъазбышике шикаят гьаъан хастабы воохьи. Гьар сенее кьоIни элеес хиваршее акка-аккал’ ивийкыр профилактика гьаъа ва ненаджар инсан саймазра къекка деш ворна»,- маIнкъее увгьо.
Манкъыни увгьойква йидж дохтурийвалин санаъаIт алятIува пашман йихьайн джига дешин, гьаммаше чалышмишийхьана вахт-вахтал’ чIырынкъусахъа гьийхьарас.
«АIхрейни сенбышее сувал’ни хиваршее дохтурар кIылба авху, няъас увгьtе ааIли таIгьсил’ алятIуйн дохтурар шагьарбышее аахва, гойнед иняъаб ишлемишебахьенбыб авайкIанамбы ешемишебхьес медни шагьарбышеехъа ва регионбышеехьа. Закер ехаIсдани МагьачIкъалеехъа гьирджар аIлгьаас. Мааъад захъад ешемишийхьесын хавыд водун, ишыб тIабалаъас ваIхаIсдани. Амма зы хивей айху ишлемишийхьес, ва гьалалик гьайняа ворна. Зынар аркIынее йишди амбулаторие са Наджабат адей эйхвас.
Сабара вахтал’ лазымбананкъаI Рутулни больницейнче лазымын специалистар абы манбы чIырынбышихъа иляакы джос маалидже гьаъа..
Эгьес эйхьи йишди сувал’ни хиваршее Эмнехатунхьинне джони ишыс джан гьелен дохтурар сен-сенле кIыл’хъоохьи вобонбы, манбышин хаIббананбы пенсиехъа абкIын, джаванар джони джигеехъа хъооI деш. Мана гееб дагъамна йишди хиваршда вазият вобна. Няъасмы «Земский доктор» донани программайква хъооIнбыб дешинбы.
Эмнехатунхьинне 20-30 сенна сувал’ ишлемишебхьайни дохтураршис районни, республикайни сурале гьуIрмат вуккан ва манбышис мукафатбы гьелес ыккан. Шахъаб гьамаIхуIбын дохтурар вобонбы 50-60 сенна ишлемишебхьа нейинки республикайни, районни администрациейни сураке грамота, ва медын мукафат алятIу деш. Мани сардан болницайна, ФАПна, амбулаториейна хааIрна къайгъее ахвас ыккан.
Умуд гьааъана, Эмнехатун Раджабовае къооджени ишис ахтына кьиймат шавукейий манкар аслыда манбыше гьевлесда.
Ши Эмнехатун Раджабовайс ва джека ишлемишебахьени ЦIаIхийни амбулаториейни ишчершис оIтмишхьайн дохтураршин йигъ мубаракда ихьенва ва джос джанана сагъвалла ва къооджени ишее угъурбы арзуламишаъанбы эйгьи. ЧIырынбы кIылба вухьенбыва эйгьи!
