Гьайни сен, июнни 24 –чил’ Россияйл’ джегьилершис къассырийн йигъ алгъавгьу. Мани ыIмырни оIл’чеехъа 14 -35 ешеебын инсанар гябакIа. Манбышди аIреейиб хаIббананбы телябабы вобунбы. Имкам гибхьыйхъа гора, « НУР» кIазетни редакциейн джегьилер джони Йигъыква табрикааъа! Югна ыIмыр ва джанана сагъвалла манбышис аIрзуламишааъа.
ОIлкайн экономика, адын ва къадын сиясат, маданият, хъаIдхъий, хивын тасарруфат гьаIракатеехъа абадчена гудж – джегьилер вобунбы. Агар гьоIкуматын къийхъийн йигъ шадын ва болун ихьес ыкканхьее, манке джегьилершикIле ачухна ва хъобкуна йаIхъ гьаагвас вуккан; манбышиквана миз тIабалааъас вуккан.
Йишди гьоIкуматыл’ Дагъыстан эн джегьилер хаIббанана республика вобна. Манбы терсинани ишбышиква маIшкьулдевхьайни мейга, иш джигабы манбышис гьазираъас ва гьелес ыккан.
Йишонааъас ишбышди ва къуллухбышди гьаIкIее. Иш, ыIмыр гьаIракатеехъа абаччен лышан водун. СанаъаIт сечмишаъассе гьихъа, гьаарункъукIле джун гьаIракатбы ацIахьес ыккан.
Къийна ишилхъа эчIесдиме, къуллухылхъа илгъечIесдимеега, не югун «калле», не югна дайий, нейид «кокун джиб» ыккан. ЦIеббыйна йаIхъ текасейракни джегьилис кьисматоохьи. Иш ваацIанкъус оIгеехъа ааIсда йаIхъ дешда. ОIгее чIакIын къаебы илёдзыр водунбы. Къийна ушах бахчейле гидгъыл, чIакIни ташкилатбышехъамее рушватын, коррупциейн манбы алищу водунбы. Мебна чараа гьиняа дешда. Инсанни фыкреехъа хъайли деш, яныл’ джуле гьаIракатыкванбы, баджарагъыкванбы, гуджнакванбы воохьива. Мисала вобна: «Къуллухыле бадалааъас дёохьенбы, воохьенбы дешки». ГьоIкуматна иш джуни «деккинчилхъа» сивийкIал. Агар вахтале вахталхъа, «джига къуIмаъабкIаъассе», къуллухчер бадалавъээ, бел’ки сыкIылда коррупциейн оIги даянмишаъас аIха.
Гьаар инсане джун яшайиш ыIмрени аIхреехъаме лайикьука ыккеес ыккан. Манкъухъад камын-кесирын ихьес ыккан деш. КьаIсхъыхьа ишлемишхьес дяхаIни инсаныс гьоIкуматын гыргын шарааитбы яратмишаъас ыккан. Гыргына мани ешеехъа, Иншааллагь, гьихьарасда. КьаIсинбышда гьуIрмат гьид’вааджени джигее джегьилершихъаб геледжагъыл’ барака вухьес деш. Анджах ешеени инсанни напсехъабыб кьараал’ вухьес вуккан. Пенсиеехъа хъигъечIуна инсан маIгьаIрна инсан ворна, манкъуке иш быкырба быкырааъас вааIха деш. ЙаIъни мана гьааъас джанан муфлат гьооли деш. Йишди увгьойка, пенсиеехъа гьирхьыл’на инсан къуллухыле, гьоIкуматни ишиле аIл’гьаас ыккан. Шавусджад акьва хатир гьаъас ыккан деш. Къийна гыргын акьвакIена водун. ХаIббанани пенсионераршихъад джон хав-уджагъ водун, ушахаршисын джигабыд къаджейнбы, гьоIкуматын гьелен пенсиебыд аляатIанбы, ишиле доннухбыд къат-къатна джегьилершиле гьеххан аляатIанбы, къуллыхыхъаб тиканхьинне идвийкьананбы, джегьилершиле къел’бы къадчу медын ишбыд гьаъанбы.
Хиваршее, районее, республикее иш девхьайхъа гора йишин, цIаIхбышин джегьилер, Урсиятни шагьарбышеехъа ишлемишивхьес аIл’гьаа вобунбы. Хивар кьаIсинбышис аху, сувабыйий чIалагбыд ваIгьщи гьаIйванаршис. Хивар веранхьамее, миллетна мизиб, маданиятыд аIрайле ааIсынбы. Манбы адкIынмеега миллетыд итбатхьесын.
Анджах закIле къавджес вукканий къуллухбышил’ баджарагъукан, ацIааликван, кIаарни ишбышее къарышмишдевхьайн джегьилер. Джегьилер гьоIкумат гьаIракатеехъа адаччена гудж вобна. Къийна ши манбы хъобкуни йаIххъылхъа гявгьее, ишебашеехъа авъээ, инам гьаъан гьоIкумат къийхъа гьаIракатеехъа хъалесын. Зас ыкканан йишди цIаIхбышди джегьилершед джон зор, джон гьаIракатбы, джон гьунарбы чIакIни къуллухбышил’ гьагуй. Манчилхъа зы инам гьаъан.
АIхреени вахтал’ йишин джегьилера кIылба-кIылба «чичис уIвхийха» гибгъыл’. Манбыше джурабаджур фондбы ачмишаъы. Манчина макьсад дагъамийвалеехъа гябкIуйни инсанаршис, етимба авхуйни ушахаршис, инвалидаршис кумаг гьувой вобна. Манчиле гъайре , гьар хивни джегьилерше джони хивни аIреедын ишбы гьаъасын фондбы ачмишаъы. ГьаIшде манбы гьаIракатыква ишлемишехьи водунбы. ШакIле къеджен, ЦIаIхни хивни джегьилерше ахреени сенбышее хивни аIрайл’ гьаыйн ишбы. ГьамаIгьдын фондбы медни хиваршихъадыд водунбы. ГьаIракатыква Муслагъни, Калел’ни, Аттални хиваршин джегьилерыб мани ишбышее гьаIракатба вобунбы. Мебни хиваршини джегьилершеб манбышике месала алебтIее югба вухьес.
Йишди фыкрее водун гьайни дёлесийвалее мани хиваршини джегьилершини фондбышин чIакIынбы редакциеехъа хъобтIулый. Ши йишин «НУР» кIазет хъаIдаххъанбы манбыше гьаъани хайирыквани ишбышиква танышааъас.
Шахъаб лидерар хьинне гьихъа вуIххъан джегьилерыб вобунбы. Мана София Меликова, Саид Маллеев, Руслан Алхасов, Гул’бениз Рамазанова, Ил’гар Лелаев, Севил’ Давудова, Фаик АIзизов, Кьурбан Мамедов, Арсен АIбдуллаев, Рамил’ АIбдуллаев, Надир Асланов, Радмила ГьаIйдарова, Наргиз Гьамзаева, Наргиз Раджабова, Айгул’ АIлиева , Халил ЫIсаев ва мебынбы. Къийна Софие джурабаджур дюнйейни ташкилатбышди трибунабышенче дюнйейлхъа йишди миллетын до, маданият, дагъамийвалла ашкараъву. Къийна маIнкъее медын-медын проектбы йишди кумагыква гьазираъа водунбы. Мана чалышмишеехьена, миллетыква багълыданан ишбы гьаIракатеехъа адчес.
Шахъаб гьаIшде гьихъа ааIна джегьил’ дохтураршина дестеб вобна. Манбыше йишди агъсаххъаларшин аIдатбы гьуваджы, джоке аIхан кумагбы чIырынбышис гьаъанбы . Джегьил’ дохтураршилхъа хаIдын умыдбы водунбы.
Агар ши гьаIкIебаб гьаIмагьабни джегьилершис йаIхъ гьувее, манке бел’ки ши улепбы аахъа.
Къийна Ватан дареехъа айибхьыйнкъаI, мыга гьооленбышин са цIеббыйнбыб цIаIхбышин джегьилер вобунбы. ШакIле ацIан, сений сура водун Украинее спецоперацие аIлгьаан. Ман къонши гьоIкумат нацистаршикейий фашистаршике темизяъа водун. ЦIаIхбы сайис кIылин миллет ыхьейид, агар фааизбышиква алеетIе, мани спецоперациее хаIббанани джегьилерше гьаъа водун. Манбышди аIрее контрактникар, мобилизациехъа гябкIыйнбы ва джони гьавасыква (добровольцы) гьабкIынийнбыб вобунбы. КьоIни-хьебни духйерше мааъад иштыракаъан цIаIхбышихъад хизанбы водунбы. Манбыб кIеливханааъас вуккан деш. Ши манбышди гьаIкIее гьар кIазетни нумрее ойкIанан.
ШакIле къеджен гьаIшде гьиджойий соцсетьбышее эхьи. Гивийгъаланбы югни мислягьаIтбышиква , илгъебачIенбы гьыIдчатбышилхъа. Гьаарункъвее джулхъа ёргъан цIыцIааъа. Ихтелет’бы хаIдда, ишбы кIыл’да. Ман карбы джегьилершикIле къаджемее, йикIдена хъоохьи. Миллетни сардан къеджени ишбышди къуллухбышилхъа гогьагьарийваликва, тохумбышиква, джибни цIобааликва деш, амма аIкIеликва, ацIааликва сечмишааъас вуккан. Шахъаб гьаIкIебаб маIгьбын джегьилер гьар хиваршеенче хъигъебчIуйнбы вобунбы.
«Нур» кIазетни редакциейн гыргын джегьилер джони байрамыква табрикааъа ва манбышис угъурбы, джанана сагъвалла аIрзуламишааъа!
